Het boeck der psalmen Davids

De thien Gheboden na de oude gewoonlijcke wyse van P. Datheno uyt den Franchoyse ouer ghesett.

HEft op v hert opent de ooren,
Ghy hardt volck end' traegh int verstaen,
Wilt uwes Gods stemme nu hooren,
End' zijn Gheboden gadeslaen.
* Ick ben (segt hy) v God end' eere,
Die v hebbe ghemaeckt gantsch vry
Van t'jock t'welck v beswaerde seere:
Hebt gheen and'ren Godt neuen my.
* Laet v gheen Beeld' maken noch snyden,
Van eenigh dinck int aertsche dal:
Soo ghy die eert t'eenighen tyden,
Uwe Godt seer zeloers zijn sal.

[fol. Bbviijr]

 

* Ydelijck synen naem ghepresen

 

Sult ghy niet nemen inden mont:

 

Want hy sal niet onschuldich wesen

 

Die dien misbruyckt t'eenigher stont.

 

* Arbeyt ses daghen, end' met lusten

 

Viert den seuensten, Gods woort smaeckt:

 

Want Godt wild' op dien dach self rusten,

 

Van t'werck dat hy hadde ghemaeckt.

 

* Vader end' Moeder sult ghy eeren,

 

Op dat ghy langh' in voorspoet leeft,

 

End' op aerden seer moecht vermeeren

 

Die v Godt tot een herbergh' gheeft.

 

* Dootslach end' toorne sult ghy myden:

 

All' oncuysheyt vliedt end' afbreeckt:

 

Steelt niet al moest ghy ghebreck lyden:

 

Gheen valsch ghetuyghenisse spreeckt.

 

* Van begheeren sult ghy v wachten

 

Des naesten huys end' wijf nu voort,

 

Na zijn knecht oft vee wilt niet trachten,

 

Noch na al dat hem toebehoort.

 

* O Godt v Woort seer groot van machten,

 

Luydt claerder dan eenigh metael:

 

Gheef ons die ghenaed' ende crachten

 

Om die te houden altemael.