Het boeck der psalmen Davids

De Cxxviij. Psalm.

De Psamschryuer beschryvende de ghelucksalicheyt der Godsvreesenden, leert dat Godes segeninge met danckbaerheyt behoort aenghenomen te vverden, beyde int ghemeyne ende int besonder.

1. Een uytnemende voortreffelijck Liedt.

HY heeft geluck end' seghen,
Die Godt den Heere vreest:
End' hem tot syne weghen,
Begeeft met sin end' geest.
2. Dijn handt saldy geneiren
End' winnen doen dijn broot:
Ja Godt sal

[fol. Yviijr]

 

dy bescheiren,

 

Gheluck end' voorspoet groot.

 

3. * Dijn huysvrouw' sal dy wesen,

 

In dijn huys end' ghesinn',

 

Een wijnstock uyt ghelesen,

 

Die brengh't schoon vruchten inn'.

 

End' dynen disch rontomme,

 

Sullen dijn kind'ren jonck,

 

Vercieren als een blomme,

 

Oft een Olyuen stronck.

 

4. * Siet, dit zijn de weldaden,

 

End' seghen die Godt gheeft

 

Den mensch' die in zijn paden,

 

Nae Godes vreese leeft.

 

5. Oock sal dy van Godt goedich,

 

Noch dit gheluck gheschien,

 

Dat du Sion voorspoedich.

 

Salt all' dijn leuen sien.

 

6. * End' salt kinds kind'ren mede,

 

Oock zien van dijn gheslacht:

 

End' Israel in vrede,

 

Wt allen druck ghebracht.