Het boeck der psalmen Davids

De Liiij. Psalm.

Dauid sijnde vanden Zyphienen verraden, bidt voor verlossinghe ende voor het verderf der god'loosen: Daer nae belooft, dat hy sulcke genade ontfangen hebbende, God noch vyerichlijck louen ende dancken sal.

1. Den Oppersangmeester op het snarenspel: Een berichtsliedt Dauids.

2. Doe de Zyphienen quamen ende seyden tot Saul: Is hy niet by ons verborghen?

3. UErloss' my Heer door dynen Naem
Mits dijn ghenad' wil mijnr' ontfermen,
Wil my doch in mijn recht beschermen
Door dyne cracht groot end' heylsaem.
4. Hoor mijn ghebet end' droeue clacht,
End' neyge my dijn gunstigh' ooren

[fol. Ivjv]

 

Om myne woorden aen te hooren

 

End' op de selue te slaen acht.

 

5. * Want vremde teghen my opstaen:

 

Een grousaem volck stout end' hoomoedich

 

Staen my na t'leuen seer verwoedich,

 

End' willen d'oogh op Godt niet slaen.

 

6. Nochtans is Godt mijn helper groot

 

De Heer is aen der ghener syde

 

Die my staen by, in desen stryde,

 

End' m'onderstutten inden noot.

 

7. * Hy sal mijn vyant ghelden we'er

 

Het quaet dat hy m'heeft toebereydet

 

Heer nae dijn trouwe lang' verbeydet

 

Verniels' end' slaef' al t'saem ter ne'er.

 

8. Soo sal ick uyt ghewill'ghen moet

 

Dy offers aenghenaem voortdraghen,

 

End' dynes naemens loff ghewaghen

 

Die lieflijck is end' machtich goet.

 

9. * Want du hebst my uyt all' onrust

 

End' ancxt verlost self nae mijn wensschen:

 

Mijn ooghe siet aen dese menschen

 

Die my vervolgden, mynen lust.