Het boeck der psalmen Davids

De xliiij. Psalm.

De ghemeynte beclaegt seer swaerlijck haere verdruckingen ende lyden, stellende Gode voor ooghen het exempel der voorvaderen, hert verbondt des Heeren, ende den yuer Gods tot grootmakinghe syner heerlijckheyt. Ende steunende op haere goet ghevvissen, verclaert de selue te lyden voor den naem Gods, biddende ten laetsten om verlossinge ende behoudenisse.

1. Een berichtsliedt voor den Oppersangmeester onder Korachs kinderen.

[fol. Hir]

 

2. MEn heeft ons Heer met onsen ooren

 

Dijn wonder wercken laten hooren.

 

Ons' ouders hebben ons vertelt

 

De daden van dijn sterck gewelt

 

3. Dijn hant heeft d'heydenen verjaegt

 

End' onse vaders in haer stede

 

Gheplant, end' volcken hardt gheplaecht

 

Op dat ons' stamm' daer groeyd' in vrede.

 

4. Want sy voorwaer t'besit der eirden

 

Noyt en vercreghen met haer sweirden:

 

Oock heefts' haer eyghen arm end' cracht

 

Noyt uyt des vyants noot ghebracht.

 

Maer dyne handt, dijn erm seer sterck

[fol. Hiv]

 

End' dynes aensichts heylsaem claerheyt

 

Was diese lost', het was dijn werck:

 

Mits duse lief hadtst inder waerheyt.

 

5. * Du self bist mijn Godt ende Coninck

 

Beschick' uyt dyner hoogher woning'

 

Dijn heylsaem hulp' in wederstoot

 

Help Jacobs stamm' uyt allen noot.

 

6. Wy hebben onses vyants moet,

 

Door dy, met hoornen ne'erghevellet

 

End' in dijn naem ond'r onsen voet

 

Ons' wederstryders all' ghestellet.

 

7. * Dies sal ick doch mijn hop' niet bouwen

 

Op mynen boghe: noch vertrouwen

 

Dat mijn gheweir my soud' in noot

 

Bewaren kunnen vander doot.

 

8. Maer du bist Heer die du ons treckst

 

Wt s'vyants macht end' allen lyden

 

End' die de ghen' met schand' bedeckst

 

Die ons met haet end' nijt bestryden.

 

(1) ** **

 

9. * Dies moeten wy ons' roemen stichten

 

Op God den Heer end' lied'kens dichten

 

Tot synen loff: end' dach voor dach

 

Ghestadich doen zijns naems ghewach.

 

10. Maer du verstootst ons van dy wijt,

 

End' laetst ons worden Heer tot schanden

 

Sonder dat du ons inden strijdt

 

Voortreedst oft helpst uyt s'vyants handen.

 

11. * Du doest ons met schand' end' oneeren

 

Den ruggh' voor onsen vyant keeren:

 

Wy zijn ons' haters tot een buyt,

 

Sy deylen ons' goed'ren uyt.

 

12. Du hebst ons op de slachtbanck bracht

 

Ghelijck als arm onnoosel schapen

 

End' wijt verstroyt onder de macht

[fol. Hijr]

 

Van t'volck dat ons verdruckt met wapen.

 

13. * Du hebst dijn volck vercoopen laten,

 

Als dat gheveylt wort op der straten,

 

Om kleynen prijs met schimp end' smaet:

 

End' hebst daeraf gants geene baet.

 

14. Du maeckst ons tot schand' ende vloeck

 

Rontom all' onsen naghebueren:

 

Aen elck winckel ende hoeck

 

Wy moeten schanp end' spot besueren.

 

15. * Wy dienen t'volck tot boerd' end' cluchten

 

Die sy vertellen uyt ghenuchten

 

Sy schudden t'hooft als zy ons sien:

 

Wy zijn een gecksmer voor de lien.

 

16. Beschaemtheydt staet altoos ghestreckt

 

Voor mynen ooghen t'elcken daghe:

 

Mijn aenghesicht is ouerdeckt

 

Met schand' end' oneer' die ick draghe.

 

17. * Van lasterreden die sy segghen

 

End' van't verwijt dat zy m'oplegghen,

 

Om s'vyants will' die seer verwoet

 

Wreeckt ouer ons zijn grammen moet

 

18. Dit is ons t'samen al gheschiet:

 

Noch hebben wy dijns niet vergheten,

 

Noch dijn verbondt in dit verdriet

 

Oyt onder voeten wech ghesmeten.

 

(2.) Pavse

 

19. * Wy'n hebben noyt in dese smerten

 

Tot yemant el ghewent ons' herten

 

Noch onse ganck oyt afghekeert

 

Buyten den wech van dy gheleert.

 

20. Hoe wel du ons tot gruys ghemaelt,

 

End' hebst ghejaecht in draken kuylen.

 

End' met de scheem des doots onthaelt,

 

Daeronder wy mismoedich schuylen.

 

21. * Voorwaer zo wy dwaes end' vermeten

[fol. Hijv]

 

Den naem Gods hadden oyt vergheten,

 

Oft d'hant ghestreckt uyt onverdult

 

End' eenen and'ren God ghehult.

 

22. Soud' God zijn' eer' aldus gheschent

 

Met scherper straffe niet naetrachten?

 

Hy die t'verborghen herte kent

 

End' doorgrond't nieren end' ghedachten.

 

23. * Wy worden, Heer, gheheele daghen

 

Om dijns naems wille dootgheslaghen:

 

End' zijn niet anders hier gheacht,

 

Dan arme schapen diemen slacht

 

24. Ach Heere God, ontwaeck, t'is tijt:

 

Hoe blyfstu slapen nu soo langhe?

 

Waeck op, verstoot ons niet soo wijt:

 

Verlaet ons niet, want ons is banghe.

 

25. * Hoe is dijn aensicht nu verborghen,

 

Daer m'ons soeckt alle te verworghen?

 

Hoe kandtstu onsen druck end' smert'

 

Dus stellen gantzlijck uyt dijn hert'?

 

26. Ons' gheest end' siel' is ne'erghebuckt

 

Int stoff end' asschen met onweirden:

 

De buyck is ons plat ne'erghedruckt

 

End' cleeft aen t'vuyle slijck der eirden.

 

27. * Stae op dan Heer: wil op ons letten

 

End' ons in desen noot ontsetten,

 

Om dijns gunsts wil Heer ons behoed

 

In onsen druck end' teghenspoet.