Het boeck der psalmen Davids

[fol. Giiijr]

Der xl. Psalm.

Dauid versterckende sick seluen inden gelooue van weghen dat hy ende de gemeynte Gods syne hulpe ende ghetrouvvicheyt, mitsgaders de stantvasticheyt sijns verbonts versocht hebben begheeft hem gevvillichlijck in de ghehoorsaemheyt Gods, ende tot het grootmaken sijns naems, begeert ghenade ende verlossinghe mitsgaders der boosen onderganck ende der vromen vertroostinghe tot des Heeren lof.

1. Den oppersangmeester, Een Psalmliedt Dauids.

2. UAn herten seer hebb' ick nae God verlangt,
End' ancxtich op zijn hulp' ghewacht:
Dies heeft hy oock op my gedacht:
Want hy mijn stemm' genadelijc ontfangt.
3. Hy heeft my uyt den kuyle
Vol slijms end' modders vuyle
Ghetrocken end' ontlast.
End' heeft mijn

[fol. Giiijv]

 

voet int droogh'

 

Ghestelt op een rotz hoogh'

 

End' ondersett welvast.

 

4. * Een schoon niew liedt geeft hy my inden mondt

 

Tot Gods des Heeren loff end' prijs

 

Dies menich mensch' die sulcx wort wijs

 

Sijn hop' op hem met rechter vreese grond't.

 

5. Wel salich zijn die bouwen

 

Op God haer vast vertrouwen:

 

End' sien niet eenmael om

 

Naer t'volck dat seer verhoogt,

 

Wt hoovaerdy hem boogt

 

Tot loghens slimm' end' kromm'.

 

6. * Du hebst o Heer groot' wonderen ghedaen

 

Gheen mensch' kan dijn ghedachten all'

 

Tot onswaert, houden in ghetal.

 

Noch op de rey dijn deuchden ouerslaen.

 

Als ickse wil hooch louen,

 

T'ghetal gaet my te bouen.

 

7. Gheen offer noch gheschenck

 

Lust dy: maer tot dijn woort

 

Hebstu my d'oor' gheboort,

 

Dies ick steedts dijns ghedenck'.

 

8. * Du'n hebst geen brant noch soenoffer begeirt

 

Dies heb ick dus tot dy gheseyt:

 

Sie Heer ick kom' end' ben bereyt

 

Daer staet van my ghemelt in dijn boeck weert

 

9. Dat ick sonder gheschille

 

Volbrenge dynen wille:

 

Daer aen heb ick mijn lust.

[fol. Gvr]

 

Dijn wet is my gheplant

 

Int hert' end' inghewant

 

Want mijn geest daer op rust.

 

(1.) ** **

 

10. * Voor scharen volcx heb ic dijn trow vertelt:

 

Du wetest Heer dat mynen mondt:

 

Heeft dijn gherechtheyt steed's vercondt

 

End' hebb' gantz niet ghelaten onvermelt.

 

11. T'hert' heeft my noyt versweghen

 

Al dyne rechte weghen,

 

Dijn waerheyt heyl end' cracht

 

Dijn goetheyt ende trow'

 

Heb ick vry sonder schow'

 

Voor t'volck ten voorschijn bracht.

 

12. * Dies du o Heer aen my oock niet verspaer

 

Dijn ontfermherticheyt in noot

 

Dat my dijn gh'recht'heyt ouergroot

 

End' waere trouw ghestadelijck bewaer.

 

13. Want my sonder ghetallen

 

Ellenden ouervallen:

 

Mijn sonde m'overdringt

 

Sy ouertreft voorwaer

 

T'ghetal van mynen haer

 

Soo dat my t'hert' ontsinckt.

 

14. * O Heer wil my ghenadich nu bystaen

 

End' haest dy tot mijn hulpe seer.

 

15. End' laetse comen tot onneer

 

Die my bespien om my ter doot te slaen.

 

Heer laetse met schand' wijcken

 

Die my veronghelijcken.

 

16. Verderff' o Heere Godt,

 

Tot loon van haer verwijt,

 

All' die met my uyt spijt,

 

Vast houden haeren spot.

 

17. * Maer laet die zijn in dy altoos verblijt

[fol. Gvv]

 

Die oprecht soecken dynen naem

 

End' wie liefheeft dijn cracht heylsaem.

 

Die segg' altijts, God sy ghebenedyt.

 

18. Ick ben arm end' ellendich:

 

Maer God heeft my bestendich

 

In mijn cruys end' verdriet

 

Wel trouwelijck versorgt,

 

Du bist mijn vaste borgt,

 

Mijn God vertoef doch niet.