Het boeck der psalmen Davids

De xxix. Psalm.

Dauid vermaent de Godsalighe tot Godes lofsang, soo wel om syner vvondervvercken vville, die hy in sonderheyt inden donder bevvijst, als in aensien syner genade die hy der ghemeynte mits synen heylighen vvoorde is doende.

1. Een Dauids liedt.

GHeeft ghy vorsten groot geacht,
Gheeft God'

[fol. Eijv]

 

eer, prijs ende macht

 

Biedt eer ende loff te saem

 

Godes aller hoogsten naem,

 

2. Doet den voetval voor den Heere:

 

Bidt hem aen, End' doet hem eere

 

Inde heerlijcke woonsteden

 

Syner weerden heylicheden.

 

3. S'heeren stemm' met groot ghebaer

 

Druysschet ouer t'water claer

 

Ouer wolcken inde lucht

 

Dondert Gods macht met gherucht.

 

4. S'heeren stemm' end' donder crachtich

 

Thoont wel dat hy is almachtich.

 

S'heeren stemm' vol grooter weerden

 

Tuygt zijn heerlijckheyt op eerden.

 

5. * S'heeren stemme met ghewelt

 

Cederboomen nedervelt:

 

D'hoogste Cedren worpt in 't sant

 

Die op Liban staen gheplant.

 

6. Den berg Liban doet hy springhen

 

Als een jonck calf niet om dwinghen.

[fol. Eiijr]

 

Ende den berg Sirjan beuen

 

Als een Eenhorn hooch verheuen.

 

7. * S'heeren stemme splijt van een

 

Vlammen viers end' doet se scheen.

 

8. Hy doet beuen t'wilde wout

 

End' maeckt Cades seer benouwt.

 

9. Hinden wilt doet hy mis baren.

 

Wt ancxt die haer seer vervaren

 

Hy doet bosschen end' plantsoene

 

Van ancxt schieten haer loof groene.

 

* Maer 'tvolck Gods groot ende cleyn

 

Gaet in synen tempel reyn

 

Daer elck een die syn' naem vreest

 

Looft end' danckt hem uyt den gheest.

 

10. God regeert end' can verhoeden

 

Wolcken ende watervloeden

 

God is Coninck seer grootdadich

 

Ende zijn rijck blijft ghestadich.

 

11. * God sal gheuen sterckt' end' cracht

 

Synen volck' dwelck op hem wacht:

 

De Heer sal met vrede goet

 

Sijn volck seg'nen in voorspoet.