Het boeck der psalmen Davids

Psalm xvij.

David sijnde van synen vyanden verdruct, oorcondt syne onschult, ende gerechtige saecke, midtgaders syne eenvoudicheyt: ende betrouwende op Gods barmherticheyt, bidt dat hy mach bewaert worden, ende syne vyanden beschaemt, op dat sy te rechte vernemen, hoe wanckelbaer dat haere goederen sijn daer sy haer op verlaten, ende dat hy der ghetrouwicheyt des Heeren ghewaer werde.

[fol. Civ]

1. Een Ghebedt Dauids.

HOor Heer, neem acht op mijn goet recht
Wil mijn gheschrey met vlijt aenhooren:
Tot mijn ghebeden neyg' dijn ooren:
Mijn hert end' mont is vroom end' slecht
2. Wil self o Heer mijn sak' beleyden,
Dat mijn twist werd' van dy geslist:
Want mits dat du rechtveerdich bist,
Laet dijn oog' t'recht wel onderscheyden.
3. * Du hebst mijn hert' wel naew versocht,
Ja oock by nachte willen gronden,
Doch sonder erg' altoos bevonden.
Ick sprack noynt anders dan ick docht,
4. Wat menschen doen oft'oyt doen pleghen,
Ick merck' op't woort van dynen mont:
End' myd' altoos uyt s'herten gront
Des roouers goddeloose weghen.

[fol. Cijr]

 

5. * Mijn stappen Heer vast ondersett

 

Op dyne paden sonder beuen,

 

End' laet mijn ganghen nergens sneuen,

 

Noch treden af van dyner wet.

 

6. Ick roep dy aen, in mijn ellende,

 

Want du verhoorst my, God, altijdt,

 

Daerom lett nu op mijn ghekrijt

 

End' tot mijn reden dijn oor' wende.

 

7. * Maeck dyne goetheyt wonderbaer,

 

Laets' heerlijck schynen int behouwen

 

Der ghenen die op dy betrouwen,

 

Van dyner wederstryders schaer.

 

8. Wilt my so naeuw end' wel bewaren

 

Als men zijn ooghen appel doet,

 

Die scheme dyner vlueg'len moet

 

Mijn decksel zijn in dees' ghebaren.

 

(1.) ** **

 

9. * Wil my van t'god'loos volck ontslaen

 

Die my met groot gheweldt bespringhen,

 

Mijn vyanden die my omringhen,

 

End' hatich na mijn leuen staen.

 

10. Van smout is hun het hert' ghesloten.

 

Haer mont is trotzich end' spreeckt hoog'

 

11. Sy volghen hebbend' ons ind' oog'

 

Om ons ter eerden ne'er te stoten.

 

12. * Elck een van hun een leew ghelijckt

 

Die nae den roof snackt met verlanghen,

 

Oft t'leewken dat om aes te vanghen

 

Stil in zijn hol loert ende kijckt.

 

13. Stae op, gae hun Heer int ghesichte

 

End' storts' omveer, verlos' met cracht

 

Mijn siel uyt des god'loosen macht,

 

Met dijn scherp sweert end' streng' gherichte

 

14. * Van menschen helpe my dijn handt,

 

Van menschen dien hier in dit leuen

[fol. Cijv]

 

Voor langhen tijdt deel is ghegheuen

 

Te blyuen in een goeden standt.

 

Dien du den buyck hebst vol ghestooten

 

Met Schat end' met versteken goet

 

Haer kind'ren leuen satt met spoet

 

End' laten t'goet hunn' erfghenooten.

 

15. * Maer ick sal aensien, God getrouw

 

Dijn aenschijn mits mijn rechte saecke.

 

End' sal my telcx als ick ontwaecke

 

Versaden met dijns beeldts aenschouw.