Het boeck der psalmen Davids

De tweede Psalm.

De aenslagen der godloosen tegen t'rijcke Dauids ende Christi: Gods gerichte ouer hun: De instellinge, verbreydinge, vasticheyt ende dadelicheit sijns conincrijcx: De vveder stryders werden tot den gelooue ende recht berouwen vermaent: De wederspannige gedreygt van een eewich verderf. Den gehoorsamen vvort salicheit toegeseyt.

1. HOe gaet dit toe, dat d'Heydens soo te gaer
Met groot ghewoel haer rotten ende ringhen?
End' ouer hoop de volcken met misbaer Slaen

[fol. Aijr]

 

yd'len raet die doch niet sal ghelinghen?

 

2 De Coningen op d'aertrijck hier beneden

 

Maken sick op, met kommer end' onvre',

 

De Vorsten zijn met ancxt in raet getreden

 

Tegen den HEER end' zijn' ghesalfden me'.

 

3. * Comt aen, laet ons te gader (segghen sy)

 

Verbreken t'jock daer m'ons wilt mede dwingen

 

End' maken ons van hare banden vry,

 

End' vanden hals wech werpen hare stringhen:

 

4. Maer die daer woont om hoogh' in s'Hemels throonen

 

Sal onbeweecht belacchen haren raet,

 

De HEER sals' all' ontwijffelijck beloonen

 

Met schand' end' spott, met onneer ende smaet.

 

5. * Als dan den tijdt begint recht aen te gaen

 

Hy salse voorts met grimmicheyt aenspreken

 

End' jaghen hun een grouwsaem schricken aen

 

Door synen toorn' als een vier heet ontsteken.

 

6. Wat gaet v aen ghy onbesinde dwasen?

 

Mijn Coninck weert heb ick gesalft, spreeckt hy,

[fol. Aijv]

 

Dies in Syon (spijt v onsinnich rasen)

 

Mijn heyl'ghen berch sal hy regeren vry.

 

7. * Ick sal Godts will', zijn vonnis ende recht

 

Vry segghen uyt: Dat hy my heeft verkoren,

 

End' dus tot my wel duydelijck ghesegt:

 

Du bist mijn Soon' huyden van my gheboren.

 

8. Eysch my maer vry, ick sal tot dyner eruen

 

Dy schencken t'lant met hoopen volcx seer swaer,

 

Du salt van my tot dijn besit verweruen

 

De palen breedt des aertrijckx gants end' gaer.

 

9. * Met dynen straf veel herder dan een stael

 

Salstu dit volck vernielen end' verderuen,

 

Ghelijckmen breeckt end' vernielt t'eenemael

 

Een aerden pot tot gruys end' cleyne scheruen.

 

10. Daerom siet toe ghy Coninghen vol weerden

 

Dat ghy wort wijs, end' beter zijt bedacht,

 

Bevlyticht v ghy rechters op der eerden,

 

Dat ghy na deucht end' goede leere tracht.

 

11. * Dient God den Heer end' zijt hem onderdaen

 

In rechter vrees' end' soeckt hem te behaghen,

 

U herte sy met vreugd' in hem bevaen,

 

Doch in sick selfs verbroken end' verslaghen.

 

12. Huldt vry den Soon', kust end' valt hem te voete

 

End' neemt hem stracx tot uwen Coninck aen,

 

Op dat v niet zijn gramschap en ontmoete

 

Daer door ghy moecht in uwen wech vergaen.

 

13. * Als hy maer slechts in synen toorne snel

 

Als een vlam' vyers beginnen sal te branden,

 

Och t'sal voorwaer den genen gaen seer wel

 

Die haer gheheel verlaten in zijn handen.