Versamelde werke

Staan, Poppie, Staan!
Verwerking van 'n ou volksliedjie

Staan, Poppie, staan,
laat jou gedagte gaan,
dat jy vir my kan sê
hoe diep die liefde lê.
Ag, sê my sonder vrees,
kan dit die liefde wees?

O Liefling soet en teer,
wat sak jou oë neer,
so donker as die nag,
met al haar sterreprag -
o, sê my tog gewis
of dit die liefde is?

Wat maak die helder roos
wat in jou wange bloos?
Vanwaar die groot rumoer
wat in jou are roer?
O sê my tog gewis
of dit die liefde is?