Het schilder-boeck

Cybele.

Cybele, die de Moeder der Goden wort ghenoemt, oock Rhea, Vesta, Ops,^* en Tellus, oft d'Aerde, was gheschildert met een cleedt vol cruyden en bloemen, op t'hooft een Cron van thorens, in de slincke handt eenen Scepter, in de rechter eenen sleutel, om bewijsen datse s'Winters ghesloten is, en datse in den Lenten de zaden en cruyden laet uytcomen. Haren waghen was van twee Leeuwen ghetrocken: op haren waghen waren gheschildert vier van haer historien. Eerst, daer de Vestaelsche Claudia t'Schip, daer Cybele in is, alleen voort treckt. Tweedst, daer sy Cybele wort ghebracht binnen Room ten huyse van Scipio Nasica. Derdst, daer sy in Phrygien wort besocht van Ceres. Vierdst, daer sy in Egypten vliedt voor den felle Reusen, en in Merle wordt verandert. By haer waren een deel ghewapende Corybanten.

* Cybele, de Aerde.