Het schilder-boeck

Van Timomachus, Schilder van Byzantium.

Timomachus was van de Stadt Byzantium, welcke Stadt door Constantinus herbouwt, werdt gheheeten Constantinopolis, namaels werdt sy ghenoemt Romeyne, van den Griecken Stimboly, en nu van den Turcken Stampolda, dat is, wijde oft volle Stadt. Hy was ten tijde van Iulius Caesar: want hy maeckte voor hem eenen Ajax, en een Medea, waer voor hy hadde 80. Talenten: welcke stucken Caesar dede stellen in den Tempel van de Moeder Venus, die hy hadde laten bouwen: Nochtans seght Marcus Varro, dat den Talent van Athenen dede sesthien duysent penninghen:Budaeus in zijn vierde

[fol. 87v]

Boeck, seght maer ses duysent. Hy maeckte oock eenenOrestes, die seer ghepresen worde, en een Iphigenia, die in het Procopiensche Tartarien Mannen offerden. Van ghelijcken maeckte hy eenen Lecythios, die den jonghen luyden leerde te Peerde rijden. Oock schilderde hy een gheslacht Edelluyden. Daer was ten tijde Plinij van zijnder hant een stuck, waer in waren twee met mantels op zijn Griecksche, die hun bereyden om te doen eenighe reden oft oratie, waer van den eenen was gheseten, en den anderen over eynde. maer boven alle stucken, soo schijnt dat de Schilder-const en de verwen hem hebben jonstigh en toegedaen geweest, doe hy schilderde den Schildt van Minerva, waer op hy hadde ghemaeckt t'hooft van Medusa, met haer slangich hayr. Desen uytnemenden Schilder hadde naer zijn doot naeghelaten een Medea, ghelijck Apelles zijn Venus, uyt der Zee climmende, als geseyt is: Dese sulcke stucken onvolmaeckt, waren onghelijck meerder in weerden, als die voldaen waren: Doch saghmen in dees onvolmaeckte Tafereelen de trecken, die daer op waren, en noch niet gheschildert, waer aen men sagh en bekende de meyningen en voornemens, van t'ghene sy maken wilden. Soo datmen, ghenuechte nemende in te sien die sonderlinghe beginselen, oock grootelijcx den Doot beclaeghde deser groote Personnagien.