Het schilder-boeck

Van Eumarus, Schilder van Athenen.

Het is te achten, dat desen Eumarus, Schilder van Athenen, is ouder als^* den verhaelden Bularchus, aenghesien te zijnen tijde de Const noch heel wanschapen en onvolcomen was, jae soo jongh en slecht, datmen de gheschilderde beelden niet en con onderkennen oft Mannen oft Vrouwen waren, daer desen Eumarus den eersten vinder van was, van die t'onderscheyden, also Plinius in zijn 35^e. Boeck, Capittel 8. vertelt, en dat hy oock d'eerste was, die alles wat hy sagh nae t'leven bestondt te doen.

* Eumarus, d'eerste die Mannen en Vrouwen tronien onderscheydelijck uytbeelde, en eerst alles nae t'leven dede.