Dat hooghe liedt Salomo, met noch andere gheestelycke liedekens

[p. 60]

[Wy bidden u Broeders, om Christi wille]

Op de wijse: Verstroyde. Pelgrims, etc.

Wy bidden u Broeders, om Christi wille
Neemt u selven wel waer,
Wandelt in vreden, vry van gheschille,
Maeckt al u saken claer,
Op dat ghy meught voorwaer
Als de dooden verrijsen,
Christum gaen te ghemoet,
Wilt u alsoo bewijsen,
Dat ghy meught verjolijsen
Met uwen Hooftman goet.
Weset voorsichtich als Serpenten,
Simpel als Duyfkens soet,
Vreest niet voor t'lijdens tormenten
In alle teghenspoet,
Als Christi Schaepkens goet
Volght u Herder ghepresen,
Weset hem onderdaen,
Hy was alsoo wy lesen,
Veracht end' seer mispresen,
Hoe soudt u beter gaen?
Siet op Gods woordt, end' willet vast ghelooven,
Op sijn beloften acht
Siet dat ghy u niet en laet berooven,
Met ydelheyt bedacht,
Gods woordt dat is u cracht,
Om mede t'overwinnen
In desen quaden tijdt,

[p. 61]

 

Dus met nuchtere sinnen

 

Volghet Christum uyt minnen,

 

Ende Wettelijck strijdt.

 

Godt hebt lief uyt all' uwe crachten,

 

V Naesten oock bemint

 

Ghelijck u selven, in al u ghedachten

 

De liefde heel versint,

 

Want wie liefde ghewint,

 

En daer in is ghetrouwe,

 

Laet Godt hem nemen niet,

 

Vrienden, voor het benouwen,

 

Wilt u in liefden bouwen,

 

Dat ghy t'oordeel ontvliet.

 

In u lampenoly der charitaten

 

Hebt nu in tijdts saysoen,

 

En wilt hem bystandt doen,

 

Soo Christus leden voen

 

In desen dieren tijde,

 

Op dat ghy hooren meught,

 

Comt ghy ghebenedijde,

 

Besitt mijn rijcke blijde,

 

Eeuwich met my verheught.

 

Om onsen druck wilt niet aflaten,

 

Maer u selven doorsiet

 

Van arbeyders, tot uwer baten,

 

Bidt soo Christus ghebiedt,

 

Op dat den wijnbergh niet

 

Vervalle end' verwilde,

[p. 62]

 

Die lustich stont ghebloeyt,

 

Volghet nu Christus bilde,

 

En met sijn gave milde

 

Sijn hout-hofkens besproeyt.

 

Siet over al nae goede lieden,

 

Der ghiericheyt vyandt,

 

Die door t'gheloove t'quade vlieden,

 

End' Goddelijck verstant

 

Hebben in't hert' gheplant,

 

Ghetrou in alle dinghen,

 

Onstraffelijck bequaem,

 

Om desen dienst volbringhen,

 

Sulcke die moghen singhen

 

Gods lof in Christus Naem.

 

En weest niet traech in u affeeren,

 

Maer de Mieren aenschout,

 

Hoe die cleyn dierkens haer gheneeren,

 

Vyerich den Tempel bout,

 

Gheensins en verflout,

 

Door luyheyt laet niet slincken

 

De balcken in dat huys,

 

Och broeders wilt hier hincken,

 

Zijt vyerich sonder mincken,

 

Soo wort ghy niet confuys.

 

Mijn broeders, wilt den Heere dienen,

 

Waer dat ghy condt oft meucht,

 

Bewijset als de wijse ingienen,

 

In u gheloove deucht,

 

Op dat ghy wort verheught,

[p. 63]

 

Als Godt alles sal loonen

 

T'goet doen dat hier gheschiet,

 

Verkiest men u persoonen,

 

Wilt uwe gave toonen,

 

Met Jonas niet en vliedt.

 

Vermaent end' straft d'onghemanierde,

 

Den cleynmoedighen troost,

 

Verdraeght den swacken, eert u faelgierde,

 

Al op u selven gloost,

 

Dat ghy met goet propoost

 

Vermaent tot allen stonden,

 

Op dat elck neerstich waeckt,

 

End' niemandt zy bevonden

 

Versteent in sijne zonden,

 

En soo Christus versaeckt.

 

Aldus broeders, voor een besluyten,

 

Wy bidden met ootmoet,

 

Wilt luyheyt, traecheyt sluyten buyten,

 

Volght ons begheerte vroet,

 

Dat ghy het beste doet,

 

Nae t'inhoudt van den brieve,

 

End' van dit cort ghesanck,

 

Ick waerschouw' u van grieve,

 

Mijnen Godt te ghelieve,

 

Neemt onsen dienst in danck.