Lamentatie behelzende wat datter aenmerkensweerdig geschiet is ten tyde van de Geuserie ende de Beeldenstormerie binnen ende omtrent de stadt van Brugghe

[p. 1]

[Lamentatie]

Aenmerkt hier naer.

Och beminden leser, hoort hier een drouvich beclach van de groote declynatie der Brugsche stede, die Zeeghere van Maele int leven sagh, oudt lxxxvij jaeren. Godt gheve hem vrede.

Noteert.

Dan sal de weerelt gheluckigh wesen als de wyse sullen regieren beginnen ende de coninghen, dan midts desen, sullen t'volck beginnen t'hebbene wyse zinnen.

Bedynghe.

O Heere Godt, bewaert voor philistinighe reusen,
Die u cleen hoopken, de Israelyten, quellen;
Laet doch int velt gheen bloet uyt gheusen;
Beschermt de catholycke, die uwen naem vertellen,
Daer Moyses ende David de slachordene stellen,
Omme alle tweedrachtige te vellen.

[p. 2]

Aucteur.

O Heere Godt, beschermt uwe christen kercke,
Die daghelijcx tweedrachtigh wert aenghetast;
Dat synen H. Geest de regierders stercke
Soo met woorden, oock leven metten wercke;
Sterckt Petrus schip-mast,
Eer d'onnoosele schaepkens, binnen aertschen perke,
Van bloetgulsighe wolven lyden overlast.