Den Lusthof der gheestelicke oeffeninghen

Van de ghene die de siecken besoecken.

VVat moet hy doen die eenighe siecke wilt gaen besoecken?

Ten eersten, Dencken dat het een werck is van grooter weerde, ende verdienste; ende dat hy Christum in den siecken gaet besoecken.

Ten tvveeden, Oodtmoedelick van Godt gracie begheeren, om den siecken t'sijnder salicheydt troostich te moghen wesen.

[p. 556]

Ten derden, Iet mede draghen, (heeft hy de middel) dat den siecken in sijnen tijdtlicken noodt soude moghen verlichten.

Ten vierden, Met groote liefde, ende versaken sijns-selfs ten huyse der siecken gaen, namentlick als't gheen besmettende sieckte en is: niet eer nochtans in de kamer treden, hy en verstae datter gheen belet en is. Dan sal hy den siecken vriendelick groeten: patientie, ende al dat hem salich is wenschen: een kort ghebedt voor hem doen: ende isser bequaemheyt, met den siecken van goede dingen spreken. Altijdt toesiende dat hy noch den siecken noch oock andere, die hem moeten dienen, en belette.

Ghebedt voor een siecken mans persoon.

ALder-saechtmoedichsten Godt, ende Heere, die met alle goedertierentheydt uwe creaturen zijt regerende: Wilt de oogen uwe ghenaden neder buyghen tot onse gebeden, ende bermhertelick aensien uwen dienaer N. die nu met sieckte bevangen is. Verleent hem salighe ghesontheydt nae den lichaem, ende volkomen sterckheyt nae de siele, tot verheffinge van uwe glorie, ende vermeerderinghe sijnder salicheyt. Door Christum onsen Heere. Amen.

[p. 557]

Ghebedt voor een siecke vrous-persoon.

ALmachtighen Godt, ende saechtmoedigen Vader: die lichtelick kondt, door de oneyndelicke kracht van v woordt, alle quellinghen der sielen verdrijuen, ende alle sieckten der lichamen ghenesen: gheweerdicht v ghenadelick te besoecken, uwe dienersse N. op dat sy tot haere meerdere salicheydt, door uwe bermhertighe hulpe, van alle quellinghen ende sieckten, haest verlost mach worden: ende volkomen ghesontheyt, van v, ontfanghen hebbende, uwen Heylighen naem, met danckbaerheydt mach verheffen, ende ghebenedijden, door Christum onsen Heere. Amen.