Den Lusthof der gheestelicke oeffeninghen

Het vierde
Dat noodtlick is, om den dach deughdelick ouer te brenghen.

Gheschicktheydt ouer tafel.

M|Anierlijck hem ouer tafel te draghen, is een van de besonderste dinghen, die alle Christene ouders hunne kinderen van ioncks moeten leeren, ende hen gansch hun leuen doen onderhouden, souden sy, hunnen Christelijcken roep, met goede seden, na de vermaninghe van den Heyligen Apostel, weerdichlick vereeren. Hier in wordt heden-daeghs groot ghebreck ghevonden, als veel Ouders, dies niet onderwesen zijnde, op de gheschickheydt hunder kinderen niet en letten, ende selue in hun eten gheen tijdt oft maete en houden. Om dese behulpsaem te wesen, ende als met de handt, tot de Christelicke gheschicktheydt in eten ende drincken, te leyden, sullen wy hier af besonderlick spreken.