Den Lusthof der gheestelicke oeffeninghen

[p. 21]

De tvveede Oeffeninghe om den dach profijtelick ouer te brenghen.

Wat sullen vvy doen, om den dach profijtelick ouer te brenghen?

OM deughelick ende profijtelick den gheheelen dach ouer te brenghen, wy sullen principalick vier dinghen onderhouden.

[p. 22]

Het eerste
Dat noodelick is om den dach deuchdelick ouer te brenghen.

Christelicke Conuersatie.

WY sullen ons in alle stonden, ende plaetsen, nae onsen Christelicken roep, als in Godts teghenwoordicheydt, ende soo't een oprecht kindt Godts betaemt, deuchdelick draghen:

Ende ten 1. Ons wachten van ledicheydt, quaedt, ende idel gheselschap, lichtveerdige t'samen-sprekinghen, onghereghelde manieren, ende al dat eenich schijnsel heeft van sonden.

Ten 2. Ons ghewennen daghelicks met deuotie Misse te hooren, iet goedts in eenighen gheestelicken boeck te lesen, selden ende niet dan door noodt, oft om deucht uyt den huyse te gaen.

Ten 3. Wy sullen, op dat onse conversatie hemelsch soude moghen wesen, ons ghewennen in alle plaetsen ende stonden, ende ter aller oorsaken, kleyne ghebedekens te gebruycken, ende die met vierigher herten, als brandende schichten, nae den hemel te schieten, om onse deuotie ende aendachticheydt tot Godt soo te vernieuwen, ende hem in alle sijne creatueren te louen ende te dancken: Voordts oock, ons goedt voornemen dat wy 's morghens ghemaeckt hebben, somtijdts (sonder dat iemandt bemercken kan) hernemen.

[p. 23]

Op deser voeghen.
Als vvy de pracht der vvereldt sien, vvy sullen segghen:

Idelheydt der idelheyt, ende al idelheyt uytgenomen Godt te beminnen, ende hem alleen te dienen.

Als vvy letten op der menschen boosheydt oft kranckheydt.

Wat is den mensche, o Heere, dat ghy hem ghedachtich zijt?

Als vvy iemanden eenich goedt sien doen:

Doet wel, Heere, den goeden ende oprechten van herte.

Als vvy iemanden sien sondighen.

Heere leert hem uwe wet: want hy en weet niet wat hy doet.

Als vvy eenighe recreatie nemen.

Heere bewaert mijn sinnen van alle idelheydt.

Als vvy eenich Crucifix sien:

Ghy hanght aen het Cruyce Heere voor my: ende ick soecke mijn ghemack.

[p. 24]

Als vvy de bloemen des veldts sien.

HOe heughelick is't in den hemel, als de bloemen ons soo vermaken.

Dit zijn al wercken van mijnen Godt: leert my, o Heere, van alles loven.

Om eenighe goede begheerte toe vernieuwen:

ICk begheere v, mijnen Godt, ghetrouwelick te dienen: voordert toch mijne begeerte met uwe salighe hulpe.

Heere wanneer sal ick v alleen smaken? wanneer sal mijn herte in v alleen rusten?

Spreeckt ghy alleen tot mijn herte Heere, ende laet alle creaturen swijghen: want ghy alleen mijn opperste goedt zijt.

Ghebenedijt mijn siele den Heere, ende al dat in my is sijnen heylighen naem.

Een suyuer herte schept in my, ende vernieut in mijn binnenste den rechten gheest.

O Heere, gheeft my een oodtmoedich ende saechtmoedich herte.

Leert my, o Heere, in alles, mijn seluen verloochenen, ende dat v alderbehagelickste is, altijdt verkiesen.

O Heylighen Gheest, rust in mijne siele;

[p. 25]

op dat ick eewichlick mach rusten in v.

Heere, maeckt dat ick v met eenen deuoten wille, ende oprecht herte diene.

Heere, doet my beminnen, al dat ghy beveelt, ende begheeren dat ghy belooft.

Heere, gheeft my, dat ic, die sonder v niet en mach, nae uwen wille mach leuen.

O minnelicken Iesu, gheeft my gratie, om v in alle deuchden na te volghen.

Suyuert, o Heylighen Gheest, mijn herte van alle sinnelicke liefde, bewaert mijn tonghe van onnutte woorden, ende mijne handen van onrechtveerdicheydt.

O Heere gheeft my gratie, dat ick mach weten, willen, ende doen, dat uwen Godtlicken wille van my vereyschende is, ende dat ick tot uwer glorie schuldich ben te doen.