Den hemelschen handel der devote zielen

Ter Nonen tijdt.

Weest ghegroet Maria vol van gratien. etc.

Vers.

GOdt merckt aen tot mijnder hulpe.

Antvv.

Heere haest u om my te helpen.

Vers.

Glorie zy den Vader, ende den Soon, ende den heylighen Gheest.

Antvv.

Als't was in den beginne, ende nu, ende altijdt: ende inde eeuwen der eeuwicheden sal wesen. Amen.

Alleluia, Oft: Lof zy u Heere Coninck, &c.

[p. 324]

Hymne.

V Vroom ghemoedt is wijt vermaert,

Ghy dwinght de hel en sonde:

'Thooft van 't serpent en boosen aert,

Vernielt ghy totten gronde.

Door uwe jonst maeckt ons bequaem,

Om Iesus wet te leeren:

En 'sduyvels listen, in sijn Naem,

Met baet, van ons te keeren.

Doet ons gheley door 'swerelts wout,

Op dat wy Godt eens vinden,

Ontsteeckt met liefd' ons herte cout,

En wilt ons aen hem binden.

Dry-vuldigh Godt in wesen groot,

In giften mildt en machtich:

Door Mariam, in allen noot,

Verhoort ons suchten clachtich. Amen.

Antiphone.

Schoon ende verciert zy-dy, dochter van Ierusalem, vervaerlijck als een gheordineerde heyr-schaer der Legheren.

Capittel.

Ick hebbe inde straten ghelijck wel-rieckende kaneel ende balsem-reuck ghegheven, ende gelijck uyt-ghekoren myrrhe, die soeticheyt des reucks.

Antvv.

Gode zy lof.

Vers.

Na de baringhe zy-dy een onbevleckte maghet ghebleven.

Antvv.

Moeder Godts weest voor ons een middelaersse.

Vers.

Heere verhoort mijn ghebedt.

Antvv.

Ende mijn gheroep kome tot u.

Ghebedt, om danckbaerheydt ende suyvere meyninghe te verkrijghen.

O Godt van alder hoochste Majesteyt, die Mariam sulck-een milde jonste bewesen hebt, dat

[p. 325]

sy door uwe boven-naturelijcke gaven, de weerdicheydt aller Enghelen ende Heylighen; ende door de kennisse der selver giften, en[de] danckbaerheyt, die sy u, voor die bewees, de kennisse ende danckbaerheydt van alle uwe uyt-verkoren te boven ghegaen heeft; soo dat sy in alle dinghen uwe alder-meeste eere sochte, ende voor de alderminste gave, die sy van u oyt ontfanghen hadde, met vyerigher herten alle de wijlen van haer leven u loefde ende diende: wy bidden u ootmoedelijck door u onghemeten behaghen in hare dueghden, dat ghy ons, alle onse onwetentheden, ende ondanckbaerheden ghenadelijck wilt vergeven, al wat ons ter salicheydt ontbreeckt, vervullen, ende claerder kennisse aller dinghen, die ghy ons ghedaen hebt, ende noch doet wilt verleenen: op dat wy oock u gaven naer hare weerde moghen achten, voor die u behoorlijck loven, ende met suyvere meyninghe in alles uwe meeste glorie soecken ende beneerstighen. Die leeft ende regneert in alle eeuwen der eeuwen. Amen.

Vers.

Laet ons den Heere ghebenedijden.

Antvv.

Gode zy lof.

Vers.

De zielen der gheloovighen moeten door Godts bermherticheydt in vrede rusten.

Antvv.

Amen.