Den hemelschen handel der devote zielen

Ghebedt van de heylighe kercke voor dese ghetijden.

ALmachtighen eeuwighen Godt, die uwe dienaers ende dienerssen in de belijdenisse des warachtighen gheloofs ghegheven hebt, de glorie der eeuwigher Dryvuldicheydt te bekennen, ende inde moghentheydt des Majesteyts, de eenicheydt te aenbidden: wy bidden u, dat wy door de volstandicheydt des selfs gheloofs, van allen teghenspoet altijdt beschermt moghen worden. Door Iesum Christum onsen Heere. Amen.

[p. 25]

Besonder liedeken van de heylighe dryvuldicheydt, uyt de voor-gaende lof-sanghen.

GOdt, die Dryvuldich zijt, en Een:
V goedtheydt is van al 't beghin,
Dat voor u wesen oyt verscheen;
Maer hoe? en vat gheen menschen sin.
O Vader ongheboren Godt!
O eeuwich Godts gheboren Soon!
O Gheest, van bey der minnen slodt!
Baent ons den wech tot uwen throon.
Ghy zijt schoon, heylich, mildt, en sterck,
In u verheught dat hemelsch hof:
V gheeft het dryderhande werck
Des werelts oock ghedurich lof.
V Majesteyt gaeat boven al,
O Vader, Soon, en heylich Gheest!
Houdt in u gaven gheen ghetal:
Leydt ons door die, tot uwe feest.
Wt u spruyt alle creatuer,
Ghy, watter is, in u vervaet:
En zijt in al doch even puer;
Elck gheeft u lof na sijnen staet.
V looft en dient dat aertrijck groen,
Het vyer, de locht, en wijde zee:
De vruchten, elck op haer saisoen;
De visschen, voghels, al het vee.
Tot u, o Godt, ons sinnen keert;
Aenhoort 't gheschrey van onsen grondt,
V gratij over al vermeert,
Regeert ons herte, wil, en mondt.
Ontfanght, o hemelsch medecijn,
Wt noot en liefde, dit ghebedt:
Maeckt dat wy altijdt willich zijn,
Om t' onderhouden uwe wet.
Comt Godt, zijt onser zielen rust;
Maeckt haer in alle deughden schoon:
Van d'aertsche vreught treckt onsen lust;
Weest ghy alleen, ons eynd' en loon.