¶ Uanden slotelen.
HEt is vrijlic der grootster plaghen eene, die doer Gods thoorn ouer die ondancbare werelt gegaen is, dat dat gruwelic misbruyck ende verkeert verstant der lieue sloetelen die ouerhant genomen heeft, dat schier aen ghenen hoeck der werelt dat rechte ghebruyck ende verstant gebleuen is. Ende die misbruycken zijn doch soe grof ende tastelick, datse haest een kint mercken soude dat spreken ende tellen geleert hadde, soe stijf hebben alle geestelike ende geleerde geslapen ende ghesnorct, ia stockeblint zijn sy geweest. Daer omme wil ick hier met Gods hulpe ende ghenade die somige van sulcke misbruycken aen tlicht brenghen, ende als Christus seyt, sulcke argernissen wt sinen rijcke helpen versamen, daer mede onse nacomers sien connen, hoe het inder Christenheyt ghestaen heeft, ende van die tijt voort hem voor sulck een iammer te wachten weten, ende die sloetelen recht kennen ende wel gebruycken leeren. Want aen deser kennisse is vele geleghen om ontallijcke gruwelen te voorcomen ende te scuwen.
Auteursrechtvrij