Wat Limbörg heet en wèlt behawwe

[p. 21]

Ich sjtoung bie Zie kruuts......

Ich sjtoung bie Zie kruuts
Aanne linjelaan
En ich zaag nao Zie leid
En ich sprook Hem aan:
Waat hingste dao blouêt
Aan die kruuts en allein; -
Waat hingste dao douêt
In den douêt es 'ne sjtein!
Wem hïët Dich dae krans
Om Dïën huiet gedaon
Dich mèt henj en veut
Aan det kruuts geslaon?
Dien haor hingtj vol drek
En Die lief nog vol bloot; -
Zèk waorste gek
Vuèr die volk of te good?
Waat vöngste toch aan,
Want Dien hert is gewondj?
Waat kwaod deei Dien hert
En waat leid Diene mondj?
Toen zagter bedreufdj -
- En Zien hert zaag ich slaon:
‘Dit höbbe ouch kinjer
Van Limbörg gedaon.’

(Jac. Schreurs M.S.C.)

[p. 22]

Veer wèlle behawwe:

Eus persessies en us neet sjaome
Um mèt te trèkke in d'n ierestoet
Veur Häöm, dee zeegenend trèk
Langs de straote.
Laot daan de hèllige, die bij us toes
Stoon op kaste of kemoot,
Geseerd stoon in eus deure en vinsters;
Laot daan de kunstige figure
Vaan zand en blomme
De weeg verseere boe Heer langskump.

Veer wèlle behawwe:

Eus broonk in de Limbörgse plaotse,
'n Oetjubeling vaan Limbörgse blijheid,
'n Daankfees veur de gever vaan alles,
'nen Triomftoch vaan de mächtigen triumfator
Dee keuninge en dictators kin vergruzele
Oonder de nagel van Ziene pink,
Wie e grummelke vaan de krentemik
Die mèt de kèrremesbroonk
Apaart op taofel lik.

[p. 23]

Veer wèlle behawwe:

In eus kinder:
Eus bruudsjes,
Eus herderkes,
Eus päöterkes,
Eus ingelkes,
Die vaan gekleurd papier
En veerse blomme
Struisel make,
En veer vraoge:
Laot hun gaon
- Es God b'leef,
En 't good is veur hun, -
Zoonder teväöl deun
Op roeze door 't leve.