Christelijcke plicht-rymen om te singen of te leesen
(1648)–Cornelis de Leeuw–
Auteursrechtvrij
[pagina 220]
| |
Zangh: De Liefde voort ghebracht.
BY een recht ned'righ hert
Gheen hoogheyt wert ghevon- den
Van hem gevloden wert
Die schadelijcke son- den.
Hy buygt sig onder God
Sijn opperhooffdig Heere
En volghens sijn ghebod
Gheeft hy sijn naesten eere, sijn eere sijn eere, sijn ee- re.
2 Schoon hy in hooghen staet
Is boven veel verheven
Daerom hy niet en laet
Ootmoedighlijck te leven.
| |
[pagina 221]
| |
Sijn groote heerschappy
Hem selven niet doet achten
Meer dan hy waerdigh zy.
Sijn ampt sal hy betrachten,
Betrachten, betrachten, betrachten.
3 En of hy gaven heeft
Die waerdigh sijn om prijsen,
Dat hem gheen steunsel gheeft
Om selfs die aen te wijsen;
Hy swijght, op dat hy niet
Door eyghen loff te smaden
En schijne, die gheniet
Van Gode min ghenaden, ghenaden ghenaden, ghenaden.
4 Hy doet sijn wercken niet
Om menschelijcke eere;
Maer om dat sulcx ghebiet
Sijn eenigh Godt en Heere.
Al wert hy niet ghegroet
Mijn Heer, in Huys en weghen
Hem dat gheen hertseer doet
Als weynigh aen gheleghen, gheleghen, ghelegen, gheleghen.
5 Hy door ootmoedigheyt
Sich minder acht dan and'ren,
Schoon sy in slechtigheyt
En armelijck hier wand'ren.
Hy eert niet die alleen
Die boven hem uyt muyten
In staet; maer oock die gheen
Die wy van eer, uytsluyten, uytsluyten :/: :/:
6 Hy yder mensch bemint
En lieft, hoe wel verschooven,
Hy heeftse wel ghesint,
En meer, soo sy Godt loven:
Dewijl hy weet, dat sy
| |
[pagina 222]
| |
Gods schepsels en sijn kind'ren
Sijn, alsoo wel als hy.
Gheen armoe kan dat hind'ren, dat hind'ren, dat hind'ren.
7 Met lijdtsaemheyt hy draecht
Dat menschen hem versmaden;
Als hy sijn Godt behaeght,
't Kan hem aent 't heyl niet schaden.
Voor 's Heeren oogh hy leeft,
Die alle, die hem vreesen
De kroon des levens gheeft,
En haer in vreucht laet wesen, laet wesen, laet wesen, laet wesen.
8 Nae hoogheydt hy niet tracht,
Hoe seer ghesocht op Aerden.
Wert hem die t'huys ghebracht,
Hy macht en sal 't aenvaerden,
Als van Godt inghestelt
En Christi Wet niet teghen;
Doch om sijn Aertsch ghewelt
Sal hy gheen hooghmoet pleghen, moet pleghen, moet pleghen, moet pleghen.
9 Nochtans hy niet versmaet
Den Gheest van Godt verkreghen;
Die waerdigh by hem staet:
Hy spreeckte nimmer teghen.
Hy salse wenden aen
Tot meerderingh van deughden,
Op dat hy naemaels gaen
Mach seecker in Gods vreuchden, Gods vreuchden, Gods vreuchden, Gods vreuchden.
|
|