Theatrum stultorum

[p. 149]

Coronis.

ETjam tempus adest Fatuam suspendere avenam,

Quae Fatuo haec cecinit carmina nexa stylo.

Omnibus in rebus modus est servandus: abundè

Stultitiae nunc est, Musa Jocosa, datum.

Otia Ridiculae deposcunt saepè Camoenae,

Quicunque interdum desipit, ille sapit.

Desipere assiduò, vera est dementia; Stultus

Fit citò, qui semper carmina Stulta canit.

Quarè fert animus Fatuis valedicere metris;

Nè citò stultescam, Ludicra Musa sile.

Intereà veniam Fatuo da, Lector Amice,

Carmina si crebrò forsan hiulca legas.

Carmina si volvas lacrymantibus edita Musis,

Viscosa, inculto metra ligata pede.

Namque (fatebor enim) solet insanire Juventus,

Dum praeceps mandat singula scripta typis.