Un selekshon di palabra i ekspreshon. Deel 2

Bistimentu

Paña, flus, bistí, shimis	Saya, blusa, brasièr
Zjilèt, kòl, lapèt	Mea, liga, sombra
Karsonsiyo, blumer	Bistí manera un kondená
Kamisa, karson, faha, furu	Kue midí, pas shimis o flus
Dashi, yapon, pidjama	Hoga un hende
Lensu di kabes, konoskát	Kastol ku ròk
Shal, bachi di kòrta puya	Frèskòt, peluka
Yu-be-londri, gyèl	Bon pegá, saku di oloshi
Solapa, manga	Sneiru, kosedó

E mucha a krese; su pañanan a bira chikitu p'e. Flanèl, karsonsiyo, saya i blumer ta paña di abou. Na kuminsamentu di desember hopi hòmber ta kumpra nan flus di Pasku. Kon ta ku bo?': Ai, wanta riba furu di mangu'i zjilet. Ora un yònkuman ta bai flesta e sa pone un tòpi di flor na su lapèt. Ya Felipitu a baha karson kaba (el a krese i e ta bisti karson largu). Kamisa ta mas yegá ku saya.

Tin paña furá i hende furá. E último ta e animal bestia ku a bai Haiti i

[p. 44]

tira su plaka afó pa un ‘furu’ di hasidó di brua proteh'e kontra tur kos malu. Un karson di bari kaya ta un ‘bell bottom’. Chines tin wowo di konoskát. Un bachi ku sples patras, ta bachi di kòrta puya. Ningun hende no sa pakiko ta yama e doblá abou na pi'e karson ‘yu-be-londri’. Hòmber i muhé sa uza faha indjan (faha di Wairi) pa faha kustia i pa traha ku mas fasilidat.

Zamba ta pasa sket! (bo saya ta pasa). Un sinónimo chistoso pa brasièr ta hamaka di tete, i ora e ta hopi grandi un lèngu. Kuantu be un breit no a subi altá ku su shimis sin kaba, i tur na feneta, pasobra kosedó a hogu'e (keda sin kaba su bistí na tempu). Na okashon di gala ta bisti kastol ku ròk.

Awor ku tur hende tin oloshi di man, saku di oloshi (djis bou di faha di karson) a bai fo'i moda. Ainda tin algun hende bieu ku tin oloshi ku lontina (kadena); e oloshi ta bai den sak'i bachi ariba na man robes i e lontina ta pegá na lapèt. Morto chikí den kaha grandi (un persona den un flus o shimis ku ta muchu grandi p'e).

Awe b'a bisti manera hende (desente, korekto). Makaku bistí na seda, makaku e ta keda. El a keda tur afó (nèchi bistí) den su flus. Paña no ta hende. E pantomina ku e muhé a hisa buta riba su kurpa a lagu'e keda manera un wantomba (ridíkulo). Un dòria pegá. Obensio a bisti un dash'i pushi pa drecha su tipo. Awor si el a hinka su kurpa den un kamisa di onsenbar (den difikultat grandi). Esei ta su bòm di baul (e uniko flus o shimis ku a ked'e).

Perul a bisti su shabrak (mihó flus), p'e bai kore Pasku. Bistí manera un keke (nèchi bistí). Fransinet ta ko'i kologa na orea (bon kuidá i bon bistí). Paña pretu no ta rou (apariensia ta mintira). Despues ku Arturito a bringa na skol, su mener a kaska su ròk (sut'e o dun'e un bon skual). Na fiesta di kasamentu Pablo a tira un diskurso di kita sombré (fantástiko). Felesita tin mas trastu ku paña bieu (lembelansa, chupadó).