Un selekshon di palabra i ekspreshon. Deel 1

[p. 48]

36 Tempu, aña

Mi entrada anual (pa aña)	Nos ta biba den siglo binti 200 aña P.K. (promé ku Kristu)
Kada dia pasa	Luna, kinsena, siman, dia
Siman ariba (siman pasá)	Den tempu medieval
Hubentut, behes	Temp'i aña
Ku su seis aña el a bai skol	Den temp'i Pasku ku Aña Nobo
Bira mayor di edat (mòndu)	Ora aña bòltu
Un mucha bow di edat (menor di edat)	Den futuro
Dia di mi aña (dia mi hasi aña)	Durante (den) último tempu
	Selebrá aniversario di Emansipashon.

Un aña interkalá tin 366 dia.

Tin un tempu será, shelu ta skur.

Kayanan di Punda ta bira manera nèshi di vruminga den tempu di Pasku ku Aña Nobo.

Hopi hende ta bai tuma bindishon di obispu djis despwes di ‘tiru’. Asina temp'i awa dal aden kunukerunan ta kuminsá planta maishi. Bestianan na mondi ta pasa hamber den temp'i sekura.

B'a pèrdè tempu. (Bo mester a hasi e kos ei mashá dia kaba)

Aña sin bièrnè. (Nunka).

Kon tempu? (Ki notisia tin?)

No papia mal'i aña promé k'e kaba. (Warda aña pasa promé bo papia malu di dje). (No pensa malu prome ku bo ta kompletamente na altura di loke a pasa. No desespera lihé, spera ku pasenshi)

Bo tin bon tempu! (Bo n' tin nad'e hasi!)

Loke no pasa den un aña, ta pasa riba un dia. (Si algu no a pasa nunka no ke men ku e no por sosodé)

Kiko dia ta bisa? (Ki notisia tin?)

Rib'un bon dia lo bo mira kiko ta sosodé. (Kwalke dia den futuro....)

Na fin di siman: djasabra.

Den (na) kabament'i siman: por ta djaweps, djabièrnè o djasabra.

Kada dia tin su nòmber. (No ta tur dia ta meskos. Kos por kambia di un dia pa otro)

Nos bida ta kore pasa manera un kwenta ku nan ta konta.

Piskamentu ta Djo su bida largu. (loke e ta gusta mashá)

T'asina bo ta buska bida, anto bida ta buskabo. (Hopi be un hende ta muri mientras e ta traha pa biba, buska bida).

Promé di aprel ta dia di gaña.

Tempu ta baha gastu. (Tempu bal plaka).

[p. 49]

Si bo kwe as tur dia, bo ta pèrdè temp'i piska. (Si bo sinta tete tur dia, sin yega na un desishon, bo no ta hasi nada positivo).

Tanten ku nochi n' sera, kareda di biná n' kaba. (Mientras tin bida, tin speransa)

T'awor mes t'aworó! (Hasi bo deber mesora, sin pèrdè tempu).

Dia bo n' bari, ta bini hende ku bo n' spera. (Dia menos bo pensa, bo ta hañabu ku problema).

Ta yega un dia ku buriku ta kansa di karga. (Ta yega un momentu ku un hende no por wanta mas).

Mal aña di kabritu ta bon aña di kachó ku warawara. (Ora kos ta malu pa un, e ta bon pa otro).

Na Yanshi su kama di behes, sarampi. (Awor ku Yanshi ta seka di baha pa sawaka, e ta hasi ko'i chabalitu, namorá, tira flor).

Djo ta manera kangrew; temp'i awa so e ta sali. (E ta un hende ku solamente na okashon espesial bo ta mir'é).

Fo'i temp'i kowchi bowlo. (Mashá hopi tempu pasá).

Laga kwenta pa ocho dia! (Warda bo istoria largu pa ‘ocho dia’, pasobra ei tin tempu na kantidat pa papia bai gol).