Seis aña kaska bèrdè

[p. 52]

Fort Amsterdam

Un tempu nos ku ta soltero a drumi den Fort Amsterdam, tras di loke tabata Postkantoor bieu. Pariba di nos tabata keda e muraya di Fòrti ku ta duna pa e plenchi di Warda di Punda. E otro un banda tabata duna pa Waterfort.

Mucha muhénan di Postkantoor tabata pasa momentunan di plaser ora sirena di alarma pita. Nos tabata lanta, kore sali mitar bistí, pa bai okupá nos puesto riba e branspùit na Warda di Punda. Den purá a sosodé hopi be, ku un polis a sali na pidjama, ku su karson di unifòrm na man. Otro tabata bende barata, ku kil di karson habrí. Tin ku a sali asta na karsonsio. Mester a kore mashá purá, pa subi branspùit. I e galiñanan tabata putri di harimentu.

Pepito tabata e figura mas interesante den Fort Amsterdam. E tabata makamba. Pero e nòmber Pepito tabata nòmber di kariño ku un embra den Punda a dun'é.

Por sierto Pepito tabata biba ku tal embra. I komo e amor den nan dos tabata sumamente fuerte, Pepito tabata keda drumi serka su pida kos. Ma tabata prohibí pa drumi afó. Vários be sergeant o majoor tabata bin kontrolá ku nos ta na kas. I milagrosamente semper nos a logra na salba otro.

Un dia mainta tempran nos a pasa un sustu. Majoor a drenta mas o ménos seis or di mainta i kuminsá pasa den e diferente kambernan. Pepito no a yega ainda. Dos di nos a start un kòmbersashon masha largu ku e majoor, pa want'é mas tantu posibel.

Nos no a mira ora Pepito a drenta. El a pasa di parti patras, kita su kamisa, sali na flanèl riba majoor. Su kabei tabata bon peñá, tur na pomada i perfume.

[p. 53]

‘Mogge, majoor’, el a saludá ku kara seku. Nos a deseá mil deseo, ku e majoor lo no a ripará ku ta imposibel pa un hende lanta for di kama ku kabei bon peñá.

Majoor no a nota. I Pepito a bolbe skapa un kayente di sèl.

Kruel ta loke un [hende] a hasi den Fort Amsterdam. El a haña un kachó chikí di regalo. Pero e no tabata gusta e kachó. Riba un mainta el a tene schietoefening riba e kachó, ku e balanan ku el a kue ora di ehersisio na Hato.

E pober kachó a bula i grita, sigun bala tabata kue su kurpa. Ta bon ku e pober a muri mesora, sin sufri hopi. Mariniernan den Waterfort a kore sali, pa mira ta kiko. Despues ku nos a grita, splika nan, nan a bolbe bai.