Seis aña kaska bèrdè

[p. 9]

Entrada

Den Seis aña kaska bèrdè Pierre ta relatá nos e periodo di su bida komo polis militar durante Segundo Guera Mundial. El a traha na diferente warda, tantu na Kòrsou komo na Boneiru. Den un lenguahe krudo, di mundu di hòmber, e ta rekordá suseso i anékdota di su servisio militar, i asina salbaguardiá un pida interesante di nos historia ku di otro manera lo a bai pèrdí.

Den revishon di ortografia a opta pa laga ortografia di e términonan militar i atministrativo na hulandes, manera Pierre a skirbi nan - maske algun di nan a bira papiamentu entretantu - pa ilustrá predominio di hulandes e tempu ei, entre otro den mundu militar. Promé bes ku ta usa un palabra na hulandes ta kursiv'é.

Por ta ku algun sitio o negoshi ku Pierre ta menshoná o deskribí den e obra no ta eksistí mas o a muda. Den e kaso ei tambe a laga e teksto intakto komo ta trata di deskripshon naturalista di e époka. E lenguahe realista, un tantu brutu, kisas por pone algun hende sera kara, pero e ta produkto di e mundu militar di hòmber entre nan.

Pierre a sugerí pa estriktamente hende grandi, mayor di edat so lesa e buki. Ku kambio di tempu i pensamentu, posiblemente hóbennan di poko ménos ku 18 aña tambe lo por les'é, sin ku mester konsiderá esei un ‘krímen’.

Den e obra Wuiven vanaf de waranda¹ di drs. Junnes Sint Jago tin deskripshon minusioso di bida di e personanan ku durante di dos guera mundial tabata interná den un kampamentu na Boneiru.

Seis aña kaska bèrdè tin un kapitulo basta ekstenso dediká na e tempu ku Pierre a pasa na Boneiru komo polis militar. Danki na Archivo Nashonal nos ta publiká algun portrèt di bida den e kampamentu.

Den e obra Wuiven vanaf de waranda, e outor drs. Junnes E. Sint Jago ta amplia riba un suseso ku Pierre Lauffer ta komentá den Seis aña kaska bèrdè.

1 Wuiven vanaf de waranda, de interneringskampen op Bonaire en Curaçao tijdens WO-II, drs. Junnes E. Sint Jago, Imprenta Atiempo, Amandelweg 73, Curaçao, N.A.

[p. 10]

Ta trata di un di e intentonan di huida di kuater di e hòmbernan interná. Sint Jago (pág. 118, kapítulo 5.6) ta skirbi, i mi ta tradusí:

‘5.6 Di chiripa e polisnan na warda ta skapa kastigu Dia 13 di sèptèmber 1941, di 9 or pa 10 or di anochi, brigadier Bakker i infanterist eerste klas Lauffer tabata enkargá ku e pòstnan di vigilansia na parti sùit di e kampamentu.’

I na página 119 Sint Jago ta komentá ku Pierre i su koleganan polis militar a skapa nan peyeho na wowo di angua. Prueba es ku, pa splika ku nan tabata inosente den e kaso akí, nan (lo) tabatin mas problema ku loke investigadó di e kaso, eerste luitenant Geert-Jan Botterweg, a splika e hefenan mas haltu e suseso. Hasta gobernador i otro altu mandatarionan a bula bai di Kòrsou pa Boneiru e siguiente dia kaba pa mira si lo mester a kastigá kualke polis ku no a kumpli ku su deber. Pero ningun hende no a haña kastigu.

Nos Fundashon ta agradesido na sra. Prescila (Chila) de Haseth-Bolivar pa su trabou di teip henter e buki, koregí faltanan ortográfiko i eror tipográfiko. Atmiradornan di Pierre ta konosí ku Pierre su uso di variante. Pa esnan ku ta les'é pa promé biaha, Chila a kompilá, samsam ku nos sekretario, Lucille Berry-Haseth, e vokabulario ku tin na final di e buki. Den dje nan a inkorporá diferente variante, ku nan nifikashon, i tambe nan a aklará palabranan ku pa algun lektor kisas ta ménos koriente.

Publikashon di e obra akí a bira posibel danki na e sosten finansiero ku nos a risibí di señor Henry (Boebsie) van der Kwast, direktor di Maduro Holding LTD.

Pa un fundashon ku ta funshoná eksklusivamente danki na miembro ku ta hasi tur kos pa amor pa papiamentu, e yudansanan akí ta nesesario i bon biní. Danki na nan nos por sigui produsí obra pa duna Pierre Lauffer póstumamente e honor ku e ta meresé i rekonosementu pa loke el a hasi pa nos lenga en general i pa literatura papiamentu en partikular. Pa demostrá e amor ku Pierre tabatin pa Boneiru i su hendenan, ata un poesia den kua e ta profesá e gran amor ei.

[p. 11]

Lo mi bolbe

 

Bou di ala di flamingo rápido

 

Laman ta karisiá bo den kustia,

 

Ripitiendo su eterno melodia

 

Suavemente ku murmuro tímido.

 

 

 

Mester ta un amor mashá sinsero

 

Paranan a sinti pa bo humildat.

 

Ku nan a basha na gran kantidat,

 

Bin dòrna bo sekura altanero.

 

 

 

Riba bo, Bonaire, pa mi ya ta sufisiente

 

Di por biba den olvido i na pas,

 

Lagando e trankilidat di bo ambiente

 

Penetrá mi pokopoko mas i mas.

 

 

 

Lo mi bolbe atrobe na bo playa,

 

Na bo kosta, den bo mondinan.

 

Lo mi bolbe i kamna soña den bo kaya,

 

Bo sabana i bo saliñanan.

 

 

 

Lo mi bolbe. Mi n' por ninga kòrda

 

Kon b'a graba ku sonrisa di bondat

 

Bo nòmber den mi pechu i sinta bòrda

 

Den mi alma bo mes marka di fieldat.

 

 

 

Lo mi bolbe. Bo yamada ta grita mi

 

Unda leu ku mundu por tira mi.

 

Lo mi bolbe semper atrobe den bo brasa,

 

Laga mundu grita, laga tempu pasa.

 

 

 

Pierre Lauffer den:

 

Njapa, 1961; Ñapa 2006, Kòrsou

Na nòmber di Fundashon Pierre Lauffer

Sidney M. Joubert, presidente

Willemstad, Kòrsou.