Raspá

[p. 31]

Mi lenga

Mi lenga,
Den nesesidat salí
Fo'i alma di aventurero,
Kultivá na boka di katibu,
A baj drecha su pará
Den kwentanan di jaja.

Su kurashi sin keber
- E márka brutu di su nasementu -
A butele rementá busá
I fórsa di su gan'i biba
A lant'e di swela
Den un warwarú di pusta-boka.

Su kantika tin kandela
Su simplesa tin koló.
Ku su wega di palabra
Mi por 'nabo bo sojá
Ku su ritmo i su stansha
Mi por sinta namorá.
Na mi lenga di kriojo,
Ku su zjètu di zonidu
No tin dwele ni legría pa herami,
Ni tin sort'i sintimentu
Ku mi n' tribi machiká.