Raspá

[p. 23]

Tili komo tala

Tempu ku mi tabata biba bisinja di Martins, ta tur santu dia mi por a tendele rébusak su senjora, pasobra e muhe ta blè-blè ‘ra-ka-ta-ka-ta-ka-ta-ka’ sin guli skupi. Pero ni maske Martin balja keke, mi no por dunele rason, ku ta muhe so ta papja manera lora. Pasobra den siman ej m'a para pèrdè mi tempu, pa mi tende e mes Martins ej ku un otro gengu para machiká un kòmbrsashon sin pia ni kabes, pariba di shap di Arturn Gordo.

Martins, ku su karson lastrando na swela i su kamisa fo'i karson, tabata blo tete riba su pianan, manera nabegante na bordo di barku, mjentras e tabata splika su parna: ‘O kompaj...... mi di no...... Bo ta tendemi no kompaj...... mira 'ki...... maske bo sa ki mi ke men...... ma ta bon pa bo tende...... bru sa...... ta kos ku bru no por jega na kere...... si...... ma t'asina mundu ta...... ta moda mes no tin...... pero ami sempr ta sigui konseho di mi bjewnan...... ahan...... pesey manera bo ta mirami aki...... no kompaj...... no tin répito..... b'a komprondemi no kompaj?...... ta pesej un hende mester skucha...... p'e sa...... pa su selébre traha...... pasobra mundu ta keda mundu...... ken...... anto hende ta keda hende tambe...... ata kos di tene bon na sintí...... ma bon...... pesej ni maske mi mama difuntu dal abòw brágadam fo'i shelu mi dilanti awor aki...... ami ta hòmbr di un palabra so...... i ora mi bisabo un kos...... t'asina ahan...... no tin hende bibu na mundu pa strobami papja loke mi ta kontabo...... pasobra mi sa kiko mi ta papja...... i ta pesej mi por para riba mi palabra...... sin ningun hende por bisami ku mi ta ganja...... b'a komprondemi no?’

[p. 24]

Tur e ora ku Martins tabata bati baj ku su istorja sin fin, e otro kabajero, ku su wowo kòrá manera piská ku a pasa ora, a keda skucha ku kabes abòw, mjentras su pianan tambe tabata tira algun paso kompliká di un dansa alkohóliko. I su uniko komentarjo riba Martins su splikashon a sigui resoná den mi kabes, sigun m'a kamna baj, laga nan: ‘At'e...... se...... b'a papja...... asina...... at'e...... se...... b'a papja.... asina...... at'e......’

Mas anochi, ora m'a pasa baj sine, ainda e dos tiponan tabata hala kakinja ketu baj. E uniko diferensha tabata, ku enbes di para balja riba nan pia fófo, tur dos a kaj sinta plat abòw kóntra di muraja dje shap. Te ora mi tabata basta lew lew fo'i nan, ainda mi por a tende e refran sin stansha: ‘At'e...... se...... b'a paja...... asina...... at'e......’