Mi lenga. Deel 1

[p. 39]

Di djes les

Ma ora solo ku luna lagabo pasa
bini bèk bo tera - bo n' skapa:
B'a bira mitar hende mitar strañeru -
Un di bo wowonan ta mira funchi
i e otro ta mira batata -
ma ni un di nan dos bo n' gusta.

Den anochi bo ta soña, spanta,
spyèrta kere ta den snew bo ta -
pa mainta bo lanta pápa sodá,
pasobra ta den fòrnu b'a drumi.

Si bo bay Hulanda bini bèk,
bo ta keda semper un barku mal mará,
ku ki ora ku ta por ranka bay -
ku hopi hende ma sin amigu,
ni kamind'e bay - pasobra
ni un kaminda bo n' ke keda.

Anto dal man na kabes si bo ke
i grita yora: B'a kondená bo mes
ku tur studya ku b'a studya.

Ma sigi purba. No desesperá,
benta bo kurpa na awa. I si ta
sa mes bo n' sa mas kiko hasi:
Anto dal man na obra i grita hari.

(Di ‘Ta amor so por’, Frank Martinus).

Frank Martinus ta un di esnan ku a ‘biba den dos mundu’, loke a pasa hopi Yu di Kòrsow. Tin ku a keda ku e rekwèrdo fwèrte di Kuba, San Dumingu, Panama, Porto Ricu i Hulanda.

Ma ora ku solo ku luna lagabo pasa...... Aki e owtor ta uza un di e kantikanan di mucha: ‘Luna ku solo, lagami pasá......’

[p. 40]

B'a bira mitar hende, mitar strañeru...... Mitar hende (pa via di studyamentu), mitar strañeru (pa via di a kustumbrá poko na otro pais).

Un di bo wowonan ta mira funchi...... Kisas aki tambe e owtor a pensa riba e kantika: Albert'i shon Rika Tuturchi (Un wowo ta mira tomati, un wowo ta mira siboyo). Kestyon ku tin e ker a demostrá ku su kurason a parti na dos, un pa batata (Hulanda), un pa funchi (Kòrsow).

Solo a sali Djan na Montaña (drumi, pèrde ariba, pèrdè San Gwan).

Solo ku sali tempran, ta drenta tempran. (Mucha ku bira hende grandi prome ku su tempu, lo kaba prome ku su tempu tambe).

Kwe solo. (Pa bo kurpa drecha o pa kita soño ku dwe di kurpa).

E mucha ta masha solo birá. (E ta kambya di un ora pa otro).

Solo di guma. (Solo fwèrte, sin byentu, bon pa guma paña).

Luna ta kargá. (Tin un sírkulo rondo di luna, un señal ku nos por spera awaseru).

Luna ta bari. (Ta parse ku e luna ta bari, sigun e nubyanan ta drif pasa bow di dje!)

Kara di luna. (Kara hanchu).

Luna ku solo ta bringa (Eklips).

Ata luna nobo! (Ora un hende blo despwes di hopi tempu).

E hòmber ei parse luna kla. (E ta un sokete malu).

E stima e mucha manera su pret'i wowo. (masha).

Mi wowo ta balya (temblamentu na wowo).

E ta mirami ku su rab'i (kant'i) wowo.

Hinka man den wowo di Dyos. (Keha sin motibu).

El a keda wowo so. (Flaku, seku, morto di hamber).

Bon wowo mir'e. (Esaki ta bisa den kaso di mucha muhe hoben).

[p. 41]

Den dos man funchi no por sali pápa. (Dos hende por mas ku un so).

Bo mester kome mas funchi. (Pasobra bo ta flaku, debil).

Un funchi, un giambo. (Tira un pyeda plat den laman, di moda ku e ta salta varyos be).

Pega soño, bay un soño, morto na soño.

Soño ta ruman di morto. (Parse morto).

Esei ta soño seka morto. (Un diferensha grandi).

Pèrdè soño na kabes, busk'e na pia. (Despwes di kontratempu i mal swèltu, hasi formalidat).

Saka soño, despwes di un fyesta te mardugá grandi.

Fòrnu di pan, fòrnu di kalki, nanish'i fòrnu.

F ta bira H: Un kamber será ta hole hòrná).

Barku mará no sa gana flete. (Si bo drumi, bo no ta logra nada).

Kada barku wanta su bela. (Kada ken solushoná su mes asuntu).

Barku chiki tin bodega hundu. (E ta parse chiki, pero e tin aden).

Pega barku. (komete eror).

Barka hende, keda tera. (Hasi kos di bobo).

Bistí manera un kondená. (Di luho) (manera Luangu).

Ku tur studya ku b'a studya.

Si ta sa mes bo n' sa.

E yega ku el a yega.

Ta bay mi ta bay awor aki.

Sak'e pafo.

Sedu di awa.

E forma pleonástiko aki tabatin na Spañó den prinsipyo di siglo XVII, i na San Dumingu tambe.

M'a mata e kakalaka morto-morto. (Na San Dumingu: Lo maté muertecito!)

[p. 42]

Ehèrsisyo

1.	Si un hende drumi, pèrdè ariba, nos ta bisa: Solo ......
2.	Ora tin un sírkulo rondo di luna, nos ta bisa: .........
3.	Un hende ku ta keha sin motibu, ta ‘Hinka ............
4.	Si un kamber keda será hopi, e ta hole ..................
5.	Tin ‘pan di mashin’ i ‘pan .............................. (esun trahá na kas).
6.	Un hende ku bay un fyesta i keda lantá te den marduga grandi, kasi sigur ta drumi ..............................
7.	Un sleym di soño ta meskos ku un ‘............ di soño’.
8.	Despwes ku un hende tabata malu hopi tempu i ku el a bira flaku, kasi kweru ku wesu, nos ta bisa ku el a ‘keda ........................ so’.
	Splika ku bo mes palabra pakiko nos ta uza e ekspreshon aki.
9.	Un diferensha grandi ta: ‘Soño ...........................
10.	Si un hende ta flaku, debil, nos ta bis'e: ‘Bo mester .......................................