Mi lenga. Deel 1

(1970)–Pierre Lauffer– rechtenstatus

Di ocho les

Komo Ma Yana tabata bay kumpli nobenta i sinku aña, su dos yunan mas grandi a sinta pensa kwantu famia mester kombidá na misa i na kas.

Estela a kuminsá skirbi, sigun e tabata menta nòmber: ‘Federico, Estela. Yòmbi, Anastasia. Ta nos kwater ku ta yu a keda na bida. Ku nos kada un su kasá, ta bira ocho hende. Awor ñetunan. Ami tin seys yu, abo kwater, Yòmbi shete, Anastasia, esun pipita ku Dyos a dun'e. Tin ainda e dosnan di Colá defuntu. Ta bira binti ñetu’.

‘Lagami konta bisa-ñetu’, Federico a pidi su ruman.

Estela a pasa e papel p'e i Federico a kuminsá konta: ‘Nwebe di mi. Djeskwater di bo. Ocho di Yòmbi, tres di Anastasia i shete di Colá defuntu. Ban weta awor kwantu ñetu-tuma-ñetu mama tin. Djeskwater di mi banda. Ocho di bo. Djesshete di Yòmbi, nwebe di Anastasia i djesdos di Colá defuntu. Na tur ta bira shent'i binti nwebe hende. Anto ainda nos no a konta tur e esposo ku esposanan, ni yunan dj'afo ku yu di kriansa. Mira aki, Estela, ta blo si nos gana un premyo mayó nos por hasi fyesta pa tantisma hende. Ma Dyos ta grandi. Di kwalke manera nos ta bini kla’.

Kasá, esposo, esposa, yu, ñetu, bisa-ñetu, ñetu-tuma-ñetu, primu, aktu-primu, entená, padrasa, madrasa, mama di kriansa, tata di kriansa, yu di kriansa, wela, tawela, bisawela, bisatawela, subrina, primu-ruman, yu di lechi, ruman di lechi, ruman di mama, ruman di tata, yu di piká, muhe di piká, avochi, yu di afo, swa, ohochi, desu, kompader, komader (kompèr, komèr) kombles, trenu (kurnú), kompaná.

Yu nasé na saku (Por mira spiritu!?!?)

Yu di shete luna. Esaki por ta un yu realmente di shete luna. Ma un hende flakitu, lesma, tambe por yama ‘yu di shete luna’.

Nòmber di kariño:

Dushi, prenda, súku, stropi, shon, kònòshi, shon mama, shon dushi, galiña, bògi-bògi, tuti, prèkè, dugu-dugu, kununu...... i un kantidat mas.

Nòmber kombiná:

Shi...... Shi Maria (kasá di Nanzi)

Shishi...... Shishi Ca (por ta nòmber di un ruman muhe)

Shíshi...... Shíshi di kaya, un stinki, o un muhe ku mal moda ku ta grita papya zundra.

Seshi...... ruman muhe.

Shi skèrchi...... generalmente un muhe (delegá) ku lenga skèrpi.

Bru, Bubu, Buchi, Bubuchi.

Shòròmbu (shon hòmber). Antes: Yu mayó di Shon.

Shon, shon mener (sarkasmo!), mi shon dushi. Hopi be nos ta topa ku e kaso ku nan ta yama un hende ‘Shon’ komo nòmber di kariño.

Cha...... Cha Tiger (kisas di ‘le chat tigre’, di moda ku nos lo por a hañ'e for di Haiti). Por ta di ‘Tia’ tambe. (P.e. den kwentanan di Beneswela).

Cha Bulu, Cha Wan (generalmente komo nòmber di despresyo).

Señora...... hopi be uzá pa un hende muhe di un pais latino. Myentras ku e muhe di Surnam o Hulanda ta keda marká komo ‘mevrouw’, sin agregá mas nòmber.

Koma, Kompa. (Koma Katrin, Kompa Nanzi).

Pa, Ma, Wela. (Pa Yandi, Ma Yandi, Wela Tina).

Ba (Bas Karpinté o mèsla) Ba Mani, Ba Felipi.

Tan (tanta), Om (tio) ...... Tan Tela, Om Wili.

Bozu (derivá di Boatswain ku ta pronunsyá Bo's'un). Bozu Manchi o simplemente Bozu.

Palu, Djo, Toro, Swa, Gengu, Parna, Tersyo, generalmente no sa ta den kombinashon ku otro nòmber.

Figuranan pa spanta mucha:

Pa Chandi, Ba Wan, Chiku Dudunchi, Chiku Manachi, Cha Malenchi, Hòmber Chiki, Baka Kwedó.

Miho un yu yora ku su mama yora (Ora kastigá un mucha).

E mucha a sali su tata. (Karakter o figura di su tata).

Primu ku primu ta primi otro mas duru. (Moda chistoso di bisa ora dos primu kasa).

Shete sèrbètè, un táfla. (Un mama ku tin yu di diferente hòmber).

Sanger ta serafina. (Famia semper ta buska otro).

Pampuna no sa pari kalbas. (Manera e tata o mama e yu ta sali).

Mucha di nada (chikitu).

Mucha sanka sushi (mucha ku ta kana frega, hasi formalidat).

Manera su mama a pari'e (Blo sunu).

Den makutu (changa) di wela no sa falta warawara. (Den tur famia sa tin un yu o ñetu bandidu o degenerá).

Yu di mas chiki ta mata mama. (Loke nan ta bisa di ultimo yu).

Boka di pos.

Wowo di awa.

Nanishi di fli.

Pia di mesa, di kama.

Barika di liña (ora ta subi fli e liña ta forma barika).

Orea di kònchi.

Sanka di boto, barku.

Man di krènk (pa start owto o motor).

Kabes di kama.

Shirishiri di pòpchi (di pòpchi yená ku hilu, wèrki o paña).

Djente di wil (p.e. wilnan di oloshi).

Kustia di kas.

Lomba di stul.

Ehèrsisyo

1.	Tawela di bo tata ta bo....................................
2.	Un hòmber ta kasa ku un viuda. E viuda tin un yu muhe. E yu ei ta e hòmber su..............................
3.	Bo antepasadonan ta bo......................................
4.	E yu ku nase despwes di ohochi ta un.....................

5.	Kiko ta un Shi skèrchi? ........................
6.	Unda bo ta kere e nòmber Bozu a orijina? ............
7.	Pakiko nan ta bisa ‘Yu di mas chiki ta mata mama?
8.	Un mucha hòmber a resultá un buraché. Pero su tata tambe ta gusta ‘chupa ròm’. Kiko nan sa bisa e ora ei? Pam.......................................
9.	Cha Tiger ta un di e figuranan den kwenta di Nanzi. Ki yama e otro figuranan? ...............
10.	Ki diferensha tin den ‘un mucha di nada’ i ‘un mucha sanka sushi’? ........................

Vorige Volgende