Mi lenga. Deel 1

[p. 26]

Di shete les
Kultura krioyo

Nos kultura ta nos moda di pensa, di bisti, di biba, kome, balya, namorá.

Sigun mi, papyando di kultura di e tres islanan aki, loke ta di mas importansha ta nos lenga: Papyamentu.

Sin Papyamentu lo no tabata eksistí Rubyanu, Bonèryanu ni Yu di Kòrsow.

Kiko nos lo por tabata, lo a depende di e lenga ku nos lo papya: Spañó o Hulandes.

Sentro di nos identidat ta Papyamentu!

Pero kiko mas nos por bisa di nos kultura?

Nos kultura ta resultado di un proseso ku a dura sigur dos siglo, durante kwa un kultura propyo a forma for di tres elemento: kultura Europea, kultura Afrikanu i kultura Latino. Fwera di esey nos por distingí tambe un sneyf di kultura Indjan. Pero, meskos ku ora bo pone djis un sneyf den kumínda, ta difisil pa bisa presis ta kiko e ta i kiko ta su influensha, meskos ta masha difisil pa nos bisa eksaktamente ta kiko ta e influensha Indjan den nos kultura, ku sin duda t'ey.

Básikamente nos por bisa ku e kultura krioyo aki a keda formá ya na medyo di siglo pasá. Nos lenga, nos muzik, nos kustumbernan, ya na medyo di siglo pasá tabatin nan fórma, manera nos tur ku ta mayó di 30 aña a konosé nan.

Tabatin masha poko kambyo, te ora Shell a bini Kòrsow. Pa via di Shell aspekto di nos komunidat a kambya enormemente. Komunikashon ku estranhería a aumentá pa medyo di radyo, korant, televishon.

Konsekwensha tabata un enorme influensha kultural dj'afo. Nos por menshoná, por ejempel, influensha Hulandes pa via di skol. Nos skolnan tabata, i te ainda ta konfrontá nos na prome luga ku kultura Hulandes.

Nos por menshoná tambe Merikanu, pa via di pelikula, revista, televishon i propaganda komèrsyal.

Tur esaki a transformá nos mundu, nos kultura, ku byewnan no por rekonos'e mas. Nan ta sinti nan mes estranjero den nan mes pais. Tur loke nan por hasi ta retirá nan mes tantu ku ta posibel for di bida kultural di e tempu aki.

[p. 27]

Nan ta sklama: ‘Shon bida, kos a kambya! Ta kon por a bira asina’, ora nan weta kon hubentut di awendia ta komportá.

I hubentut a kuri tuma golos-golos tur loke tabata ofresé, sin buska drechi. Pero asina nan a kuminsá kibra nan herensya kultural. Guaracha ku ‘beat’ a reemplasá nos mes muzik, o a influensh'e di tal fórma, ku kasi no por rekonos'e mas. E ritmo original di ‘túmba’, por ejempel, ta masha poko konhunto tin ku ta tok'e bon awendia. Mesun kos a sosodé ku Papyamentu. Pa flohera o pa hasi interesante nos ta yen'e ku palabra Hulandes, Ingles i Spañó. I no manera hopi hende ta pretendé, pasobra Papyamentu mes no tin e palabranan ei.

Konsekwensha trágiko ta sinembargo, ku kabando ku bo herensya kultural, bo ta kaba ku bo identidat tambe. Bo ta para bira un pweblo sin raís.

(Fragmento di diskurso di Drs. R.A. Römer riba 26 di april 1969, durante e ‘Fin di siman di estudyo di Fundashon Identidat Antiyano.)

Den su diskurso e orador ta ekspresá un dwele, un tristesa, pasobra e ta mira kon e ola di influensha di afo ta ‘kabando ku nos herensya kultural’.

Pero den su entusyasmo e no ta paga tinu riba Kòrsow su posishon geografiko ni riba e diferente influenshanan historiko. West Indische Compagnie su mentalidat di nogoshi so, tur esnan di Iberia ku a bin resultá aki banda, influensha índirekto Franses, pa via di islanan Franses den Laman Karibe, restonan di kultura Afrikanu, hopi palabra Indjan ku a drenta i keda den nos lenga, influensha grandi di muzik, drentando for di Kolombya i Beneswela.

E orador ta bisa ‘sneyf di kultura Indjan’, i ku ‘ta difisil pa nos bisa eksaktamente ta kiko e influensha Indjan ta’.

Poko palabra di origen Indjan ta: Oba, kenepa, totèki, kanoa, ruku, lele, karawara, kayuda, lora, trupial, komeheyn, píta, datu, ahan, tapara, repa, ñapa, tutumba, papaya, wama, anasa, kunuku, wayaká, badjaga, balaú, chuchubi, maishi, maraka, yuwana, kachapa, yòrki, kayman, guyaba, malatí, watapana, wiri, hamaka, mahos, warawara, sabana, stákamahakchi, shimaruku.

[p. 28]

A keda mas o menos 75 Indjan riba Korsow, na 1634, despwes ku Makambanan a yega i Spañonan a bay, huntu ku mayoria di Indjan. Pero despwes e Indjannan a bolbe for di Kosta Firme. Kisas pasobra nan a laga famia atras, kisas pasobra nan lo ke tabata pegá ku nan antepasadonan derá aki riba.

Sentro di nos Identidat ta Papyamentu!, e orador ta kasi grita ku orguyo.

No tin hende pa kita su rason. Un Yu di Tera ta ‘kanta kokoyoko’ ku su lenga. Pero e mes idyoma Papyamentu ei a guli influensha di basta otro idyoma. Meskos ku a pasa, por ejempel, ku idyoma Ingles. Si un eskritor Ingles tin e varyos posibilidat di ekspreshon, pasobra su lenga a adaptá palabra di otro idyoma, anto nos por bisa esei di nos Papyamentu tambe.

Nos ‘lebumay’ ta di ‘never mind’

‘Tayó’, di ‘teljoor’

‘Guyaba’ di ‘koyabu’

‘Tinzhi’ di ‘Tinxir’

‘Eilingrana’ di ‘filigrane’.

Esun ku ta deseá di lesa (i studya!) mas di e asuntu aki, por sambuyá den e obranan di Antoine Maduro.

Otro kos ta barbarsimo ku nos por tende kasi tur dia. Por ehempel: E señoresnan. Mi ta feita mi mes.

Binti aña pasá no tabata eksistí ‘Hunga ròl’.

Den ultimo tempu ‘By side’ a haña vayos nifikashon. Lo no ta nada straño ku djis aki nos ta skirbi ‘Baysayt’, meskos ku a pasa ku ‘Lebumay’.

Kabritu ku su tow, karne ku di dje. (Kada ken buska su grupo o su igwal)

Palabra di dos be ta redu. (No sigi ripití)

Kanimi pa mi kanibo. (Yudami pa mi yudabo)

Tur kos ta un purbamentu. (No bisa nunka ku bo no por)

Komeheyn ta traha kas, pa prikichi buta webu aden. (Un ta mata kurpa, pa otro probechá)

Abow, bow, p'abow, p'ariba.

Kwe un hende kabes abow. Tene abow. Ey bow tin glas. Bow di su awa. Tur kos tabata ariba-bow. E mucha sa su lès ariba-ariba.

[p. 29]

Ehersisyo

1.	E Indjannan ku antes tabata biba riba Korsow tabatin tres diferente nòmber: Arawako, Kaketio, i Indjan Kurakao.
	Kasi sigur ‘Curaçao’ ta derivá di e ultimo nòmber.
2.	E kumínda dushi aki ta kita manera ke.................. Bo ta papya manera ...............
	Shon, ta kon e keshi ta skars asina? Mi ta haña un ..................?
	Pipa di balaú ta: ..................
	Drumi manera .................. na boka di riw.
	E mucha ta flaku; e parse hende ku a pasa hamber na .......................
3.	Kwa ta e lenganan ku a influenshá nos Papyamentu?
4.	Di kiko a sali e ekspreshon nobo ‘Hole huma’?
5.	Un hende ku tin algu na kachete, un notisya pa konta, ta masha kayente pa konta otro pèrsona. P'esei, e ta gusta ripití e notisya, pa e tin sigur ku e otro pèrsona a kompronde. I esaki a trese e ekspreshon: Palabra ..................
6.	Kwe un hende kabes abow ta nifiká.....................
7.	Traha un frase ku e palabra ‘Tinzji’, di tal manera ku un hende por komprondé den e frase mes kiko Tinzji

[p. 30]

	ta nifiká.
8.	Un mucha ku haña un bunita rapòrt na fin di aña, por ‘Kanta .....................’
9.	Un sneyf di kultura (un krenchi)
	Un madoa di ...............
	Un lèk di ...............
	Un tiki ...............
	Un poko ...............
	Un punta di ...............
10.	Ora nos ta papya purá, ‘bow di mesa’ ta bira: .........