Mi lenga. Deel 1

(1970)–Pierre Lauffer– rechtenstatus

Di prome les

Te aworo, laman
 
Ayo laman, mi amigu bon;
 
lo pasa hopi tem'
 
prome nos bolbe topa.
 
Pero bo sa
 
ku aya riba
 
den serunan di Iberya
 
lo mi kòrdabo;
 
ku lo mi keda kòrda
 
bo kweru blow,
 
bo sanger sálu
 
i kantika di bo awa low
 
ku su ritmo fyel
 
kurtí den mi orea.
 
Laman, amigu bon,
 
bo sa ku mi n' gusta
 
yama ayó na mi amigunan.
 
P'esei, di kurason,
 
mi tin di bisa awor:
 
Te aworo, laman, te aworo.
 
Luis Daal

Den e poema aki Luis Daal, bibá na Spaña, ta sinti un nostalgya teribel, sigun e ta kòrda riba e laman ku ta rondoná Kòrsow. Laman ta parti di kada Yu di Tera su bida, simplemente pasobra e ta mir'e tur dia. Pero ‘den serunan di Iberya’ (Spaña), Luis no ta mira laman. E serunan, ku ta duna un impreshon mas o menos di e serunan di Kòrsow, ta hasi su nostalgya ainda mas grandi. Pasobra huntu ku seru, el a kustumbrá ku laman.

E ta kòrda:

 
‘bo kweru blow’...... superfisye di laman.
 
‘Bo sanger sálu’......e awa sálu.
 
‘Kantika di bo awa low’ (Tibya).

E zonido, e chalalá kontinwo di awa kontra di baranka.

I e awa ta low.

‘Ritmo fyel, kurtí den mi orea’.

Ta manera e kantika di laman a dal pega den su orea, sin ke sali.

Den su ultimo frase: ‘Te aworo, laman, te aworo’ e ta pone su siguransa ku un dia lo e bolbe mira e laman di Kòrsow, su patria.

Purba traha algun figura di palabra bo mes. Por ejèmpel: Un baranka hostiná no kyèr a tende ni pa dinamit. Un sombre ku a pasa den horkan. Un kama mankaron ku ta pidi orsilyo. Un palu di koko ku a krese bay larya, keryendo di por tochi shelu.

Tin dos sorto di figura:

1.	Un hòmber manera un kas.
	Un mucha enditu un kabritu ku hamber.
	Un muhe meskos ku un tabla di strika.
	Un tèrsyo ku parse katapila.
2.	Un muhe sèngènè.
	Un hòmber mal bashá.
	Un Huda mal yená.
	Un mucha djispi.

Si tin moveshon o akshon, e figura di palabra ta bira mas bunita. Por ejèmpel: Shelu a basha na yoramentu (ora di awaseru). Laman a burdugá ku e baranka. Solo a tinzji henter kunuku na koló shinishi.

Awor, aworo (mas lat), awor ei (djis un ratu prome), mas aworo (mas den lat)

Awor mes ta aworo. (No posponé un kos, pero traha na e momentu aki)

Laman:

Laman ganchu (laman afo, brutu), laman grandi, Laman Chiki (Waaigat), awa morto o awa ketu (p.e. di Rif), na rant di blow (kaminda e laman su koló ta bira mas skur), kosta, kantu di awa, playa, fòndu, na belumbe

di awa (bow di superfisye pero no te den fòndu), awa plat (awa seku), awa hundu (mas afo), hende tras di awa (esnan ku no ta na Kòrsow), krusa laman (ku barku o bapor), sèt ola (ku pida tabla), kòrta awa (barku ta kòrta awa), kapya riba laman (kambya rumbo konstantemente). Laman ta yen! (Doño di trabow ta seka!).

Lo pasa hopi tem' (tempu). Lo dura basta.

Topa, kontra, kana kay riba un hende (topa ku ne sin aktu), reys riba un hende (di gòlpi), kita pa un hende (kòrta kaminda pa hende).

Seru tin: pia, barika i kabes.

Yama ayo: tuma despedida. Bay barka, bay kontra, bay baha un pèrsona.

Provèrbyo

Den tempu malu, prikichi ta kome aichi.

(Ora tin beran, mester kome loke tin)

Renchi ta kay, ma dede mes ta keda.

(Bo por hiba un pèrdida, pero tin hopi otro kos ku ta keda)

Pa dal kachó no sa falta palu.

(Si bo ke molostyá un hende, semper bo ta haña motibu)

Kome ku hende, biba ku Dyos.

(Trata kada ken den kada sitwashon).

Moda di ekspresa

Ei bow tin glas.

(Tin algu skondí, problema, difikultat ku ainda mi no sa ta kiko)

Yonchi ta poko floho; e ta traha un aden un afo (de bes en kwando, un dia sí un dia nò)

Mi alma no tabata den mi kurpa.

(Mi tabata morto spantá, sustá, yen di myedu)

Esaki sí ta kolmo.

(Esaki ta di mas. Esaki a pasa meta)

Ehèrsisyo

1.	E tres partinan di un seru ta:..............................
2.	Di unda a sali e ekspreshon ‘Kwe midí den Laman Chiki’?
3.	Kon bo por yama un hende muhe flaku, seku, sin padilanti ni patras?
4.	Menshoná nòmber di poko piská.
5.	Un mucha djispi ta un mucha..............................
6.	Bisa ‘Kita pa un hende’ ku otro palabra. Kòrta.........
7.	Uza un provèrbyo pa ‘Trata kada ken den kada sitwashon’.
8.	Kiko ta nifiká ‘Seru grandi mester baha, pa seru chiki subi’?
9.	‘Hende tras di awa’ ta.......................................
10.	Konta ku bo mes palabra e kontenido di e poesia di Luis Daal.

Vorige Volgende