Mangusá

[p. 61]

Wini di Bok'e Samí

Wini tabata un mucha di Bok'e Samí. Su tata tabata piskadó, su mama un merkadera ku tur dia tabata bai Punda pa bende e piskánan ku e tata a kue.

For di su chikí Wini tabata sinta na kant'i laman, den e awa plat, i mira su tata i e otro piskadónan traha ku boto i drecha reda.

Dia el a hasi kuater aña, su tata a traha un kanoa chikitu p'e. Wini tabata mara un liña na e kanoa i laga e kanoa drif den laman na e liña.

Ku e otro muchanan di Bok'e Samí Wini a kore hunga den e fòrti bieu. E muchanan mas grandi a munstr'e e graf di Christiaan Zimmerman. E tempu ei Wini no a kompronde e asuntu di Christiaan Zimmerman. Ma despues el a bin realisa ku e ta bisa-bisa-ñetu di e sòldá makamba ku hopi tempu pasá a traha den e fòrti bieu i piska tambe den su ora liber. Wini su fam tabata Zimmerman. Ke men ku e tabata desendiente di Christiaan Zimmerman. Ma no e so. Hopi hende mas di Bok'e Samí tambe tabatin e fam Zimmerman.

Hopi be Wini ku su amigunan a bai kue tapakoncha ku kokolishi djakarou riba baranka. E djakarounan tabata fasil pa kita. Pero ku un kuchú o pida heru mester a lanta e tapakonchanan for di baranka. Anto na kas mai Dora, Wini su mama, tabata buta tur tapakoncha ku djakarou den binager ku píka pa Wini kome.

Mashá hopi be anochi Wini a sinta tende kon e piskadónan bieu tabata konta loke a pasa nan riba laman. Kon nan a kue hopi dradu. Kon nan a bringa ku tribon grandi. E kuenta ku mas el a gusta ta esun di kompa Bernardo. Mashá hopi aña pasá, tempu kompa Bernardo tabata yònkuman, e tabata riba laman ku su kanoa. Den esei un piská mashá grandi a ataka su boto. Asina kompa Bernardo a mira ku e bestia ta blo sigui tira riba su kanoa, kompa Bernardo a bula na laman, laga e kanoa. E piská a habri un boka tres be mas grandi ku bok'i fòrnu i morde e kanoa nèt na dos. Ma danki dios tabatin algun otro piskadó djis seka den nan kanoa. Anto nan a salba kompa Bernardo. Despues di esei kompa Bernardo a keda ku asina tantu miedu, ku nunka mas el a bai laman ...

Wini a sigui krese te ku el a hasi seis aña. E ora ei e mester a bai skol na Jandoret. El a gusta skol mashá i e tabata siña bon den klas di mener Martina. Na e skol ei tabatin hopi mucha di Bok'e Samí. Anto semper nan tabata konta mener Martina kon ya kaba nan a siña piska un tiki. Djis kant'i awa nan sa sinta ku nan liña, ku pida djakarou na e anzue, pa nan piska robèki.

Dia Wini a hasi shete aña, el a pidi papa Riki, su tata, i tio Fil, ruman di su mama, pa e bai den boto ku nan ora nan ta bai piska na laman afó.

[p. 62]

Promé papa Riki no ker a tende nada dje asuntu ei. Pero tio Fil di kuné: ‘Un mucha di Bok'e Samí mester konose laman ku trempan. Pasobra despues ku e bira hòmber grandi, e tamba mester gana su bida ku piskamentu’.

Asina ei a bin sosode ku un djasabra mainta Wini a drenta e boto grandi di su tata, huntu ku tio Fil.

Papa Riki a hisa bela, mientras ku tio Fil a para na timon. Wini a mira kon riba dèk dje barku tabatin hopi liña bunita lorá, banda di un kahita ku varios anzue grandi.

Bientu a bola e belanan i e barku ku tabatin mes nòmber ku Wini su mama, esta Dora, a tumba pa laman grandi. Poko despues nan a mira e kasnan di Bok'e Samí te leu ayá, sigun e barku tabata nabega bai nòrt.

Wini tabata gosa di sinti e brisa fresku di laman den su kara. Anto el a skucha e zonidu dje olanan sigun e barku tabata kòrta awa.

Papa Riki a pega un masbangu na su liña i bent'e na awa.

‘Nos ta ban slep poko’, el a bira bisa Wini. ‘Kisas nos por kue un balaú’. Wini a yega di mira balaú grandi, pero morto riba tera, despues ku piskadó a bini kuné. Pero balaú bibu den laman, nunka e no a mira.

Tio Fil, sintá na timon, di kuné: ‘Kòrda bon, Wini, asina nos pega un balaú, bo mester drumi plat abou den dèk. Pasobra semper un balaú ta bula bin den direkshon kaminda e liña ta trèk e. E ta bula fo'i awa, lanta bai laria manera pára. Pesei bo mester tene masha kuidou. Balaú sa bora boto ku su pipa. Esei ta e wesu largu ku e tin na su boka. Esei nos ta yama pipa di balaú. A yega di sosode ku Antuan mi ruman a pega un balaú na liña. Hopi aña pasá esei a sosode. Sigun Antuan tabata lucha ku e balaú, e bestia a bula bin den su direkshon. Antuan a sak abou den su kanoa ora el a mira e balaú salta fo'i awa. E balaú a dal abou atrobe den laman, kore bin riba Antuan su kanoa. Anto den su furia el a bora e kanoa ku su pipa. Ta klaro ku e balaú a keda pega den kurpa dje kanoa. E ora ei Antuan mester a laga e balaú pegá den su kanoa. Asina ei mes el a rema bai Bok'e Sami, pasobra e no por a saka e balaú. Despues ku a hala e kanoa riba tera, por a ranka e balaú, sak'e’.

Wini a sinta skucha boka ketu i el a haña un tiki miedu. Ku un poko sustu den su kurpa el a keda mira laman.

Algun piská buladó a salta fo'i awa, bati ala un ratu i djublum den laman un krenchi mas leu. Wini a mira algun turtuka tambe. Wini a kere ku turtuka ta bestia floho. Ma e por a ripará ku ki rapides e turtukanan tabata bòltu den laman i landa bai purá asina e barku yega seka di nan.

Den esei Wini a tende papa Riki dal un gritu: ‘O Fil ei! Mi ta sinti algu pisá na mi liña. Para kla pa kambia rumbo asina mi bisabu. Mi ke ku ta un balaú na e manera ku e ta kore’.

Wini a span wowo asina grandi i mira den direkshon dje liña di su tata.

Di ripiente el a mira un piská mashá grandi mes lanta bula fo'i laman. E

[p. 63]

tabata blou lombrá. Anto e tabatin un boka largu i un ala grandi riba su lomba.

‘Balaú!’ Tio Fil a grita. Mesora tio Fil a bòltu timon, pa kambia rumbo. E barku a kuminsa nabega den direkshon dje piská. Mientrastantu papa Riki a kobra liña. Pero muchu papa Riki no por a sigui hala su liña aden.

Pasobra e balaú a kambia rumbo i landa bai masha rápido.

‘Fir p'e’, tio Fil a grita.

E liña a kore pasa den papa Riki su man, sigun e balaú a hinka 'fo.

‘Konopá lihé p'ami’, papa Riki a bira bisa Wini. Sin perdè tempu Wini a

[p. 64]

konopá punta dje liña na un otro bòl ku tabatin den dèk. Bon purá el a fula ku e konopi ta wanta. Djei el a benta e liña abou, pasobra ya e liña di papa Riki tabata kabando.

‘Ata e alimá ta bin atrobe’, papa Riki di ku tio Fil. Bon purá papa Riki a bolbe kobra su liña.

Den esei nan a mira kon e balaú a lanta bai laria, anto basta seka dje barku.

‘Sak abou!’, tio Fil a dal un gritu.

Mesora Wini a laga su kurpa kai den dèk. Anto drumí asina ei boka 'bou, el a mira ku su kant'i wowo kon e balaú a bula pasa riba kabes dje barku, bai dal abou den laman n'e otro banda.

Dos ora largu papa Riki a lucha ku e balaú te ora el a logra kans'e. Anto Wini mester a konopá tres bòl di liña, pasobra varios be e balaú a kore bai mashá leu mes.

Kestion ku tin despues di dos ora papa Riki a logra hala e balaú te na kantu dje boto. Ku un bar'i hak papa Riki ku tio Fil a hisa e piská, bent'e den dèk.

‘Esaki tin pa barata shen kilo’, Tio Til a hari.

‘Awe kos ta bon’, papa Riki di. ‘Aworó mai Dora ta kap e na mochi pa nos bend'e’.

Bon kansá pero satisfecho papa Riki a bòltu bela, pa nan kue kamind'i kas. Pa grasia tio Fil a laga Wini wanta timon te ora nan tabata seka di yega Bok'e Samí.

Ora nan a yega tera, ya mai Dora tabata pará den playa, sperando nan.

‘Ta ken a pega e balaú ei?’ mai Dora a puntra.

Ku su kara chistoso papa Riki a kontestá: ‘Mi ke ku ta nos Wini’.

Tio Fil a hinka boka 'den: ‘Si, bo sa, Dora. Ta Wini mes’.

Mai Dora a kompronde ku esei no ta berdat, pero pa sigui ku e wega e di: ‘Mi yu lo mester a bringa hopi kuné’.

Wini a keda mira su mama, su tata i tio Fil. E tambe a kompronde ku ta chansa, pero el a sonrei kontentu. Pasobra kon ku bai bini e tambe a yuda.

Su manisé na skol mener Martina mester a para skucha henter e istoria di Wini su balaú.