Mangusá

Maron

Mashá hopi tempu pasá Mama Nena ku Papa Lou tabata biba na Yansofat. Esei ta un kunuku mashá leu, te pariba ayá.

Papa Lou tabatin su pida hòfi i e tabata kria algun kabritu ku karné. Ma kada be Papa Lou tabata bai Santa Rosa for di mainta trempan. Ei e tabata yuda su amigu Kalitu traha kas. Ku e trabou ei Papa Lou tabata gana algu di sèn.

E tempu ei no tabatin outo. Pesei Papa Lou tabata bai Santa Rosa ku garoshi di buriku. Tabata dura basta p'e yega Santa Rosa. I anochi, ora Papa Lou bolbe kas tambe tabata dura basta promé ku e yega.

Ora Papa Lou bai traha, kas ta keda ketu. Pasobra ainda nan no tabatin ningun yu. Mama Nena tabata keda kas e so. Anto e tabata laba paña, strika, kushiná i limpia kas. Pero tabata ketu. Masha ketu mes sin mucha den kas.

Di aleu Mama Nena por a tende e kabritunan grita. De bes en kuando e por a tende un buriku borotá. Ma den kas mes tabatin un silensio. Mama Nena no a gusta e kos ei. Pero kiko e ke hasi? No tabatin otro moda.

Un dia Papa Lou a bolbe yega kas te lat. Ku kara harí el a drenta sala.

‘Di kon bo ta kontentu asina?’ Mama Nena a puntr'e.

[p. 45]

[p. 46]

‘Pasobra m'a trese un kos p'abo’.

‘Algu p'ami?’

‘Si, 'mama Nena. Algu mashá gracioso. E ta den e doshi akí. El a munstra Mama Nena un doshi di karton. Den e doshi tabatin algun buraku.

‘Kiko e ta, Papa?’

‘Un kos pa kompañabu den dia ora mi bai traha?’

‘Bisami te kiko lihé’.

Ku mashá kuidou Papa Lou a habri e doshi, kita e tapadera. Den e doshi tabatin un yu di kachó, koló maron i ku wowo mashá spiertu.

‘Esta bunita, Papa. Lagami mir'e’.

Papa Lou a buta e kachó chikí den Mama Nena su skochi.

Mesora e kachó a kuminsa lembe Mama Nena su man. Djei el a lora su kurpa manera un bola den Mama Nena su skochi i drumi.

‘E ta bon bestia’, Mama Nena di. ‘Mira kon mansu e ta’.

‘Mashá mansu, mama. Awor bo tin kompaño henter dia.

Mama Nena a lanta bai den kushína i pone poko lechi den un bleki pa e kachó. Mesora e kachó a bebe e lechi.

E kachó a haña un nòmber. Mama Nena a yam'e Maron, pasobra su lana tabata koló maron.

I asina Maron a keda kompañá Mama Nena tur dia den kas. El a bira grandi i e tabata kuida kas bon. Ki ora ku un hende yega na porta di kurá, Maron tabata grita duru.

Despues ku Mama Nena ku Papa Lou a haña tres yu, tur e muchanan tabata hunga ku Maron i nan a pasa mashá kontentu.