Mangusá

Galiña Gacha

Nonchi ku Nena tabata biba poko pariba di misa di Soto. Nan tabatin un kas bunita, ku un kurá grandi rondó di dje. Den e kurá ei nan tata, Papai Gachi, tabata kria tur sorto di bestia. Tabatin un kouchi yen di palomba, un kouchi di galiña, un kouchi di konènchi. Mas patras nan tabatin un kurá di kabritu ku karné.

Tur atardi, despues di skol, Nonchi ku Nena tabata yuda Papai Gachi den kurá, pa duna e bestianan awa i kumínda. Pa laba nan kouchi, pa e kouchinan keda limpi.

Riba un dia Nonchi di ku su tata: ‘Papai, mi ke un galiña di mi mes. Mi ke un galiña pa mi kria’.

‘Ata nos tin hopi galiña den kouchi’, Papai Gachi a kontestá.

‘Mi sa, papai. Mi ta stima tur. Pero mi ke un di mi mes’.

‘Ta bon anto, Nonchi. Djasabra awor papai lo kumpli ku bo deseo’.

E djasabra siguiente papai Gachi a bai plasa i el a kumpra un galiña pa Nonchi. Tabata un galiña ku hopi koló, mashá bunita. Papai Gachi a hinka e galiña den un saku di papel i hib'e kas pa Nonchi.

Ora Nonchi a mira e galiña, el a bira loko di kontentu.

Mesora el a duna e galiña nòmber. El a yam'e Gacha. Nonchi a pone Gacha den e kouchi grandi i pone poko maishi p'e kome. Bon hambrá Gacha a tira riba e maishi i yena su stoma. Djei Gacha a bebe poko awa

[p. 18]

ku tabatin den e baki di semènt den e kouchi.

Tur dia Nonchi tabata bai den kurá, pa e mira Gacha. De bes en kuando e tabata saka Gacha, i sinta kuné den su skochi bou di un pal'i watapana grandi den kurá. Gacha a kustumbra asina tantu ku Nonchi, ku e tabata pik mainshi den Nonchi su plant'i man.

Poko tempu despues, riba un djadumingu mainta, Nonchi a sali den kurá, p'e bai mira su Gacha den kouchi.

‘Gacha’, el a yama e galiña, ‘Gacha, unda bo ta’.

Nonchi a buska ku buska, sin por mira Gacha.

Den esei el a ripará ku Gacha tabata drumí te den huki patras dje kouchi.

‘Hei, Gacha’, Nonchi a yam'e, ‘bin tende’.

Pero Gacha no a muf for di su lugá. Ni sikiera el a bira kara, pa mira su amigu Nonchi.

‘Kisas Gacha ta malu’, Nonchi a pensa. ‘Malu bo ta Gacha? Bo ke mi trese ppoko maishi fresku p'abo? Bo ke awa?’

Gacha no a hiba ni trese, i el a keda drumi mes ketu den huki dje kouchi.

Un poko tristu Nonchi a bai kue un man di mainshi i pon'e dilanti di

[p. 19]

Gacha. Despues el a yena un bleki ku awa i pone esei banda dje maishi, nèt Gacha su dilanti.

Djei Nonchi ku Nena, su ruman muhé, a kore hunga den kurá. Pero stret bai Nonchi tabata pensa riba su Gacha.

Poko dia despues, ora Nonchi tabata duna e galiñanan kuminda ku awa, el a nota algu. Gacha tabata pará meimei dje kouchi. Anto rondó di Gacha tabatin sinku puitu.

‘Ata’, Nonchi a hari, ‘esta bunita’.

El a abri porta dje kouchi, drenta i yongotá banda di Gacha, p'e mira e puitunan mihó. Esta grasioso. Nan tabatin pia chikí, pik chikí, ala chikí. Anto nan tabata manera katuna.

Den esei Gacha a yama e puitunan. Dos a drenta bou di Gacha su ala. E otronan a bin pik kaminda Gacha a skarba den tera.

‘Awor m'a kompronde’, Nonchi a pensa, ‘Gacha ta nan mama’.

‘O Nonchi ei’, el a tende su tata yam'e djis su tras. ‘Bo ta gosa ku bo puitunan’.

‘Si, papa’, Nonchi di. ‘Anto papa sa kiko? Gacha ta nan mama’.

‘Duna nan hopi kumínda, pa nan krese bira grandi’.

‘Klaro, papa. Ma papa, ta di ken e puitunan ta?’

‘Di ken? Ami ta haña ku si Gacha ta di bo, anto e puitunan tambe ta di bo’.

Ku mashá alegria Nonchi a grita i kuminsa bula balia den kurá: ‘Tur ta di mi. Tur ta di mi. Tur ta di mi’.

Bon kontentu Nonchi a bai konta tur hende kon Gacha a bira bon atrobe i ku el a haña sinku puitu.