Mangusá

Ala kayente

Toni ku Tana ta dos ruman.

Nan ta biba na kunuku, na Sabaneta.

Riba un dia nan tabata kana den kunuku di nan tata.

Ora nan a yega te banda di tranké, nan a mira algu.

Un totolika a lanta bula nan dilanti.

Toni di: ‘Mira. Un totolika’.

Tana di: ‘Laga nos kore su tras’.

Nan dos a basha kareda tras di e totolika.

Den esei e totolika a dal abou, keda drumi den tera.

Anto el a bati su alanan manera kos kansá.

‘E no por bula mas’, Toni a hari.

‘Awor nos por hañ'e’, Tana di.

Bon purá nan a kore bai kaminda e totolika ta den tera.

Pero asina nan a yega seka, e totolika a lanta bula atrobe.

Un tiki mas leu e totolika a bolbe kai na suela.

Toni a tene Tana su man, pa nan bai kue e totolika.

Pero asina nan tabata seka dje totolika, e pára a bula bai i drenta mondi.

E muchanan tabatin miedu di drenta mondi.

Pesei nan a kana bai kas.

Ora nan a konta nan tata kiko a pasa ku e totolika, nan tata a bisa nan: ‘Esei ta un triki di totolika. Kasi sigur boso tabata hopi seka di su nèshi. E totolika ta lanta bula, kai na suela i gaña kansá. Kada be ku bo kore su tras, e ta bai mas leu. Esei ta pa bo bai leu for di su nèshi’.

E ora ei muchanan sa grita: ‘Ala kayente! Ala kayente’. E muchanan ta kere ku e totolika no por bula, pasobra e tin ala kayente. Ma nunka nan no ta logra kue e totolika’.

‘Tin webu den su nèshi?’ Tana a puntra.

‘Kasi sigur’, e tata a kontestá.

‘Nos ta bai buska su nèshi?’

‘No, Tana. Laga e totolikanan brui. Anto aki poko dia tin dos totolika mas pa kanta den mondi’.

[p. 16]

‘Nan tin bunita nèshi?’ Toni ker a sa.

‘Mashá bunita mes. E mama totolika ku e tata totolika ta kana piki hopi rama delegá. Anto nan ta traha nan nèshi. Den e nèshi nan ta pone dos webu. E ora ei nan ta drumi riba e webunan, pa kenta nan. Ora e yunan sali for di webu, e tata ku e mama ta duna nan kuminda na boka. Nan ta krese, bira grandi, pa nan tambe bula den mondi’.

Toni ku Tana a skucha bon.

Su manisé nan a bai tira hopi wiriwiri di pan banda di e tranké, pa e totolikanan haña kumínda.