Mangusá

Wenchi karpinté

Tur atardi, despues di skol, Wenchi tabata bai wenkel di karpinté seka Bas Yuyu den Dòmi.

Mai Klarita, mama di Wenchi, tabatin miedu ku algu por pasa Wenchi den wenkel di Bas Yuyu. Kisas klabu por hink'e. Ta posibel ku zag por kòrta su dede. Pero Pai Fon, e tata di Wenchi, di: ‘Kedabu tur trankil, mama. Ya Wenchi ta mucha di djesun aña. E tin basta sintí. Nada n' ta pas'e. Kòrda bon ku ta mashá bunita si un mucha siña lesa, skibi i konta na skol. Ma un hòmber mester tin un fishi den su man. Pasobra si e sa un fishi, nunka di su bida lo e n' pasa hamber’.

Mai Klarita a haña ku Pai Fon tin rason. Di pursi Pai Fon mes tabata blekeru. Mashá hopi trepochi ku wea Pai Fon a traha den su kasita patras den kurá. Anto Pai Fon sa bende tur i haña basta plaka pa kumpra paña i kuminda pa su kasá i su dos yunan.

E di dos yu, Chalito, tabatin kuater aña. Ainda e no tabata bai skol. Tur dia Chalito tabata kore hunga den kurá.

Un dia Wenchi a tende kon su tata i su mama ta kòmbersa. Anto Mai Klarita di: ‘Pai Fon, otro luna Chalito ta hasi sinku aña. Nos mester kumpra un regalo p'e’.

‘Mi sa, mama’, Pai Fon a kontestá, ‘pero kon mi ta hasi? Kuminda ku paña ta mashá karu. Kasi no ta sobra sèn pa nos kumpra algu pa Chalito. Pero lo mi mira kon mi ta bini kla’.

Wenchi a skucha bon, i el a keda un poko tristu. Pasobra e tambe tabata stima Chalito.

Su manisé na skol kasi Wenchi no a paga tinu na loke su mener tabata papia. Wenchi tabata blo pensa riba Chalito. Atardi, ora el a bai wenkel

[p. 13]

di Bas Yuyu, e pensamentu riba Chalito a sigui molosti'e. I sigun e tabata bari sas ku klerchi den wenkel, stret bai el a sigui kibra kabes kon e por yuda, pa Chalito haña su regalo.

Den esei su bista a kai riba e monton di pidasitu lata, tabla i blòki bentá den huki di wenkel. Semper Bas Yuyu a bisa ku no mester tira sobrá di palu afó. Por uza nan kualke ora.

Pero ya a pasa mas ku seis luna ku Bas Yuyu no a uza ni un pida sobrá di palu.

‘Mi ta bai pidi Bas Yuyu poko pida palu sobrá’, Wenchi a pensa. ‘Pasobra mi por ... si ... klaro ... mi por ...’

‘Bas Yuyu’, Wenchi a kuminsa ku un krenchi duda den su stém, ‘Bas por dunami poko pida palu sobrá?’

‘Pakiko asina, Wenchi?’

Sin por hisa kara Wenchi a konta Bas Yuyu loke el a tende su mama i su tata papia.

Ni un momentu so Bas Yuyu no a duda. Anto e di: ‘Kue kuantu ku bo ke. Si bo mester di yudansa, bo ta bisami. Si bo mester di klabu, bo ta pidimi’.

Wenchi a gradisi Bas Yuyu mashá. Asina el a kaba di bari sas ku klerchi, el a skohe algun pidasitu tabla ku blòki i kuminsa traha. Su promé trabou tabata un barku. Riba pida tabla lizu el a pega dos blòki kòrtiku ku klabu di un deim. Eseinan tabata dos skorsten dje bapor. Na parti dilanti i parti patras el a pega dos pènchi largu. Eseinan tabata master. Na busprit i na stef dje boto el a bati klabu chikí. Anto el a mara pida hilu di padilanti te patras na e dos masternan.

Bon kontentu Wenchi a keda mira e bapor pa Chalito. Awor falta un tiki fèrf. Pero esei lo bin despues.

Ku dos lata, un largu i un kòrtiku, Wenchi a traha un garoshi. Pa wil el a pega dos tapadera di bleki na e garoshi. Djei el a pega un pal'i hilu na e parti ariba dje garoshi. Rondó dje pal'i hilu el a pasa un liña ku a bai pega te banda dje dos wilnan. Esei ta pa Chalito por stür su garoshi. Pa hasi e garoshi mas kompletu, Wenchi a traha un pitu p'e. Un bleki bashí el a pega riba e garoshi. Den e bleki el a traha un buraku i pasa un klabu grandi den dje. Na kabes dje klabu el a pega un liña ku a kore ta na e stür dje garoshi.

Ku un sonrisa riba su kara Wenchi a hala hilu dje pitu. El a zona ‘Krò, krò, krò’ sigun e klabu grandi a raspa kontra dje bleki.

‘Bas Yuyu’, Wenchi di, ‘awor mi mester fèrf nan’.

‘Wardami un ratu’, Bas Yuyu a kontestá. ‘Mi ta buska p'abo’.

Patras den wenkel, riba un rèki, Bas Yuyu tabatin algun bleki bieu ku kachi-kachi di fèrf ku a sobra. Eseinan el a duna Wenchi. El a fia Wenchi un kuashi chikí tambe.

[p. 14]

‘Ora bo kaba’, Bas Yuyu di kuné, ‘kòrda laba e kuashi den korozin, pa e no bira duru’.

Ku su santu pasenshi Wenchi a sinta fèrf e boto i e garoshi. Despues el a pone nan riba un rèki den wenkel, pa nan seka.

Sin bisa su tata ku su mama nada Wenchi a warda e boto i e garoshi den un saku di papel. Anto dia Chalito a hasi aña, el a munstra Mai Klarita i Pai Fon loke el a traha pa su ruman hòmber.

‘Bon trabou’, Pai Fon a hari. ‘B'a mira, mama? Wenchi lo bira un bon karpinté.

Mai Klarita a brasa Wenchi i dun'e un sunchi den su frenta.

Wenchi a keda mashá kontentu ora el a mira Chalitu kore e garoshi den kurá. I tambe ora Chalito a buta e boto den un tobo ku awa.

Sintá den porta di kushína, Wenchi a pensa: ‘Dia mi bira grandi lo mi traha un kas pa Pai ku Mai i un boto grandi pa Chalito’.