Mangusá

[p. 4]

Shonnan tur:
Nos kuminda típiko, nos mangusá, ta basta konosi. E ta un meskla di pinda, bonchi i maishi.
Komo e buki akí tambe ta un meskla, un sorto di tutu, el a haña e título ‘Mangusá’. Pues kada kuenta, pidasitu istoria, charada, krusigrama o rima ta un pinda, un bonchi o un pipita di maishi pa nos kriaturanan.

P.A.L.

[p. 5]

Souchi

At'e souchinan ta bolbe pasa.
Nan ta salta, hasi kenshi, kòrta airu.
Ta manera trup'i wairu
tur e souchinan ta bula pasa.

Elegante nan ta subi, bolbe baha
te ku kasi nan ta tochi tera.
Nan ta parse oroplan'i guera
ku sa kon den laria tin ku traha.

At'e souchinan a bolbe bin fo'i otro tera,
rápido manera kantidat 'i flecha.
Nan ta bòltu, hasi nan trapiesanan sin hera.
Ta den airu mes nan tin kosecha.

Mira kon nan rabu ta manera skèr kòrtando
mientras nan ta pasa riba nos kabes.
At'e souchinan ta bai pasando.
Nan ta subi, bolbe sambuyá ku rapides.

Te otro aña nos lo keda spera
ku e souchinan lo bolbe pasa,
pa nan bishitá un poko tem' nos tera.
Mira kon e souchinan ta bula, kòrta airu, kore pasa.