Kuenta pa kaminda

[p. 41]

Nèshi den Pietermaai

Na aña 1832 e kas a basha aden por kompletu. Pero sinku aña promé e mes kas bieu ei, den Pietermaai, kantu di laman, tabata un nèshi di amor. Promé ku esaki no tabatin ningun hende ta biba den e kas. Tur su porta- ku bentananan tabata kibrá, i tabata falta vários panchi riba su dak. E último doño, tempu ku e tabata na bida, a laga klaba poko tabla na e portaku e bentananan, pa sierto rèspèt.

Pero a la largu el a bin para bira ‘kas di spiritu.’ Simplemente pasobra un dia anochi un bientu fuerte a bati un pida papel grandi den su sala. E zonidu a buta tur hende ei banda kere ku ta un spiritu a tuma poder di e kas bashí.

Pedro, sin embargo, tabata sa masha bon, ku no tin ningun sorto di spiritu ei den. Por sierto e tabatin kustumber di drumi sosegá den e kas ei. Ora su barku yega anochi lat ku salu for di Boneiru, e tabata pasa nochi ei den, pa su manisé trempan e hala pa Montaña, kaminda su hendenan tabata biba.

Bintitres aña Pedro tabatin, un mulato haltu, kurpa ankrá. E tabata matros na bordo di e balandra ‘Stormvogel’, ku tabata karga salu for di Boneiru. Kada be ku Pedro bolbe di Boneiru, e tabatin kustumber di kamna keiru den Punda ku Otrobanda, tirando un bista riba e nigritanan hóben ku tabata bini di Bándabou, pa sinta bende fruta ku bèrdura riba kaya. I den nan el a bin topa ku Sabelita, un nigrita katibu di diesnuebe aña di Bándabou. Nan a kuminsá kombersá, i Sabelita a gusta Pedro. Pero no tabatin kestion di kasa. Pa kuminsá no tabata pèrmití pa katibu kasa. Ademas Pedro no tabatin sufisiente plaka tampoko pa kumpra Sabelita i dun'é su libertat.

Kon ku bai bini, despues di poko tempu Pedro a disidí di skonde su Sabelita den e kas bieu den Pietermaai. Un dia atardi, ora Sabelita a kaba di bende fruta, el a tum'aden pa hui ku Pedro, en bes di bolbe Bándabou.

Ora nochi a sera, el a kamna un distansia tras di Pedro, pa ningun hende no ripará ku nan tin algu ku otro. Asina nan a

[p. 42]

drenta Pietermaai, nan a sigui kamna kantu di laman, te ora nan a yega parti patras di e kas.

For di algun dia promé, Pedro a buta algun stul, un mesa i un kama den e kas pa Sabelita. Pedro tabata kontentu di su alma ku porfin e por a forma un bibá ku e muhé ku tantu e ta stima.

Ora Pedro tabata na Kòrsou, e mes tabata bai kumpra kuminda i tur sobrá kos ku Sabelita mester. Pero ora e tabata sali pa Boneiru, e tabata laga un kriá di konfiansa kumpra tur kos pa Sabelita. Esaki tabata sosodé anochi, ora ningun hende ta mira. I dje manera ei Pedro por a bai Boneiru trankil di dje.

Asina a bin pasa basta tempu, te ku riba un bon dia Sabelita tabata ensinta. E kos akí a preokupá Pedro mashá. Pasobra si e mester a laga e yu nase den e kas ei, e yoramentu di e kriatura lo por a buta tur hende ei banda haña sa ku tin hende ta biba den e kas bieu. Ademas e shon di Sabelita a laga partisipá tur kaminda, ku un katibu muhé di dje a hui bai.

Komo ta anochi so Sabelita por a sali for di e kas, pa kohe poko airu fresku, e tabata sintié manera prezu. Di dia e tabata para konstantemente tras di yalusí, pa e weta sikiera algu di kaya.

Asina a bin sosodé ku riba un dia tabatin poko mucha ta hunga ninichi dilanti di e kas. Sabelita, ku tabata mira nan ku masha atenshon tras di yalusí, a gosa nan wega asina tantu, ku na un sierto momentu el a dal un gritu hari sin e sa. E muchanan a spanta, kore limpi bai, gritando: ‘Spiritu! Spiritu!’

Mesora nan a bai avisá polis. I poko tempu despues dos polis a saka Sabelita for di e kas, bai kuné. Maske kuantu Sabelita a grita i sklama, no a yuda...

Ora el a yega kunuku, su shon a laga dun'é un bon sota di watapana den su lomba i prohibié di bai bende kos na Punda. Na tur sorto di manera e shon a purba saka for di su boka ta ken ta su amante. Sabelita no a menshoná Pedro su nòmber niun ora so.

[p. 43]

Un par di dia despues Pedro a bolbe for di Boneiru i el a baha bon purá for di barku pa bai serka su Sabelita den Pietermaai. Pero e kas tabata bashí. Riba e mesa tabatin un tayó ku poko kuminda bieu i un bleki di awa.

Mesora Pedro a bai informá serka e kriá ta kiko por a pasa. Ora el a haña sa ku nan a hiba su Sabelita kunuku, Pedro por a bira loko di tristesa. E tabata desesperá, pasobra e no por a bishitá Sabelita na Bándabou. Ma despues ku el a sinta pensa un ratu, el a bin komprondé ku ta un manera so tin pa e bolbe haña Sabelita.

Pedro tabata buska tur sorto di djap ora e baha for di barku, maske kon kansá su kurpa tabata. El a yuda baha karga for di otro barku. El a bari kaya. El a limpia kurá di masha hopi hende. I asina el a sigui traha dos aña largu, hopi be te lat anochi, pa e gana plaka.

Despues di dos aña e tabatin sufisiente plaka ku e por a bai Bándabou pa buska su Sabelita. El a kumpra Sabelita liber, i huntu ku Sabelita e mester a kumpra su propio yu hòmber ku tabata serka di kumpli dos aña. E mester a konformá ku e shon a buta su yu yama Juan, maske e mes tabatin deseo di yama su yu Antonio.

Kestion ku tin el a barka bai Boneiru ku Sabelita i su yu. Sigun nan ta bisa, Pedro a bai biba banda di Antriol, i ku el a sigui traha riba Boneiru sin bolbe Kòrsou nunka mas.