Kuenta pa kaminda

[p. 28]

Prenchi den maleta

Pa Djeffi ta un figura di tempu di mi hubentut. Nunka lo mi por lubid'é. E tabata kaptan di Olivia Grande, un barku di dos master ku tabata nabegá entre Venezuela, Colombia, San Dumingu i Kòrsou. Pa Djeffi tabatin wowo shinishi i un kara masha chistoso. Bo no por a kere ku ya el a pasa kuarenta kaba.

Esta bon tèrsio e tabata. Mihó amigu kuné mi no tabatin, pasobra e por a konta kuenta fantástikamente bon, di kolebra i piská masha grandi ku por hala un barku bai kuné, di muhé piská ku kabei masha largu, ku a buta nabegantenan tolondrá i bula na awa nan tras, di orkan masha mahos ku skual teribel duru.

Ki ora ku Pa Djeffi ta konta kuenta, mi ta imaginá mi kon mi ta pará den stef di su barku, pa mi gosa kon e ta lucha ku laman. Bou di un palu di indju den Pareda e tabata konta mi su historianan, miéntras mi ta hunga fli. I e fli ei, ta Pa Djeffi mes a trah'é pa mi, pasobra semper Pa Djeffi a keda mucha. Trahamentu di fli tabata su kuki. Ki ora ku e ta na Kòrsou durante un par di dia, e mester a traha un fli grandi pa mi.

Loke semper a straña mi, ta esaki: pa nabegante brutu ku Pa Djeffi tabata, semper e tabatin masha fe den Labirgui di Altagracia. No ku Pa Djeffi tabata un pilá di misa. Ami ta kere ku e tabata gusta únikamente e silensio den misa, pa e hasi su orashon promé ku e sali pa laman.

Un be m'a bai kuné. E tabatin un maleta maron chikitu den su man. Ei den e tabatin tur sorto di potoshi, huntu ku un prenchi machiká di Labirgui di Altagracia.

Te patras den último banki el a hinka rudia, saka e prenchi for di su maleta i sinta resa, miéntras e tabata tene e prenchi su dilanti. Su kara tabata masha serio. Mi por a mira su boka move, pero sin ku mi por a tende kiko e ta resa.

Ora nos a sali den plenchi di misa, m'a puntr'é ta kiko e prenchi ta nifiká.

[p. 29]

‘Mir'akí, mi yu’, el a kuminsá splika mi, ‘mi ta kombensí ku Labirgui di Altagracia ta protehé mi. Laga mi konta bo kiko a yega di pasa Pa Djeffi. Tempu mi tabata matros na bordo di Nena Dos, m'a yega di sinta resa den e mes misa akí. Tabata mas o ménos dos or di mèrdia. Nena Dos mester a sali sink'or di atardi. Mi no sa ta kiko a pasa mi. Pero e kalor den e misa ketu a buta mi pega soño. Ora m'a bula lanta, m'a tende Angel di Señor ta bati. M'a kore sali bon purá, pa mi bai bordo. Pero ya Nena Dos a sali kaba. Anto tur mi pañanan tabata na bordo. Bo sa kiko a pasa despues di algun dia? Notisia a yega ku Nena Dos a pèrdè riba laman. Tur tripulante a hoga.’

Pa Djeffi a keda ketu un ratu i pone su man riba mi kabes.

‘Tur hende na bordo a hoga. Mi kompader Kobitu tambe. Ami ta kombensí ku ta Labirgui di Altagracia a pèrkurá pa mi pega soño den misa, pa mi keda na bida. Ta p'esei semper mi tin ku resa n'e, promé mi bai nabegá.’

Algun aña despues mi tabata sintá na kas di Pa Djeffi, kòrtando barba, lèlè ku ronkadó pa un fli nobo ku el a kuminsá traha pa mi. Den esei un matros a bin avisá Pa Djeffi, ku nan mester barka mesora. Tempu di orkan tabata aserkando. P'esei nan mester a probechá pa nan yega San Dumingu promé ku tempu di orkan dal aden. E matros di ku ya tur hende ta na bordo.

‘Ta duel mi, mi yu’, Pa Djeffi a bisa mi, ora el a kuminsá bisti su bachi pa e sali. ‘Ora mi bolbe nos ta kaba e fli.’ El a kologá e erante di mi fli na un klabu na su muraya di kamber.

Bon purá Pa Djeffi a yama su kasá ku su yunan ayó i sali bai. Te awe mi ta kòrda kon el a keda para un ratu na skina di kaya, zuai man yama mi ayó.

Esei ta último be ku m'a mira Pa Djeffi. Olivia Grande a pèrdè den orkan. Mi wela a konta mi e notisia. Ta te despues di vários dia m'a riska bai Pa Djeffi su kas. M'a keda para tur tolondrá den su kamber i weta erante di mi fli kologá na e klabu.

[p. 30]

‘Ta asina mes mester a pasa’, su kasá a konta mi. I el a munstra mi e maleta chikitu di Pa Djeffi. ‘Den su ansha el a lubidá su maleta riba mesa den kushina. I e no a resa su orashon di kustumber den misa. Ta por mes e no por a skapa.’