Kuenta pa kaminda

[p. 23]

Spiritu

‘Dindina, bai buska polis’, Pachi Feli a pidi su yu muhé. ‘Si mi mester sigui drumi bou di e ramada akí un anochi mas, romatisma ta mata mi.’

‘Papa ta kere ku e spiritu ta sali for di kushina ora e mira polis?’

‘Tur spiritu tin miedu di polis’, Pachi Feli a deklará.

Dindina a para skucha e boroto den e pidasitu kushina tras di nan kas. Bòter tabata kai kibra. Tapadera di wea tabata zona. Dindina a sinti kon su pianan a kuminsá tembla di miedu.

‘Mi ta bai bini mesora’, el a bisa e bieu. Bon nèrvioso el a mara su lensu na kabes i kore bai warda di polis na Montaña. Pachi Feli a keda wak e, te ora el a disparsé den skuridat.

Un ora despues Dindina a baha for di outo di polis i subi e pida seru kaminda nan kas ta pará.

‘Kon ta bai, Pachi?’, e polis a saludá e bieu. ‘Ta kiko ta pasa? Tin spiritu den kushina?’

‘Teribel, mi shon’, Pachi Feli a kuminsá splika. ‘E kos akí ta molestiá nos ya ta un siman kaba. Anochi mi n' por drumi. Pober Dindina ta keda lantá henter anochi den kamber. Mi shon por kore ku e spiritu?’

‘Mi ta hasi tur loke mi por’, e polis a primintí ku kara serio. ‘Ta unda e kushina ta?’

Dindina a munstra e polis, miéntras e mes a para tembla di sustu. E polis a pasa den sala, bai patras i habri e porta mankaron di kushina. Mesora tur boroto a stòp.

E polis a drenta den kushina i wak tur kaminda. Tabatin algun bòter tirá na suela. E di: ‘Dindina, mi ta bai purba un be mas, pasobra mi no ta kere...’ Pero e polis no a finalisá su frase. El a sende un sigaria i sinta warda un ratu.

Djis despues boroto a bolbe kuminsá den kushina. E polis a kohe su flashlight i kamna riba su punta di pia, bai na e porta di kushina. Asina el a dal e porta habri, el a tira lus tur

[p. 24]

kaminda. Tres djaka grandi a bula for di mesa i disparsé tras di algun kaha bashí.

‘Mi shon a mir'é?’, Dindina a puntra e polis, ora esaki a sali for di kushina.

‘Klaro’, e polis a kontestá. ‘Tabatin tres. Nan ta masha mahos. Pero aki poko dia tur tres ta disparsé. Nan a spanta, asina nan a mira mi.’

‘M'a bisa bo, Dindina’, Pachi Feli a bolbe tum'aden. ‘Polis ta yuda semper. Mi shon ta dal un kos pa kenta kurpa?’

‘Nò, Pachi. Masha danki. Pero... Dindina, tende un kos akí. Si mañan bo bai Punda, kumpra dos rateval grandi. Pasobra ademas di e spiritunan, tin algun djaka tambe den kushina.’

Dindina a primintí ku e ta kumpra rateval i e polis a bai.

Un siman despues e polis a pasa dal un buèlta p'e informá kon a para ku e spiritunan.

‘Mi shon sa’, Pachi Feli a kontest'é ku kara masha kontentu, ‘nos tin kuater dia ku nos no ta tende nada mas. Parse ku e demoñonan a laga kai.’

‘I bosnan a kue poko djaka?’

‘Djaka? Ahan, sí. Dieskuater. Pakiko mi shon ta puntra?’

‘Pa nada.’

Feli a gradisí e polis mashá i bis'é ku si kualke hende tin molèster di spiritu, lo e avisá e polis.

‘Ta bon, Pachi’, e polis a hari, ‘mi ta semper na òrdu.’