Logo DBNL
Kwenta pa kaminda (1968)

Kwenta pa kaminda

(1968)–Pierre Lauffer–rechtenstatus Auteursrechtelijk beschermd

Vorige

Ju Pretu

Despwes di a lesa un kantidat di buki riba e ideanan robes tokante teoria di rasa, Henri a jega na e konklushon, ku ta un nigrita pretu-blòw e mester buska, un nigrita puru i legitimo.

Sintá ku su amigu Johan den e restorant di Lim Tung, el a duna un splikashon di su problema: ‘No tin kestion, Johan. Un nigrita puru ta e ideal di un homber ku uza su sintí. A keda probá, por ehempel, ku ta e kutis di un neger so ta forma protekshon kontra rajonan di solo. E manchanan ku un blanku ta hanja riba su kweru, asina e jega na sjertu edat, ta konsekwensha di solo. Mi konose un nigrita di sesenta i sinku anja. Te ainda su kara ta lizu; su kurpa na luga. Tuma nota ku e muhe ku mi ke men a hanja ocho ju. B'a kompronde ki mi ke man?’

Johan ku tabata sinta hunga ku e senisero riba mesa, a hisa kara i observa: ‘Pero kon bo ta hasi pa hanja un nigrita puru awor aki na Corsou? Tur hende a meskla riba e luga aki durante varies siglo’.

‘Kisas por tin algun ainda. Ami ta kere ku mester tin’.

‘I kiko bo hendenan lo opina? Pasobra t'ei ta sinta e baina grandi’.

‘Kiko bo ta insinuá?’

‘Bo tin koló basta kla i...... bon kabei, manera nan sa bisa’.

‘Koló ku kabei ta gran chambonada. Por sjertu ami ta konsidera esei un degenerashon. Bo sa masha bon ku hendenan ku a bai biba na partinan friw a hanja falta di sufisiente solo. Pesei nan kweru a blikja. Nan a degenera. No tin nada mas mahos ku un blanku ku pasa kwarenta anja. I bon mirá, bo por splikami ta pakiko hombernan tin tantu lokura pa buska nigrita? Bo no sa anto ku tin turista amerikanu ku a sali for di Merka, bai te Paris, pa buska nigrita pa nan drumi ku ne?’

‘Un bon nigrita kurpa será ta e miho muhe ku un homber por tin den kama!’

‘Até. Ata bo mes ta papia bo sintimentu. Ta nifika anto, ku un kaminda skondí den nos sesu nos ta realisa ku e nigrita ta superior. Ta tur kaminda ta meskos. Aki na Corsou i na Merka tabata asina, ku e blanku por tin su esposa blanku, pero e tabatin su nigrita ku en realidat por a dun'e satisfakshon kompletu. Mi no tin mester di menta nomber. Corsou ta jen di e kasonan ei’.

‘Bo no tin mester di baha bo nervio riba mi, palu. Si bo papia ku kalmu, tambe ta bon’.

‘Johan, mi mester trata na bolbe na e estado ideal. Mi persona degenera mester sublimá atrobe. I pa mi logra esei, mi mes mester pone e prome paso. Mi persona por kuminsa sublimá den mi ju. Despwes mi ju ta pone e di dos paso, mi njetu e di tres paso. Asina ei gradualmente mi persona por bira mas neger, mas perfekto’.

‘Bo teoria ta zona masha interesante. Ma kon bo ta hasi ku e mentalidat di nos pueblo?’

‘Ki karaho mi tin ku nes ku e mentalidat estupido ku nan tin. Ami ta bai buska e nigrita di mas pretu ku mi por hanja. Esun di miho kurpa, di mas será i mas salú ku mi por topa. Pa mi stim'e, kasa ku ne i traha un ju pretu ku ne’.

‘Exito, parna. Pero bo famianan lo butabo balia keke. Komprende un kos bon, Henri. Si bo tin un nigrita ta diberti ku ne......eh......bueno, esei nos por bisa ku ta normal. Pero kasa ku un mierde asina, esei ta otro kos.

Henter sosiedad, esta loke nas ta jama sosiedad, ta bira lomba pa bo. Nan por tolera un neger. Pero no mas ku esei. Ora bo presenta ku un konjo pretu, lo bo sinti kiko ta nifika deskriminashon kamuflá’.

‘Bo ta bestia’.

‘Bestia no, bru. Praktiko. Mi ta mira realidat. Den nos aki bisá. Ami ta kontentísimo ku mi tin un tiki koló ku kabei. Kon ku bai bini mi ta gradisidu ku mi mama a hanjami ku un blanku’.

‘Johan, ta pasobra bo ta mi amigu, mi por bisabo loke mi ta pensa. Bo mama a putja ku un blanku. Ki honor e blanku a duna bo mama? Bisami. Kwa? El a keda un kriá pendew. Ora e no por a satisfase e tata mierde di bo mas, e buchi ponchi a bin biba ku ne. Ta ganja mi ta ganja?’

Tur, e ora ku Henri tabata sulfurá, Johan a keda mira masha trankil ‘Bo sa ta kiko ta pasabo?’, el a kontestá despwes di un ratu di silensio. ‘Bo ta poko eksitá. Un poko bruá. Idealismo tin bo peseta. Pesei mi no ta tuma ni molester di rabia. Dal bo serbes pa bo freska bo kabes. Pasobra si bo sigui kere ko'i mariku, bo ta resulta den Montekristu’.

Henri su man a tembla ora el a pone e glas na boka. Johan a keda wak e di abow, te ora el a bolbe pone e glas bashi riba mesa.

‘Pork-chop. Batata hasá’, e Chines tras di bar a grita. For di patras den kushína un otro Chines a grita algu komo kontésta.

‘I nos ta ban dal un bwelta na Kampo?, Johan a invita Henri, despwes ku esaki a sinta marka figura ku su dede den e tiki awa riba mesa.

‘Korda warda poko plaka un banda tambe, pa aworo bo por kura e shanki ku e drip’, Henri a kort'e: ‘Te aworo’.

Johan a dal un gritu hari. Henri a pusha su stul patras i sali bai bon purá for di e restorant.

......Unda kuminsa buska?...... Unda e nigrita perfekto por ta?...... kurpa será, fwerte, salú......pechu pará, duru...... atras hanchu...... boka jen...... pretu...... pretu blow...... djente limpi, kompletu...... kweru fini, dushi, suave. Un nigrita ku por stima di bèrdè...... entregá su mes kompletu...... sin komedia...... sin mintira...... I despwes e ju! Kon lo mi jam'e?

Henri a lora drenta Columbusstraat. Apenas e tabata ripará unda e ta kamna. Blo su wowonan tabata buska tur kaminda. Kada nigrita den kaja tabata pasa un prueba visual sin ku nan sa.

Sin paga tinu Henri a baha den kaja. Un auto a raska pasa banda di dje. Di sustu e shafer a grit'e: ‘Konjo. Mira unda bo ta kamna!’

Henri a reakshona spantá i bula riba asera...... Unda e nigrita di awor ei a keda? Ahan, at'e ta bai aja. No! E n' ta sirbi. E tin meskla blanku. Bo ta nota mesora. E makaku ta strika kabei...... E animal no sa kon na Europa masha hopi hende ta gusta kabei peper...... Pushkin tabata orgujoso ku e ta desendiente di neger...... Ta kiko e kaka sa di Pushkin?

Madurostraat......

Den e pakus ei por tin algu? Esei......? Mes pendehada. No. Muchu seku......

Aki den? Ata un pará na e otro banda di kaja. Tampoko no t'e kos. Su sanka ta plat...... kara bobo......

Henri a sigui kamna. Den Heerenstraat. Riba Awasa di Punda. Den Breedestraat. Despwes pasa den Pietermaai. Penstraat. Nieuw Nederland. Cher Asile. Marie Pompoen.

Banda di och'or di anochi el a jega kas i kai morto kansá riba su kama, sin sikiera kita panja. Un ratu despwes el a pega sonjo.

Tambu! Tin un tambu ta zona. Su ritmo ta subi, te bira riw di zonidu razu. Un nigrita ta balia su dilanti. Blo sunu. E kurpa. E brasanan i e pianan ta trose manera kolebra. Esta bon bo ta. Sigui sagudi. Bo pechunan no ta tembla sikiera. Na e pechunan ei un ju pretu lo bebe lechi te harta. Tambu, no para awor aki.

Balia, nigrita. Move bo kustía. Mea. Suta tera ku bo plant'i pia. Mi ke pasa mi man riba bo kurpa, pasa mi boka riba bo kutis. Bo sodó ta butabo lombra. Mira kon pipita di sodó ta kore di bo kara i kai riba bo pechunan. E sodó ta buta bo bikinan lombra manera perla. Mi ke bo manera bo ta. Salvahe. Krudo, sin puiru, sin pintura, sin peluka, sin mintira. Jega serka, pa mi primibo, pa mi sinti bo karni. Pa mi stimabo den mi delirio. Pa bo dunami......

‘Un ju pretu!’ Henri su gritu den silensio di anochi a buta tur hende den kas bula lanta. Su mama a kore drenta kamber, su tras e tata i e dos rumannan muhe.

‘Ta kiko a pasa?’ e mama a puntr'e bon spantá.

Henri a sagudi kabes. ‘Nada partikular. Lo m'a son ja’.

‘B'a grita manera hende den ansha’.

‘Bai drumi numa; mi ta kere ta pasobra m'a drumi stoma jen’.

‘Boltu bo kusinchi’.

Henri a grunja i nan a sali bai drumi. Ku masha trabow Henri a bin logra pega sonjo atrobe.

 

Solo tabata basta fwerte ainda ora Henri a sali for di ofisina. Un poko fadá el a para den e fresku parti pabow di su ofisina i wak trafiko. Den esei a dal na su sintí pa bai keiru den Otrobanda. Mesora el a tumba pabow, krusa brug i pasa den Kaja Grandi di Otrobanda.

Ku su pensamentunan fihá riba su ideal, el a bolbe sigui baluá kada nigrita ku a pasa den kaja. Kamnando di tal manera el a bin resulta te na Kas Chiki. Ei el a kansa i buska un luga di sinta sosega. Ma komo no tabatin ningun kaminda di sinta, el a lèn kontra di muraja di un kas i sende un sigaria.

Zonidu di un par di pargata lastrá a hala su atenshon i sak'e for di su pensamentu. Dos pal'i pia pretu bon formá ta prome kos ku su wowonan a topa. El a hisa kara i mira e kurpa ankrá den un shimis barata di katuna. E brasanan tabata jen. E garganta limpi. Kara lizu. Boka jen, orgujoso.

Henri a kita kurpa for di e muraja i sigui wak e parti patras di e nigrita sigun e mucha muhe a sigui pasa bai. E atras tabata burdugá bow di e

bistí. Dos bola baliando bow di un sintura delega. Henri por a grita di kontentu.

Disididu el a hinka tras di e nigrita. No a tarda muchu ku e nigrita a ripará ku Henri ta sigui kamna su tras. El a drei mira Henri, sonrei (esta poko djente blanku) i drenta un di e hanchinan di Marchena. Henri a pega su tras.

Despwes di a pasa den dos kaja, e nigrita a para di golpi i puntra Henri ta kiko e ke.

‘M'a namora di bo’, Henri a kontest'e.

E nigrita a wak e di su kabes te su pia i dal un harí masha kanaja.

‘Shon konose mi anto?’

‘For di e momentu ku m'a mirabo, m'a realisa ku ta ku bo mi tin ku kasa’.

‘Ata. Ta den ki mi ta hanjami aki?’

‘Lo mi splikabo tur kos’.

‘Pero ami no tin idea di kasa ainda. Ta binti anja mi tin’.

‘Mi n' bisa ku mi ke kasa mesora. Nos mester konose otro prome’.

E mucha a pone man na kabes i keda mira Henri komo si fwera ta hende loko a papia ku ne.

‘Ma bo no a topami nunka prome’.

‘Mi sintí a bisami ku bo ta mi ideal’.

‘Ideal di kiko awor, shon?’

‘Di mi bida’.

‘Esta baina. Awe si m'a topa. Ki jamabo?’

‘Henri’.

‘Ju di Corsou bo ta?’

‘Di mi kabes te mi pia’.

‘Anto b'a gustami’.

‘Si. Tur ku por tin. Unda bo ta biba. Unda bo ta traha?’

‘Aki den Marchena, serka mi ruman muhe. Mi ta traha serka shon Elena, den Pietermaai. Bo n' sa e kas kòrá ku trali blanku?’

‘Mi ke ku mi sa ta unda. I ki jamabo?’

‘Ami? Amelia. Pakiko bo ke sa tantu kos asina?’

‘Mi tin ku sa tur detaje tokante esun ku mi ta bai kasa ku ne’.

‘Ata. Bo kabes no ta parew. Ta kiko b'a gusta na mi kurpa’.

‘Tur kos’.

Kasi mein ora Henri ku Amelia a para kombersa. Na kuminsamentu e nigrita no muchu inteligente a hanja henter a kaso masha stranjo. Tur su kerementu tabata ku Henri ta busk'e pa kama. Pero gradualmente Henri su konvikshon a but'e realisa ku aki no ta wega tabatin. I ora nan a jama otro ajo na final di e kombersashon, Henri tabata sa ku su manise lo e kompanja Amelia bai kas, for di den Pietermaai te Marchena.

Atardi Henri a kumpra un tableta grandi di chukulati pa Amelia, i tumba bela jen pa Pietermaai. E nigrita tabata nèchi penja i limpi bisti ora Henri a jega na porta di kura.

Sigun nan tabata kamna bai pabow, Henri a kuminsa splika e nigrita

gradualmente kon su ideal ta. Amelia no por a kompronde absolutamente nada di loke Henri a papia. Den su simplesa e tabatin un deseo so, esta di waja e prome chispa di amor ku e jonkuman ku kolo kla i bon kabei, te ora e bira un vlandam ku ta hib'e kama. I sigun Henri tabata filosofia bai, Amelia tabata admira su nanishi para i su boka bon forma, su wowonan i su flus. Por sjertu ora Henri a karisja su brasa djis un tiki, el a sinti ku algu den su kurpa a kontesta mesora.

‘Ajera m'a lubida di kontabo, ku shon Elena a pidimi pa keda drumi’, el a konta Henri. ‘Asina ei mi por juda na mesa mainta. Shon Elena su kasa ta masha fastioso, bo sa’.

‘Den ki sentido?’

‘No loke bo ta pensa, pero, bo n' sa fastioso? E ta masha pertinent. Si tin un krenchi wiri-wiri di pan riba mesa, ja e ta reklama. Bo mester wet'e kamna. Kabes ta jen di porkeria’.

‘I unda bo ta hanja un kwarto?’

‘Patras den kura tin un kas ariba ku abow. Abow mi sa laba panja. Mi ta hanja esun ariba pa drumi. Mi ta hanja mi kuminda tambe tres pe pa dia.’

Henri a hanja ku no ta mal idea. ‘Ademas bo ta spar bo sen di bus’, el a observa.

‘Esei ta berde. Anto e kamber ariba ta fresku, bo sa. Ju, bo mester sinti kon dushi e fresku di laman ta’.

Na e mes un punto ku nan a para kombersa e dia prome, nan a bolbe papia riba e mil i un temanan konosi entre enamorado. Na un momentu ku ningun hende tabata pasa Henri a sunchi su frenta i jam'e bonochi. Amelia a sinti kla kon den cu barika algu a ranka i trose. El e keda wak Henri te ora el a disparse for di bista.

Su sinti a keda tur bruha di tur e kosnan ku Henri a kont'e. Pero den su kurpa un kandela a kuminsa sende. Difisil tabata pa e kompronde kon e mucha homber asina bon tipo tabata trat'e tantu desente. Ni un momentu so el a papia kos di fresku. E no a bisa nada di dobl sentido. E no a mishi ku su pechunan. E no a menshona nadi di kama. Anto Icha, un amiga di dje i un nigrita meskos ku ne, a kont'e kon un mucha homber a gati'e, prinj'e den menos ku dos luna ku nan a frei. Despwes e mucha homber a bai lagu'e. Pero esaki tabata un homber fini, masha korekto. I tur e kosnan stranjo ku e ta papia. Lo e ta bon studia i di bon famia. Ma di kon anto, no obstante tur e finura di Henri, sinembargo ja kaba mi ta sinti algu stranjo den mi kurpa?

Amelia a hanja un kama, un kashi, un mesa i dos stul pa su kamber den kura. Tabata muebel biew ku shon Elena no ta uza mas, pero nan tabata na bon estado. Amelia a laba nan, lombra nan ku was i limpia henter su kwarto. Pasobra anochi su Henri lo bin hasi su prome bishita. Tur kos mester ta limpi.

Amelia a piki poko flor di trinitaria den kura i pone nan den un botr di djem riba mesa. Komo shon Elena a laga pasa un waja te den su kwarto,

Amelia tabatin lus elektriko. Un pera di diessinku watt i sin pantaja tabata kologa mei-mei di plafon.

Nunka di su bida Amelia tabata asina kontentu. El a laba panja ku furia, i for di diesun or di mainta ja tur kabuja tabata karga ku panja laba. Pa e no tin mester di sinta pornada tramerdia, Amelia a bolbe pasa un basora den tur kamber di shon Elena su kas. Pero for di kwat'or el a stop di traha, p'e bai banja penja i spera Henri. Para den e zim grandi di awa den huki di su kamber el a karisja su pechunan i papia ku nan.

‘Bosnan tur dos lo bira di mi Henri, di mi junan. Bosnan lo primi riba Henri su kurpa, p'e sinti ku mi ta muhe. I despwes bosnan lo jena ku lechi, pa mi junan bebe kwantu ku nan ke. Awe nochi lo mi primi bosnan kontra di su pechu, ora e sunchi mi, p'e mira kwantu mi ta stim'e. Hahai! Mi sa ku e ta stimami. E tin idea serio. Si e pidimi pa habri mi blusa, lo mi habri'e i munstr'e bosnan. Si e pidimi pa drumi ku ne, mi ta drumi mesora ku ne. Lo mi entrega mi mes sin miedu, pasobra mi stim'e’.

Alegremente el a sigui banja, kantando: ‘Mi ta stim'e. Mi ta stim'e’. I riba ritmo di su kansjon improvisa e tabata primi su bikinan di tete.

Henri no tabatin mester di fleit dos be, pasobra for di prome be Amelia a saka kara na bentana. Henri a drenta pa porta di kura i kore subi trapi, bai den kamber di Amelia.

Maske kwantu brio Amelia tabatin, ora Henri a kwe brasa i sunchi'e rondo di su kara, el a keda para ku miedu, sin sa kiko bisa ni hasi.

‘Mi amor, m'a trese esaki pa bo’. Henri a munstr'e un estuche ku un par di renchi di orea.

‘Pa mi esakinan? Esta bunita’.

‘Bisti nan mesora, pa mi mira kon nan ta kedabo’.

‘No ta miho mi warda nan pa diadumingu?’

‘Ki dia ku bo bisti nan, ta diadumingu pa mi. Bisti nan numa’.

Amelia a pega e renchinan na su orean i koketea ku su kabes.

‘Presioso, mi bida’, i Henri a tapa tur su kara ku sunchi atrobe.

‘Pero...... Henri. Pakiko bo ta stimami tantu asina?’

‘No puntra. Ademas amor nunka ta exigi splikashon’.

‘Si, pero......’

‘B'a drecha bo kama masha bunita’.

E palabra kama a buta Amelia sinti su mes bira un tiki zonzo un ratu. El a kalkula ku Henri lo sigui papia riba e kama. Ma Henri a kai sinta riba un stul i observa ku e zonidu di laman ta masha agradabel.

Te dies or nan a keda sinta serka otro. Nan a papia, sunchi i brasa mientras kada un su alma tabata rementa di alegria. Ki ora ku Amelia a hanja okashon, el a primi su pechunan kontra di Henri su kurpa, sperando ku Henri lo reakshona. Pero Henri a domina su mes.

‘M'a komprendebo, Amelia’, el a bisa e nigrita. ‘Pero ainda e momentu no a jega. Mi amor pa bo ta butami respetabo. Ta por mi no por manchabo prome ku nos kasa’.

Amelia a kita kara jen di berguensa. Tantu respet e no a spera. E pober no por a kompronde e amor eleva ku Henri tabata dun'e. Despwes ku

Henri a bai kas, el a keda drumi lanta riba kama basta ratu, pensando, deseando. Pa baha su deseo el a hinka un kusinchi mei-mei di su pianan i primi su belnan riba dje.

‘Henri. Henri. Mi kurpa ta pidi......’

Mainta Amelia a laba e slopi kologa e kusinchi na solo.

 

‘Sigun mi ta tende, bo tin un asuntu ku un kria nigrita’.

Henri a buta kuchu ku forki riba mesa, i hisa kara pa tende loke su mama ta papia. Su tata a sigui kome, aparentemente desinteresa. Pero Henri a ripara ku man di su tata tabata tembla. Su dos rumannan muhe sinta na mesa a wak e di abow.

‘Mi di ku mi a tende ku bo tin un asuntu ku un nigrita mahoso, pia di tera’, e mama a ripiti ku asko den su stem.

Henri a pensa prome ku e papia. E no kier a ofende su mama, pero e no por a pensa mesora kiko e bisa.

‘Nigrita mahoso’, e mama a bolbe ripiti ku ainda mas despresio den su stem.

Henri a domina su mes tantu ku e por i kontesta: ‘Mahos i bunita ta masha relativo. Inteligensia tin ku disidi. Ignoransia ta obra unikamente a base di sintimentu’.

‘No bini ku bo filosofianan’.

‘Hende, generalmente, ta destina pa pensa’.

‘Pensa soketada manera bo ta hasiendo awor aki. Mete ku un nigrita ta soketada. Perdementu di tempu. Kon bo por rebaha bo mes asina? Mi ke sa kiko Sarah i Rebecca, mi rumannan lo pensa ora nan tende e kos aki’.

Henri por a rementa, pasobra rapidamente a pasa den su sinti loke a sosode dia e tabata mucha di nuebe anja. Su mama a manda e ku su ruman muhe majo bai bishita nan tawela, riba un diadumingu atardi. Henri a korda kla kon e ku Elsa su ruman a sinta den balkon di e kas grandi di su tawela. Un kria a bin sinta kombersa ku nan. Su tawela a pasa den sala di e kas na su pidjama. E tabata kamna tras di un pushi pretu, ku un tajo ku lechi. Ni un momentu so e tawela a kuminda nan. Henri a bolbe mira e homber blanku ta kamna tras di e pushi. E tabatin mas amor pa e pushi ku pa su njetunan. T'esei tabata e homber ku a duna su wela barika dia su wela tabata traha komo kria na e kas ei. T'esei tabata e homber blanku ku nunka a kasa ku su wela. T'esei tabata e sinberguensa, tata di Sarah ku Rebecca. Tabata na su punt'i lenga pa bisa ku Sarah ku Rebecca ku tur sobra por bien bai den konjo. Pero el a guli manda bow i kontesta unikamente: ‘E muhe ku den su bobedad entrega su mes, sin matrimonio na un blanku abuzador, ta komete prostitushon’.

Mas skerpi e kuchu no por a korta. E mama i e tata tur dos a kompronde mesora kiko Henri ke men. E tata a guli, i keda ketu. E mama sinembargo tabatin mas brio: ‘Bo mester mira kada kos riba su mes’.

‘Corsou ta jen di fachada’, Henri a responde. ‘Masha hopi hende ta biba tras di un kortina di fantasia. Si kada hende realisa kiko nan perso-

nalmente komo individuo ta bal i presta, nan lo tabata felis en realidad. Awor aki nan ta sigui fia di un grandesa ku nunka tabata existi den e hombernan ku tabata origen di nan existencia, a base di abuzu. Ademas tur loke ta blanku ta degenera. M'a mira nan na hopi luga i semper m'a hanja gana di saka, i skupi riba nan’.

‘Ta basta awor’, e tata a kai aden. ‘Mi por jega na kompronde ku kisas fisikamente un nigrita ta atraktivo. Pero ku mentalmente nan bal algu... esei mi ta duda’.

‘I Pushkin? Ralph Bunch? Washington Carver?

‘Exepshon, nada mas’.

E mama a bula den: ‘Pena la bida bo trese ningun nigrita den mi kas. Mi ta kore ku ne’.

Henri a realisa ku aki ja no tabatin rasonamentu posibel. El a lanta for di mesa i tira su ultimo flecha: ‘Afortunadamente un kantidad di mama pretu no a mata e junan degenera ku nan a pari ku blanku. Pasa bon’.

E no a para skucha sobra komentario. Mesora el a kohe tur su panjanan, sali for di kas i bai biba na un pension.

 

Henri a kuminsa spar tur loke e por, pa kumpra muebel pa su kas. Na Montanja nan a priminti'e un kas di tabla i el a konta Amelia di dje. Pero Amelia a bis'e ku e ke sigui traha algun luna serka shon Elena, despwes ku nan kasa, pasobra e no ta gusta sinta ketu. Henri a bai di akwerdo ku ne.

Pero e problema grandi tabata e konsentimentu di Henri su grandinan, pa por kasa. Henri tabata sa ku nan lo nenga redondamente. Ma ora el a bin sinta pensa bon, el a relisa ku en realidad no ta existi problema. Siendo franko manera semper, el a konta Amelia esei.

‘Pero, Henri, kon nos ta hasi pa kasa anto?’

‘Fasil. Nos mes ta kasa nos kurpa’.

‘Ta ki pantomina bo ta papia?’

‘Ken a bisabo ku no por? Ta un homber i un muhe ta kasa nan kurpa. No ta e pader. Tur loke a pader ta hasi ta duna bindishon’.

Amelia su wowonan a span asina grandi.

‘Tende un kos aki, mi amor’, Henri a trankilis'e. ‘Mi sa ku bo no a tende di e kosnan aki. Pero ta sina ta’.

‘Di berde mes?’

‘Manera m'a bisabo. Mira aki. Nos tin sinku luna ta namora. Mi tin e plaka pa kumpra muebel. Wel, mi ta propone pa nos kasa dia 27 di september. E ta kai riba un diasabra. Aki tres siman. Aki den mes nos ta kasa’.

Amelia a keda mir'e i purba di bisa algu.

‘No. Bo no tin nodi di duda ni kibra kabes. Aki den nos ta kasa. Diesdos or di anochi. Mi ta kumpra un bunita bistí blanku pa bo’.

Di ripiente Amelia a mira den su fantasia un bisti blanku tur na máncha di sanger. I na e mes momentu ku el a sinti un ola di plaser korta den su kurpa, a pars'e ku un dolo skerpi a buta su barika tembla.

Tres siman largu, tur dia despwes di sink'or, Henri ku Amelia a drecha e kwarto. Henri a ferf e murajanan i e flur. Amelia a kologa kortina i algun kwadro barata na muraja. Henter e kamber tabata hole limpi.

Dia 25 di september Henri a kumpra un flus nobo i e bistí blanku pa Amelia. El a trese un botter di shampanja, dos glas i su tape-recorder, riba kwa el a graba Marcha Nupcial di Lohengrin. E kama a hanja laker ku slopi nobo i un sobrekama berde ku fleko.

Mientrastantu shon Elena tabata sigui tur e moveshonnan ku atenshon. I komo su boka tabata gusta redu, e ku su amiganan tabatin basta komentario, ora nan ta sinta kombersa den stupi.

‘Anto ta un mucha homber di bon famia’, shon Elena a observa.

Serafiná, sintá su dilanti, a sagudi kabes. ‘Masha tristu mes’.

‘Bo n' ta kere ku e nigritanan ta hasi brúha, pa tene homber na nan kurpa?’

‘Lo ta. E kriá ta ku barika?’

‘Mi no ta mira nada’.

‘Henri sa keda drumi serka dje?’

‘Nunka. Prome ku diesun or e sa bai. M'a para skucha tras di jalusi varios be’.

‘Ami no ta kompronde kiko Henri por ta mira den un kriá nigrita’.

‘Ami tampoko. Su mama sa di e asuntu ei?’

‘Ai si. E pober ta sufri masha. E no a kere nunka ku su ju homber por a mete ku nigrita. Ma bo sa ki t'e kos? Mi ta kere ku nigritanan ta hasi tur sorto di porkeria ku homber. Pesei hombernan ta pega nan tras. Bo no ta korda ku m'a kontabo kon Jorge mi kasa a mete ku e kriá ku nos tabatin? Ju, m'a reis riba nan den banjo. Mi no ta lubida nunka mas e posishon mahos. Un nigrita duru pretu, ku un atras onbeskop. Che. M'a zundra Jorge, i kore ku kriá mesora’.

Den e kwarto patras den kurá e dos palombanan tabata namora, sin por a tende opinion di e dos muhenan den stupi.

 

Dia 27, for di sink'or Amelia tabata penjá, bistí. Den su kabei el a sprengu un tiki kolonia for di un botter ku Henri a regal'e. Su kurason tabata bati te den su garganta. Pensamentu riba su Henri a buta ku el a muha pápa, di moda ku e mester a kambia su karson. Tabata parse mintira ku tempu a pasa asina lihe. Sinku luna pasá el a konose Henri. Awe nochi porfin lo e por uni kompletu ku Henri, sinti Henri riba su pechunan, sinti Henri den su kurpa. I el a kuminsa repasa den su sintí loke Icha a sinj'e: ‘Si bo ta stima bo homber, entrega bo mes kompletamente. Chupa su lenga. Lagu'e mansa bo tetenan, chupa nan, te ora bo sinti henter bo kurpa ta trose. Percura pa bo ta bon muhá. Esei ta hasi e kos mas fasil’.

Pashon a bolbe lanta ku Amelia, i el a kuminsa frega su belnan riba otro. Ora, pasa. Pasa lihe, pa jega diesdos or. Mi ke Henri. Mi ta desea Henri. Mare e por prinjami awe nochi mes......

Algu despwes di shet'or Henri a jega. Amelia a bula riba dje i primi'e kontra di su kurpa. El a sinti deseo di morde Henri su kara, pasobra

Henri a keda masha bunita den su flus nobo.

‘Djis aki, mi amor’, Henri a kalm'e. ‘Djis aki bo ta hanja tur kos. Ata m'a trese un nasi-goreng pa nos kome’.

Amelia tabatin hamber, pero a pars'e ku e no por guli. Tur nervioso el a pone e kumínda den tos tajo, i nan a kome. Djei Henri a sende su radio di bateria. Nan dos a sinta den brasa di otro, skuchando muzik i mirando laman. Pero Amelia no por a sinta ketu. Su paden ja tabata herebe. El a primi su pechunan riba Henri i frega su bel mei-mei di Henri su pianan.

‘Mi amor’, el a kuminsa jora Henri. ‘Aki un par di ora nos ta kasa. Ki diferensha ta hasi si nos hasi'e awor aki? Mi tin gana. Butami riba kama, mi amor’.

‘Ni maske bo kurpa ta na vlandam, mi no ta hasi nada prome ku nos kasa’.

‘Pero mi ta kajente, mi amor’.

‘Mi tambe. Warda un ratu mas’.

‘Maske ta djis un tiki, mi bida’.

‘Ni tiki ni taka. Aworo bo ta hanja sufisiente’.

Amelia a pega su kabes kontra di Henri su pechu i sigui keha. Pero ni maske kiko el a hasi, Henri no a komplas'e.

E oloshi grandi den hadrei patras di shon Elena su kas a bati diesun or.

‘Un ora so mas’, Amelia a bisa Henri, i su deseo teribel a but'e primi Henri manera hende desespera. Djei el a hinka su lenga den Henri su boka, sera wowo, i gosa kon Henri tabata chupa su lenga. Un ratu Henri a laga su mes dirti den pashon. Pero asina el a mira ku Amelia a kuminsa tofer na su kil di karson, el a lanta para, bai wak laman den bentana.

‘Rabiá bo ta?’ Amelia a puntr'e.

‘Ni un ora so’.

‘Pakiko b'a lanta anto?’

‘Kada kos na su ora. Ma tende un kos aki, mi amor. M'a kontabo i splikabo tantu kos tur e lunanan ku a pasa. Awor aki ta falta un ora pa nos kasa. Prome ku e momentu desisivo jega, mi ke hasibo un sorto di...... eh examen’.

‘Examen di kiko, mi bida?’

‘Mi ke sa ku bo ta realisa kiko ta bai sosode’.

‘Nos ta bai hasi kos masha dushi’.

‘Bo no ta pensa otro kos?’

‘Ma ta bo mes ta butami bira kajente, mi prenda’.

‘Basta. Bo sa pakiko mi ta kasa ku bo?’

‘Ata bo sa kaba. Pasobra nos ta stima otro’.

‘I pakiko ami ta stimabo?’

‘Mi ta bo nigrita ideal’.

‘Exakto. Pakiko mas?’

‘Bo ke un ju pretu’.

‘Presis. Sigui’.

‘Eh...... un ju pretu...... ku ta abo...... pero mas neger...... pa asina bo persona...... mi amor, mi no ta korda mas. Pakiko bo ta papia tantu

kos stranjo asina? Ata nos ta stima otro hopi kaba. Mi bida, djis aki, ora bo kibra mi senjorita, mi ta tenebo duru den mi brasa. Asina Icha a sinjami. Maske kwantu dolo mi sinti, mi ta keda primibo den mi kurpa. Anto e dushi ta buta e dolo pasa. Anto mi ta sera wowo, habri mi......’

‘Stop ku ko'i loko awor aki. Mi ta papia kos serio’.

Amelia a spanta djis un ratu, ora el a mira kon Henri su kara a sera. I masha sumiso e di: ‘Papia numa, mi bida’.

‘Pa mi persona hasi e prome paso den e direkshon di sublimashon. Pa mi, i despwes ni njetu bira mas neger, mas legitimo, mas noble’.

‘Si, mi amor’.

‘I ken ta kasa nos?’

‘Nos mes ta kasa otro’.

‘Kiko bo mester splika nos ju, si akaso mi muri prome ku e bira grandi?’

‘E mester kasa ku un neger pretu-pretu, pa e pone di dos paso’.

‘Bo ta bon. Awor, kiko ta nifika amor?’

‘Amor? Wel, entregá bo mes kompletu i lubida bo mes den e persona ku bo ta stima. Ta bon asina?’

‘Tur bon ku por tin’.

‘Pero tin un kos ku ta preokupami’.

‘Kiko?’

‘Bo hendenan’.

‘Mi ta hasi loke ami ta hanja bon. Mi hendenan no por dirigi mi destinu’.

‘Pero supone ku aworo nan bin zundrami, ofende mi ju. E kos ei mester ta teribel’.

‘Biba bo propio bida, i ignora hende estupido’.

‘Bo ta bisa asina. Pero kisas nan por amargá mi bida’.

‘Basta papia nonsens. Buta e shampanja ku e glasnan riba mesa. Nos momentu ta aserkando’. Amelia a buta e botter di shampanja den su baki di ijs i e glasnan riba mesa. Pero mientrastantu tabatin un orkan den su pensamentu. El a hanja ku Henri ta pinta tur kos masha bunita. Pero Henri tabata lubida kon hende bibu ta. Ata shon Elena mes a tir'e un palabra riba Henri, ora e tabata den kushína. Ai, mi Dios, ta kiko mi ta hinka mi kurpa aden? Tur Henri su famianan lo bandon'e. Nan lo lastrami na werki. I si mi hanja un ju, e kriatura lo por pasa mal bida......

Amelia a wak Henri pará den bentana, i bira drecha e sobrekama. E kier a hasi algu, ki ku ta, pa kalma su nervio.

‘Kwartu pa diesdos’, Henri a avis'e despwes di a wak ora na su oloshi di man. ‘Paga lus’. A parse Amelia ku Henri su stem a zona di masha lew. El a drei e pera di lus, i keda para un ratu inmovil den skuridad.

‘Bin para serka mi den bentana’, Henri a bis'e. Amelia a kamna jega serka. Henri a tene su man i hal'e den kurpa. El a sinti kon Amelia su kurpa tabata tembla.

E olanan tabata sapatiá kontra di kosta. Nan zonidu tabata dushi, tran-

kilisante. Te alew aja un bapor tur na lus tabata pasa. Shelu tabata jen di strea.

E dos amantenan a keda para den silensio, mirando e bista maestoso di shelu ku laman.

Un pa un e slanan dje oloshi den hadrei a anunsia diesdos or. Ku masha seriedad Henri a tene Amelia su man, wet'e den su kara i puntr'e: ‘Amelia, bo ta aseptami komo bo esposo, den tur felisidad i kontratempu di bida, te na morto?’

Amelia a guli skupi i kuminsa tembla mas tantu. Ku emoshon enorme den su stem el a kontestá: ‘Si, Henri mi amor, mi ta aseptabo. Ku henter mi kurpa, henter mi alma i tur loke mi tin. Mi pechunan ta di bo, mi kurpa ta di bo, mi barika ta di bo. Bo Amelia ta henteramente di bo, te dia Dios tumami’. Amelia a sinti kon lagrima a kuminsa basha for di su wowonan. I den su vlandam di deseo, el a benta su kurpa den brasa di Henri. Pero Henri a kalm'e i bis'e, ku awor e mester hasi e pregunta.

Amelia a tuma un kurashi i puntra su amante: ‘Henri mi bida, bo ta tumami pa bo esposa den tur kos te na morto?’

‘Si, Amelia. Mi ta aseptabo. I lo mi sigui proba mi amor pa bo te ora morto sera mi wowonan’. El a brasa e nigrita temblando i bis'e den su orea: ‘Awor sí nos por bai kama. Ban kita panja’.

Ni un minut despwes nan tabata lora banda di otro den kama.

Streanan a mira.

Olanan a tende.

E dos glasnan ku e tiki shampanja sobrá a tembla riba mesa...... sigun e flur a tembla...... sigun e kama a tembla i keha.

 

Na skina di Duana Johan a topa ku Henri.

‘Karamba, bru, mi por a paga plaka pa mirabo. Ta unda b'a hinka bo kurpa?’

‘M'a kasa’.

‘Laga di ta pompa. Ku e nigrita?’

‘Klaro’.

‘Esta baina. I kon e ta den kama?’

‘Esei ta mi asuntu’.

‘Mira aki, palu. Ta kiko a pasabo. Ja e mierde a hasi brúha pa bo, butabo bira chocho?’

‘Stop ku bo ofensanan, Johan. Komportabo serio’. Johan a grita hari i puntra ta for di ki dia tabatin e presioso seremonia.

‘Algun luna kaba’.

‘B'a prinj'e kaba?’

‘Kaswalmente Amelia a bisami antajera ku e no a mira su regla e luna aki’.

‘Fantastiko. Bo ta bon den bo karson. I bosnan a bai biba Montanja kaba manera b'a jega di kontami ku bo tin idea?’

‘Ainda no. Amelia ke sigui traha un poko mas, te ora su barika tin seis luna’.

‘Ban dal un serbes pa selebra e ko'i pendew ei’.

‘Ta dwel mi, Johan. Amelia ta wardami’.

‘Inkreibel. Mi amigu Henri a bira katibu di muhe. Esta un fieldad. Esta dedikashon. Karinjo, amor. Mira aki, Henri, bo no por laga di ta hode. Lanta fo'i sonjo, homber. Awora e muhe chombon ei ta subi bo kabes, uzabo pa feila’.

‘Mi sa kiko mi ta hasi’.

‘Wel, ami tambe sa kiko mi ta hasi. A jega poko muhe chabalitu na hotel. Bo ta djoin?’

‘Loke Amelia ta dunami ta e mesun kos, pero ku amor berdadero. T'esei ta e diferensha’.

‘Enfin, ta bo mester sa. Dibertibo ku bo nigrita’.

‘Pasa bon, Johan’.

Henri a keda wak kon Johan a drenta Columbusstraat. I e no a sinti ningun tiki dwele.

 

Amelia su sintí no tabata na su trabow. Pará banda di e mashin di laba panja, e tabata blo pensa riba Henri. A la largu e no tabata tende ni e zonidu di e mashin mas...... Tantu kos stranjo...... Henri ta stim'e ku tantu lokura...... tur anochi e ta entrega su mes na Henri...... ora largu... te ku el a sali ku barika...... E ju pretu ku Henri a desea ta den su barika...... Henri sa gusta karisja su barika... sunchi su barika....... Pero e mes no por kompronde...... Neger semper tin dwele ku nan ta neger...... Ata varios di su amiganan a buska homber blanku pa drumi ku ne. No ta pesei e mes a kai pa Henri? Henri no ta blanku, pero hopi kla...... E hendenan di Henri. Tur e kos aki por ta un komedia? E ju den su barika. Sinku luna kaba. Un luna mas e ta traha serka shon Elena. Ata shon Elena ta kombersa den sala ku un di su amiganan. Lo ta riba dje atrobe. Varios be shon Elena a tira púnja riba su barika. Pakiko? Ta ki rabia shon Elena por tin riba dje? Henri ta stimami di berde? No. Si. Si, e ta stimami. Nos ta bai biba na Montanja. E ora ei e no tin mester di soporta e punjanan di shon Elena. ‘Tin kos ku ta imposibel’, shon Elena a jega di observa. Lo e ke men e ju aki. Amelia a pasa su dos man riba su barika. I di ripiente el a hanj'e ta papia ku e ju: ‘Mi no ta lagabo pasa mal bida. Mi ta hasi loke Iris a hasi, pa e perde ju. E trapi! Mi ta subi te na mitar di e trapi...... bula bow. Ai, mi Dios, ta ken a mandami. No, mi no por. Mi tin miedu. Mi por muri. Iris a hera di muri. Mi no ke muri. Mi no ke mi ju muri. Pero kon mi ta hasi?

Kwater dia largu di pensamentu amargo a buta Amelia bira teribel nervioso. Henri tabata blo puntr'e ta kiko a sosode. Pero Amelia tabata ganja ku ta pasobra e ta korda riba e nasementu di e ju i e dolo. Henri tabata kalm'e, trankilis'e, i kont'e kon dushi nan lo pasa den nan kas na Montanja. Ma despues di kwater dia ja Amelia tabata tur tolondra. I den su ansha di nervio el a tuma un desishon.

Djis un ratu despwes ku Henri a sali bai banda di mitar di ocho mainta, el a bisa shon Elena ku e ta sinti su kurpa malu, i ku pesei e ta bai dokter

pa mira ta kiko. Kompletamente disididu el a kamna bai Plasa Brion, kwe un bus di Bandabow ku a bah'e te na kas di su tanta.

‘Ta ki bjentu a tirabo aki banda?’ e tanta a puntr'e. ‘Malu bo kurpa ta?’

Amelia a forsa sonrei i kontesta ku ta un dia liber el a hanja.

‘Di kon bo no a bini ku Henri anto?’

‘Henri tin ku traha. Atardi mi ta bai kas serka dje atrobe’.

‘Hasibo na kas. Mi ta bai den kushína. Mi tin kos na kandela’.

‘Tresten mi ta bai keiru poko, kwe fresku’, Amelia a ganja. ‘Mi tin hopi tempu sin subi riba e barankanan pabow di kas’.

‘Tene kwidow pa bo no slep ku e barika grandi ei’.

‘Mi ta kwida mi kurpa, Tanchi’.

Amelia a sali bai den direkshon di e barankanan. Su kabes tabata manera kandela, tur bruhá. El a purba resa, pero na mes momentu e idea teribel tabata pursigui'e. El a mira Henri den su pensamentu. Henri ku tabata biba den e lokura di su ju pretu. Ma el a hinka den su kabes, ku no por ta posibel. E ju aki no por nase nunka. Ta tristesa, problema so lo bini. Henri su bida lo ruina por kompletu. Dios, pordonami, el a resa, pordonami loke mi ta bai hasi. Pero mi no por otro manera. Shon Elena tin rason. Ta imposibel. Henri su idea ta imposibel.

Amelia a subi un baranka di mas o menos dos meter i para wak abow. E haltura a pars'e masha grandi. Pero el a sera wowo i bula, kai riba su pianan. Mesora el a sinti un dolo fwerte den su barika. Awa a baster for di su wowonan. Ma el a sera kurpa i kamna kasi lastrá bai kas di su tanta.

Den porta di kas el a bai lew, dal abow. E zonidu a buta e tanta kore drenta kas, kaminda el a weta Amelia drumí den un laman di sanger.

 

Atardi, ora Henri a jega, el a sinta lesa un revista riba kama, sperando Amelia jega kas. E no a bira nervioso, pasobra shon Elena a bis'e ku Amelia a bai dokter. Aunke el a hanja poko stranjo ku Amelia por a tarda asina tantu. Ma den su mes e di, ku kisas Amelia por a pasa serka kwalke amiga o konosi.

Pero ora och'or a bati, el a kuminsa hanja un presentimentu ku algu stranjo lo por a pasa. Mesora el a tumba pa Marchena. E ruman muhe di Amelia a kont'e ku e no a mira Amelia. Henri a pensa na avisa polis. Pero pa evita skandal, el a disidi di no hasi'e. Despwes di a sali for di Marchena, Henri a kamna informa na tur e kamindanan ku Amelia tin amigu. Ningun di nan a mira Amelia. Tur nervioso Henri a bolbe kas, pa mira ku Amelia por a jega. E kwarto tabata meskos ku el a lagu'e. E kier a puntra shon Elena ku e por a mira Amelia, ma komo ja a bira diesun or, e no kier a molostia shon Elena. Bon anshá Henri a bole sali, i sigui buska, informa tur kaminda Amelia lo por a pasa.

Den su desesperashon el a drenta un shap, dal dos whisky tras di otro. Sigun su sintí tur bruhá a sigui traha, el a pensa ku kisas por ta otro homber ta den e asuntu. Pero el a kita tai pensamentu, pasobra e tabata sa ku Amelia stim'e masha tantu. A la largu e no por a wanta mas. El a

sali bon purá for di e shap, bai buska un auto di huur, pa hib'e na kas di Amelia su grandinan, na Barber.

Morto spantá e mama a jega na porta ora Henri a bati.

‘Amelia? No, shon Henri. E no a jega aki. Mi no sa unda e por ta. Basta e mucha no a bai hasi su kurpa ningun danjo’. E tata tambe a sali na porta, pa weta ta kiko a sosode. Mientras ku e mama a kuminsa jora, e tata a konseha Henri di bai weta na kas di Amelia su tanta.

‘E tanta stim'e masha. Por ta masha bon ku el a bai ei’.

‘Na unda e tanta ta biba?’ Henri a puntra.

‘Santa Marta Grandi. Puntra pa Eloisa di Fema. Tur hende konose su kas’.

Henri a jama danki i bonochi, bolbe bula den e auto ku a keda ward'e.

‘Santa Marta Grandi’, el a duna e sjafer orden. ‘Ban purá’.

E lus di e auto tabata balia riba kaminda. Henri tabata tembla di nervio, kome tur su unjanan.

Sin muchu difikultad el a hanja e kas, despwes di a pasa den un kaminda smalitu di tera. Porta di e kas tabata será. Djis un krenchi klaridad di un lampi tabata sali den e skref na porta ku bentana. Henri a bula subi e dos tret di stupi dilanti di e kas i bati duru na porta.

‘Ta ken?’ un hende a kontesta paden.

‘Henri. Unda Amelia ta?’

A keda un silensio den kas. Henri a pone su orea na porta pa e skucha bon. A pars'e ku el a tende un hende jora, mientras un otro a papia algu masha poko-poko. I Henri a kompronde mesora ku Amelia ta ei den.

Henri a dal un gritu: ‘Habri lihe, sino mi ta kibra e porta aki’.

‘Mi ta bini, shon Henri. Mi ta bini’, e tanta a kontestá. ‘Ta un shimis mi ta tira na mi kurpa’. Djis despwes e porta a habri na un skref. Den e tiki klaridad di un lampi di korozin riba mesa den huki, Henri a mira un muhe gordo pará. Mesora el a pusha e porta habri i drenta kas.

‘Unda Amelia ta? M'a tende kon e ta jora?’

‘Ai, e pober su kurpa ta malu’, e tanta a kuminsa papia ku stem lastimoso. ‘E ta na kama. Awor ei el a pega sonjo’.

‘Laga di ta ganja ko'i loko. Amelia!’ Henri a pusha e tanta un banda, dal e porta di kamber habri. Amelia, drumí riba kama, a tapa su kara ku laker i kuminsa jora amargamente.

Bon sará Henri a jega na e kama, i bisa Amelia ku e mester ban kas mesora.

‘Mi no por, Henri’, Amelia a jora. ‘Mi no por. Bai lagami’.

‘Pakiko bo no por? Ta kiko a pasa? Bo kabes ta parew?

‘Mi no por kontabo, mi amor. Bai, bai lagami. No buskami nunka mas’.

Mientrastantu e tanta a keda para morto spantá den porta di kamber. Henri a bira di golpi, i exigi e tanta pa konta ta kiko a pasa.

‘Owel...... mi shon ta kompronde...... Ami ta kere......

‘Kere ki demonjo? Papia lihe’. Henri a bira bestia, ranka e laker for di Amelia su kurpa, i mira su esposa drumí sin e barika grandi. El a paralisa, bira friw. E no tabata sa kiko e bisa. Tur kos a rebultia den su sintí.

Su boka a tembla, i el a sinti kon su pianan a perde forsa. Ma despwes ku el a bin realisa kiko a sosode, el a dal un gritu: ‘Amelia, mi ju!’

Amelia a hisa su dos brasanan na laria, manera e kier a lanta i papia algu. Pero palabra no kier a sali for di su boka. Henri a kwe su brasanan tene i lant'e.

‘Unda mi ju ta, Amelia. Papia lihe. Papia!’ Pero Amelia a basha na joramentu: ‘Mi amor, mi ta sinti masha dolo. Mi no por lanta. Lagami drumi. M'a pèrdè nos ju’.

Henri a tende e berdad amargo i mesora el a sinti kon henter su kurpa a krak. Kompletamente desespera el a kai sinta riba e kama. Awa a basha for di su wowonan. Pero djis un ratu despwes el a bira manera razu. Furioso el a bula lanta, i grita Amelia pa kont'e tur kos. Gradwalmente el a bin hanja sa loke a sosode. Amelia a splika jorando, pakiko el a tira e ju afo, pa e mucha no bin pasa mal bida. Henri a sinti kon un tristesa amargo a podera di su sintí. Su mes stem a bira monotono den su orea. Su kabes a kuminsa bira. E tabata kompletamente kibrá.

‘Abo mes, Amelia’, el a jora ku ásko i rábia. ‘Abo ku tantu m'a stima. Bo tabata mi ideal. M'a ponebo riba un pedestal. M'a munstrabo kiko ta amor berdadero. B'a nenga di kompronde. E ju ku tantu mi a anhela. E kriatura ku m'a stima den bo barika. Bo ta un burdugu. B'a mata mi ju. Henter bo bida bo konsenshi lo sigui pursiguibo pa e krimen sushi ku bo a komete. Dos krimen b'a komete. Pasobra espiritwalmente bo a mata ami tambe. Pa bo kreensha estupido. Miedu di sosiedad. Miedu di hende ignorante. Miedu di un populacho bestia ku ta kere pendehada. B'a proba ku bo ta mes animal ku nan tur. Unda bosnan a dera mi ju? Bisami lihe, prome mi chokabo mata’. El a bula riba Amelia. Pero e tanta a kore jega serka, ranka Henri.

‘Den santana di Soto’, el a bisa Henri. ‘Den un huki pariba, parti nort’.

Henri a skupi riba Amelia, pusha e tanta un banda, i sali bai’.

‘Mi ta kla’, el a bisa e shafer i pagu'e. ‘Masha danki’.

Sigun Henri a sigui kamna bai pafo riba e kaminda di tera, e por a tende kon Amelia tabata grita jora. E tanta tabata blo borota.

Henri a subi kaminda grandi, pasa dilanti di misa bai pariba. Bientu fresku a buta su kurpa sodá tembla. Rapidamente el a bula e waja di santana pariba di misa. Djei el a sende varios lusafe, pa buska e graf fresku di su ju. E tiki lus di lusafe a buta e krusnan tira sombra misterioso riba swela. Su pianan di karson a jena ku simianan di jerba-dal-pega. Ma tur Henri su tinu tabata konsentra pa buska unda su ju ta derá. Ku ansha i ku rabia e tabata buska.

Te den e huki parti nort el a topa ku e monton chikitu di tera riba un graf fresku. Bon purá el a kita su bachi, pon'e den tera, i kuminsa koba ku su mannan. Lagrima tabata basha for di su wowo sigun e tabata benta e tera un banda.

Asina el a sinti tabla di e kaha, el a kuminsa koba ku mas furia. Un kaha chikitu, koló blow a aparese. Henri a ranka e tapa i sende un lusafe.

Ta manera su kurason a para djis un ratu, ora el a mira e kriatura pretu den e kaha.

‘Mi ju. Mi ju pretu’, tabata tur loke e por a bisa. Ku masha karinjo el a saka e kadaver for di e kaha, primi'e na su pechu i jora sin frena

 

Algun dia despwes un kunukeru a konta polisnan, ku el a weta un homber pasa riba e barankanan kontra di laman di nort, banda di shet'or di mainta.

‘I Pachi por a nota ki sorto di homber e ta?’ e polis a puntr'e.

‘Si, mi shon, koló kla’.

‘Kiko mas?’

‘E tabata kamna kabes abow’.

‘Pachi por a mira algu stranjo?’

‘Stranjo? Ahan, si. E tabatin un bonder den su brasa, kontra di su pechu. Mi ke ku ta den su bachi e tabatin un kos lorá. M'a mira un manga di su bachi ta kologa’.

‘Ki direkshon el a kwe?’

‘Stret pa nort. Riba baranka’.

 

Brigida ku Satronilia, dos kriá nigrita, tabata bati un boka di redu kontra di e tranke di datu entre nan dos su kurá di kas.

‘Anto ju, bo mester sa ku despwes ku polisnan a bini serka Amelia, nan a bin bis'e ku un homber a mira Henri riba baranka di San Pedro’.

‘Bo sa ku ta awor aki mi ta tende e asuntu ei?’

‘Bo ta lew for di notisia. Eloisa, e tanta di Amelia, por ta senjorita dams berde. Pero e tin su mal ehempel ku ne. Maske su kas ta dos stap for di esun di nos, e no a konta nos ni un pia di palabra’.

‘Si ju, manera mi ta kontabo. E ora ei a drenta Amelia un sorto di tristesa. Su kurason a kai. El a nenga kumínda. Dos siman el a keda tizga na bida. Anto e porko a hanja Santoli prome ku e muri’.

‘Ma ta unda nan a resa p'e?’

‘Kon mi por sa? Ami sí no ta resa pa muhe asina ei. Che. Dios librami’.


Vorige