Arte di palabra

46. Metro

Tin un relashon asina fwerte entre ritmo i metro, ku hopi be nos ta brua un den otro. Pero tin un diferensha den nan dos.

Ritmo ta e moveshon bibu ku ta duna un reprodukshon eksakto di kada matís delikadu di un poeta su sintimentu.

Metro ta un klasifikashon morto i fihá teórikamente pa sílaba aksentwa i no-aksentwa.

Metro por ta un gia pa un poema pero nunka e no mester bira un lei ku ta mara e owtor. Ritmo elegante tin ku dominá metro seku. Asina metro domina ritmo, nos ta haña un poesia sin stansha.

Den kada frase ku nos pronunsia, nos ta ripara ku tin sílaba aksentwa i sílaba menos aksentwa. Si den e variashon aki tin regularidad, anto e frase tin metro.

Laga nos tuma un ehempel di J.S. Corsen:

Nos a nase pa hugete di speransa,
te mañan si un poko nubia bini atrobe
lo nos kere, lo nos spera ku lo yobe.

Mesora nos ta tende ku den e frasenan aki tin sílaba fwerte (aksentwa) i sílaba debil (menos aksentwá).

Nos ta indika un sílaba debil ku un (tesis) i un fwerte ku un - (arsis). Anto nos ta weta ku kada verso ta konsisti di seis pia (-), esta seis parti igwal. Partimentu di un verso den pia nos ta yama skansion.

Ke men ku metro ta depende di dos faktor:

1.	aksentwashon di sílaba
2.	e kantidad di sílaba aksentwá den un verso.