Arte di palabra

(1973)–Pierre Lauffer– rechtenstatus

Ora dos o mas palabra den e mesun frase ta kuminsa ku e mesun zonidu, esei ta aliterashon o rima inisial.

P.e. den ‘Kansion di morkoi’

Ken ku ke por kritikami.... (ripitishon di ‘k’) (Juliana)

‘Mi pulmon, manera un mosa dams’ (ripitishon di ‘m’). (Daal)

Igwaldad di zonidu den dos o mas palabra ta rima.

Nos por distingi:

Verso no-rimá ta verso liber. Nan ta uz'e hopi den verso épiko i dramátiko, i generalmente den pentámetro yámbiko. Esaki ta e verso

di mas noble. E ta esun di mas difisil pa skibi, aunke e ta parse fasil.

P.e.: Ayera nochi, kwater be spiertá

m'a sinti bo spiritu band'e mi. (pentámetro yámbiko).

Un ehempel di verso liber ku tetrámetro trotéiko ta:

‘Barku blanku ku ta balia

n'e kabuya riba bui.... (Carlos Nicolaas)

E nomber verso liber ta origina di Inglatera: Blank verse.

Si e vokalnan ta rima pero e konsonantenan no, nos ta papia di asonansia: soño-morto, kumpra-suta, mira-sinta.

Ora un sílaba aksentwa ta rima (bos-kos), nos ta yama esei rima maskulino.

Den e rima hopi-stropi tin un sílaba aksentwa ku ta rima, sigí pa un sílaba no-aksentwa ku ta meskos. Esaki ta rima femenino.

Ta eksisti tambe rima lastrá. Despwes di e sílaba aksentwa tin dos sílaba mas ku ta menos aksentwa: Alanan-balanan.

Si despwes di e sílaba rimá tin un sílaba rimá mas (ku un tiki menos aksentwashon), nos ta papia di rima dòbel: Dochi-Rochi.

Den kaso ku e ultimo palabra di dos verso tras di otro ta igwal, esei ta rima riku.

Ora den e mesun frase dos palabra ta rima, esei ta rima meimei:

I m'a mira, bira kara

pa kuchú di wowo no hinkami.