Arte di palabra

27. Ekspreshonismo, vitalismo, obhetivismo

Nos ta mira naturalismo, impreshonismo i sensitivismo den literatura entre 1880 i 1900. Ma mester ta bisá ku den e tempu ei romantisismo tabata na moda ainda na Korsow (lesa p.e. Wolfschoon, Corsen i Chumaceiro). Pero e tempu entre e dos geranan mundial nos por tipifika komo tempu di ekspreshonismo i vitalismo, mientras ku e dosnan aki a bin haña nan fórma den obhetivismo.

Ekspreshonismo

Nos sa kaba ku impreshonismo a nase komo reakshon kontra romantisismo. Mientras ku ekspreshonismo na su turno tambe ta un reakshon riba impreshonismo i romantisismo.

E oposishon kontra e mentalidad ku tabatin promé ku gera a hasi su efekto tambe riba arte. Bida duru i kruel a afekta e owtornan. Ya nan no tabata satisfecho ku un arte di palabra bunita. Nan a sinti e obligashon di ekspresa nan sintimentu den un idioma direkto. Ke men ku ya no tabata mas e impreshon di pafó ku tabata fiha arte, pero ekspreshon i konvikshon di e poeta mester a domina den poesia.

I asina nos ta mira ku e poeta no tabata kibra kabes mas ku buskamentu di palabra bunita. Asta e no tabata preokupa mas ku e frase limpi i perfekto. E tabata ‘benta’ su poemanan den kara di mundu ku frase kortiko, kondensá.

Tur e idea tabata pa un poema evoka sugestion den pensamentu di e lektor. Pesei a bin sosode ku a nase hopi poema pa kwa no tabatin splikashon intelektwal.

Pesei nos por bisa, ku si impreshonismo tabata traha di pafó bai paden, ekspreshonismo en kambio tabata di paden bai pafó.

Varios poesia di Dr. C. Engels i tambe hopi ku a sali publiká den e revista literario ‘De Stoep’ ta prueba di esaki.

Vitalismo

Kasi no por distingi vitalismo for di ekspreshonismo. E ta un palabra manera tantu otro término den arte moderno ku praktikamente

[p. 30]

no ta bisa nada. E palabra básiko ‘vita’ ta demostra ku e owtornan ker a pone énfasis riba nan deseo fwerte di bida. No ta riba sintí ni riba sintimentu e owtor ke hasi efekto, pero riba boluntad, e boluntad di gosa bida i domina bida.

Den vitalismo nos ta mira ku e owtor ta kibra tur loke ta strob'e di gosa su bida. E ta elimina tur barera, di moda ku su instinto tin libertad kompletu. E ta biba manera un hende ku ta burachi di plaser. Un ehempel ta un poema di Henry Habibe:

Atardi a brasa
nos dos na lamá;
‘matami!’ b'a sklama
den santu tirá.

Mi sanger a kwaha,
m'a bira un sekat,
mi mannan a balia
te keda hankrá.

Atardi a morde
bo gritu hogá
i santu a kome,
golos, mi piká.

Un otro ehempel di Elis Juliana:

Pasami e butishi
di rom píca ku shinishi
pa mi sanger herebe;
lo mi tapa decencia
den barí di porkeria,
hisa brasa coba zoja
benta pa enemigunan,
lanta bula manera jeje
sak abau mane' sambèchi
hisa benta manda golpi
te ora curpa protesta,
cu mi dal abau na suela
scupi morto den su cara,
lastra tene na muraja
lanta wanta manda zoja
te ora mi explota.

Obhetivismo

E término ‘obhetivismo’ ta masha relashona ku ekspreshonismo i vitalismo.

[p. 31]

Nos a yega di bisa kon e owtor su deseo fwerte pa ekspresa loke tin den su alma a pon'e ekspresa su pensamentu i sintimentu mas direkto i sinsero posibel. E ta odia palabra bunita. Den obhetivismo e ta elimina tur loke no ta nesesario. No ku adhetivo pero ku sustantivo fwerte e ta traha. Tampoko e no ta preokupa ku métrika, rima o konstrukshon di estrofa. Un poesia a bira kompletamente liber. Prosa a bira kompakto, kondensá. Un ehempel ta loke ta sigi:

‘Boroto den marshe. Tur sorto di oló. Stem di un muhé ta korta airu. Un bendedó di number ta papia sin guli skupi. For di te patras un karni stobá ta tenta tur hende su nanishi. Awe ta diasabra.’