Arte di palabra

26. Naturalismo, impreshonismo, sensitivismo

Naturalismo

Nos por topa ku e terminologia ‘realismo’ den henter istoria di literatura. Naturalismo ta nifika mas o menos e ekspreshon eksakto di realidad.

Ta eksisti realismo for di Corsen te Oduber. Di Wolfschoon te Alette Beaujon. Aunke den final di siglo 19 nan no ta papia mas di ‘realismo’, pero di ‘naturalismo’. Naturalismo, un terminologia di Emile Zola, ta relashona ku realismo. E tambe ke duna un presentashon eksakto di realidad den arte. Pero naturalismo ta enserá mas. E no ta únikamente un koriente den arte, pero ademas un vision di bida. Naturalismo tabata un reakshon riba e espiritu di romantisismo.

Romantisismo tabata laga hopi luga pa sintimentu ku imaginashon (lesa p.e. obranan di Chumaceiro). Mientras ku naturalismo ta materialista. Mester tuma nota si ku materialismo kompletu ku no konose ningun ideal espiritwal, no por apresia e diferente balornan di bida.

Impreshonismo

Huntu ku e terminologia ‘naturalismo’ nos ta topa esun di ‘impreshonismo’. Por sierto nan dos ta masha relashona.

Impreshon di mundu, di bida, ta afekta e owtor. Esei ta dun'e su inspirashon, i esei ta su guia ora e ta pone su impreshon den palabra. Ta nifika ku loke mas ta impreshon'e, ta haña e luga mas importante den su prosa o poesia. E no ta kibra kabes ku e reglanan konvenshonal di konstrukshon di frase, pero e ta pone e palabranan manera e kièr. Ke men ku e no ta duna imagen di pensamentu, pero imagen di bista. Tin owtor ta bai asina lew ku nan obra ya no ta parse idioma lógiko. Nan ta bai asina lew ku nan ta evita tur palabra ku no ta demostra algu. Naturalmente esaki tin komo konsekwensha ku e arte ta bira difisil pa kompronde.

[p. 29]

Arte impreshonista ta trata na duna e total di impreshon ku e owtor a haña. Impreshonismo ta masha pasivo, pasobra e poeta ta sinta spera impreshon di pafó, Impreshonismo ta traha di pafó, bai paden

Sensitivismo

Tin poeta ku a bai asina lew den nan esfwerso pa pone kada variashon di impreshon den palabra, ku ya nan no a paga tinu mas na balor di nan obra. Esaki a pone ku bo no por kompronde nan. E impreshonismo eksagera aki nos ta yama sensitivismo. A la largu e ta bira unikamente un wega di zonidu i palabra.