Christelijcke en vermakelijcke gesangen

(1647)–Franciscus de Laat– rechtenstatus



[pagina 60]
Den 15 Psalm. WIe is die mensch, mijn Godt mijn Heer! Die in u schoone Tent sal woonen? Iae nae sijn wenschen en begeer Aenhooren u ghesonde Leer, En sich op uwen Bergh vertoonen? 2.[regelnummer] Die wandelt met een vroom ghemoedt, En tracht gherechtigheyt te pleghen, Sijn naesten alle voordeel doet, Sijn lust heeft in het hooghste goedt, En tot de waerheyt is gheneghen. 3.[regelnummer] Van achterklap sich selfs onthoudt, En sijne tonghe weet te toomen, Sijn broeders alles goedts betrouwt,
[pagina 61]
Op valsche gronden niet en bouwt, En altijdt is ontrent de vromen. 4.[regelnummer] In welckers ooghen zijn veracht De boose die nae Godt niet vraghen, En met der herten en ghedacht Der uytverkoorenen gheslacht Seer hoogh gheroemt haer leven daghen. 5.[regelnummer] Die niet op woecker geeft zijn gelt, Noch sich door gaven laet bederven, Daer door d'oprechte werdt ghevelt. Voorwaer die soo sal zijn ghestelt, Sal in der eeuwigheyt niet sterven.