Op de Rymery Vanden wel Sin-Rijcken Poeet Ian Siewertsz. Kolm, gestelt uyt de prose van Emanuel van Meteren.
'T Ghedacht en ooghen bey, die strijden teghen een
Overt Batavis spel, dat wijsheyt heeft ghegheven
Int Hooft van desen Helt, met hulp zijn eyghen leen:
Want t'ghene hy vertoont is siendent self naer t'leven.
Merckt, leest ghy dit o jeucht! ghy Grijs hier wort vervarst
Door Kolms sin soeten rijm; t'oude gedenck in claerheyt
Jae weechs baen tot des vry, doch eerst te hart beparst,
Die tot ruste des slans, Beminden vast de Waerheyt.
Hier is een Parma Vrou, met haer gheswooren raet,
Daer protesteren d'Eel, teghens bloed'ge Placaten
Oock weygringh huns versoeckx, men vindt Pasquil op straet
Nassou en veel ghemeen, gaen goedt en Landt verlaten.
Duck-dalf uyt Spaengien comt, ha eyghen Neroos vaer!
Toont Parma Coninckx last, o gruwel boos bedreven
Voor dienst des Welstandts trou, t'ghedenckt doet rijsen t'haer
Daer Egmont en Hoorn beyt, ghenomen wordt het leven.
Tijdts loop vertoont hem mee, die Propheci brenght voort
Gheschiet door Gods regeer, met teyckeningh der handen.
En weckt d'Orangen stam, dat waer hier in bekoort
Soo wy nu zijn ghekent voor eyghen Vrye Landen
O Siwersoon sou ick u wijs beleyts verhael
Peghelen 't aldernaust, voorwaer ick ginck my stellen
Teghen onmoghelijckx doen, jae teghen kennis schael
Of aen den Hemels krieck de Starren te gaen tellen.
Prose-schrijvers ey siet, besonder gy o Meter,
Hoe des trou Batavier u reden gaet verlijcken
Beminders van prompt duyts, ende zijt des gheen vergheter
Die op Pernassi Bergh, ons tael gaet staech verrijcken
Ghy Susters neghen ras, set op het hooft een Croon,
Hem die Uyt SIevens Ionst, Neerlants staet stelt te vooren.
En Fama loopt ende vlieght, ja maeck hem tot een loon
Soo dat men in dit Rondt, van dees Poeet mach hooren.
G. Martens. k'Betrou in een.
|
|
Auteursrechtvrij