Levenders reden-feest, oft Amsteldams Helicon

Op-ghestelt By de Brabantsche Reden-Rijcke vergaderingh uyt Levender Ionst

[fol. S4r]

Leiden, Liefd' es'tFondament.

Knie-werck, Op de Vraghe: Wat vvijsheydt meest tot Lof de Reen-Vrou baren can?

HEt vvit Levender schoon uyt 'sLevens Ionst gaet vraghen:
VVat wysheyt meest tot Lof de Reen-Vrou baren can?
'T Welck het vvit Accoley, is een Liefdigh behaghen,
En wilde wel met lust daer yet verclaren // van,
Dies zy haer ruyd' verstandt niet en sal sparen // dan,
Want zy't nut van dees Vrou ghestadigh hout in Eeren,
Daerom't lieff'lijck ghebruyck neemt in bewaren // an,
Sy sal haer nut met vreught u dan ten rechten leeren,
Dus zijn zy seer verdwaelt, die haer selfs van haer keeren,
Want d'Oude hebben haer ghenoemt Hemels van aert,
Dies zy nuttigheydt niet en wilden ontbeeren,
Maer hebben die te met als Bloemkens t'saem vergaert,
Want wijsheydt haer met recht by haer nootwendigh paert
Door haer soetigheydt groot, die zy yeder can gheven,
Gheen wysheyt wert bespeurt waer dat zy wert ghespaert,
Daerom roept over-luyt: o bloem waerdigh verheven,
Wat vreught, ja wat vermaeck werter door u bedreven,
'T bedroefde gheeft ghy troost, blyschap hout ghy in staet
Door u Rymery soet, die dickwils is beschreven
Van seer veel Geesten kloeck, die veel tydts vroegh en laet
Daer in hebben besteet, doch niet om eyghen baet,
D'welck haest verkeeren kan, die haer daer toe bereyden
Wat wijsheydt zy meest baert, bemint waerheydt gheen haet,
'T is redens kennis recht van d'onreen t'onderscheyden.

Liefd' es 'tFondament.

Trou baert vrientschap.